តំណាលគ្នានឹងតំណាងគ្រូបង្រៀន មកពីខេត្តកំពង់ស្ពឺកំពុងឡើងថ្លែងពីការកង្វល់ ក្តីលំបាករបស់គ្រូៗនៅទូទាំងខេត្ត និង​ការចាប់អារម្មណ៍របស់អ្នកសារព័ត៌មាននៃការឡើងថ្លៃងនោះ ស្រាប់តែនៅមិនឆ្ងាយពីទីនេះប្រហែលជាប្រាំម៉ែត្រ សម្រែក​មួយដ៏ខ្លាំងបានស្រែកឡើងថា «កាំភ្លើងៗ។ មានគេយកកាំភ្លើងចូលជួយចាប់ ជួយដកកាំភ្លើង!»។ គឺជាសម្រែក​របស់​អ្នក​ដែលនៅក្បែរនោះ នៅពេលដែលខ្លួនបានឃើញ ជនសង្ស័យមានអាវុធខ្លីជាប់នៅនឹងខ្លួន។

បុរសជាជនសង្ស័យ អង្គុយបាក់លោម នៅផ្ទាលដី បន្ទាបពីការចោមវាយរបស់ពលរដ្ឋ។ (រូបថត MONOROOM.info/ O. Vary)

រាជធានីភ្នំពេញ - បុរសម្នាក់ដែលជាជនសង្ស័យ ដែលត្រូវបានគេប្រទះឃើញកំពុងតែ«ដក»អាវុធប្រភេទខ្លី ហាក់​ដូច​ជា​មានចេតនា ឬគោលបំណងជាក់លាក់អ្វីមួយ ត្រូវបានក្រុមពលរដ្ឋអ្នកចូលរួម នៅទីលានប្រជាធិបតេយ្យចោមព័ទ្ធចាប់ និង​ដកហូតបាននូវអាវុធខ្លីមួយដើមជាភស្តុតាង។ ហេតុការណ៍នេះ បានកើតឡើងនៅទីលានប្រជាធិបតេយ្យ ក្នុងពីធីប្រារព្ធ​ទិវាគ្រូបង្រៀនពិភពលោក ដែលដឹកនាំដោយលោក រ៉ុង ឈុន ប្រធានសមាគមន៍គ្រូបង្រៀនឯករាជ្យ កាលពីព្រឹកថ្ងៃទី១៣ ខែតុលា ឆ្នាំ២០១៣។

បុរសម្នាក់នេះមានកាន់កាតជាអ្នកសារព័ត៌មាន ធ្វើឲ្យគេហទំព័រមួយឈ្មោះ មង្គលរិទ្ធិអ៊ីម្សផត និងអិច្សផត ខូអិលធីឌី ពាក់​ជាប់នឹងខ្លួនផង ដែលតាមរយៈប័ណ្ណអ្នកសារព័ត៌មាននេះ បានឲ្យគេស្គាល់ថា បុរសនេះឈ្មោះ ដឹង ជឿន។

មុនពេលកើតហេតុនេះ គេឃើញវត្តមានលោកស្រីមួរ សុខហួរ ដែលឃ្លាតចំងាយប្រមាណជាង៣ម៉ែត្រពីលោក សុន ឆ័យ និងចំងាយជាង៥ម៉ែត្រពីវេទិការ នៃអ្នកឡើងសម្តែងមតិ។ បុរសវ័យចំណាស់ម្នាក់អាយុប្រហែលជាង៥០ឆ្នាំ ដែលមិន​បាន​ប្រាប់ឈ្មោះ (ទំនងជាគាត់មិនចង់ធ្វើសាក្សី) បានបញ្ជាក់ប្រាប់ទស្សនាវដ្តីមនោរម្យព័ងអាំងហ្វូថា លោកកំពុងមាន​វត្តមាន​នៅជិតនឹងលោកស្រីមួរ សុខហួរ ពេលនោះស្រាប់តែឃើញបុរស ដែលជាជនសង្ស័យរូបនេះ បានលូកដៃទាញ​កាំភ្លើង​ខ្លី​មួយដើមចេញមក។ លោកបន្តរថា លោកបានស្រែកយ៉ាងខ្លាំងៗឲ្យ ជួយចាប់ជនសង្ស័យដែលមានកាំភ្លើងនោះ។ សម្រាប់​រូបលោក ដែលបានឃើញពីសកម្មភាពនោះ បានធ្វើបញ្ជាក់ថា «ជនសង្ស័យនេះ មានចេតនាសំដៅទៅលើ​លោក​ស្រីមួរ សុខហួរ និងលោក រ៉ុង ឈុន។»

ក្រោយពីព្រឹត្តិការណ៍ប្រតាយប្រតប់ ប្រទាញប្រទង់ និងការឡោមព័ទ្ធនៃអ្នកចូលរួម ជាមួយនឹងកំហឹងលើជនសង្ស័យ ដែល​យកអាវុធចូលក្នងវេទិការនោះ ក៏បានបង្កឲ្យមានការប៉ះទង្គិចគ្នា រហូតធ្វើឲ្យជនសង្ស័យនោះត្រូវរបួសយ៉ាងដំណំ និងថែម​ជាមួយនឹងការឡោមព័ទ្ធ នៃអ្នកសារព័ត៌មានក្នុងការផ្តិតយករូបភាព និងព័ត៌មាននោះ ជនសង្ស័យដែលកំពុងតែទ្រមខ្លួន ស្ទើតែរកខ្យល់ដកដង្ហើមគ្មានបាននិយាយ ទាំងស្រែកយំថា «ខ្ញុំមិនមានធ្វើអ្វីខុសនោះទេ ខ្ញុំទើបតែនឹងមកហើយ​ចូលថត​យករូបភាពតែប៉ុណ្ណោះ ខ្ញុំមិនបានធ្វើអ្វីខុសទេ គេចោទប្រកាន់ខ្ញុំ។ សូមអគុណដល់ សមត្ថកិច្ចដែលបានជួយខ្ញុំ (…)»។ និយាយបានត្រឹមនេះ កម្លាំងប៉ូលីសក៏បានដឹកជននោះ ដោយម៉ូតូចេញបាត់ទៅ គ្រាន់តែបញ្ចាក់ថាយកទៅមន្ទីរពេទ្យ។

ពាក្យបណ្ដឹងនៅផ្ទាល់កន្លែងរបស់លោក សុន ឆៃ

អាវុធខ្លី (មិនស្គាល់ម៉ាក) ត្រូវបានលោកសុន ឆ័យ និងលោកស្រីមួសុខហួរ ដកហូត និងបានប្រគល់ទៅឲ្យ​ព្រះរាជអាជ្ញា​រង​សាលាដំបូងរាជធានីភ្នំពេញ លោក មាស ច័ន្ទពិសិទ្ធិ  នៅនឹងទីលានប្រជាធិបតេយ្យផ្ទាល់តែម្តង។ មុននឹងទទួល​យក​អាវុធ​នេះ លោកព្រះរាជអាជ្ញារងរូបនេះ បានសួររកអ្នកដែលបានដកហូតអាវុធនោះ ពីជនសង្ស័យដើម្បីយកទៅសារសួរ តែត្រូវ​បានលោកសុន ឆ័យ ឆ្លើយថា មិនចាំបាច់សួររកអ្នកដកហូតនោះទេ។ សម្ដីរបស់លោក សុន ឆៃ បានបង្កឲ្យព្រះរាជអាជ្ញា​ផ្ទុះកំហឹងឡើង ដោយចង្អុលមុខលោក សុន ឆ័យ និងបាននិយាយតបថា «ឯកឧត្តមនិយយាយខុសហើយ និយាយនេះ​មានន័យថា មើលងាយមន្រ្តីសាធារណៈរបស់រដ្ឋ»។

បន្ទាប់មកលោកស្រីមួរ សុខ ហួរក៏បាននិយាយកាត់ថា កាំភ្លើងនេះគ្មានអ្នកណាមួយដកហូតនោះទេ តែវាត្រូវបានជ្រុះដល់​ដីរួចជាស្រេចទៅហើយ មុននឹងយកមក។ ឯលោក សុន ឆ័យ បានបន្តរថា «ខ្ញុំសុំប្តឹងពីបុគ្គលនេះ ត្រូវធ្វើការស្រាវជ្រាវ និងស៊ើបរកអ្នកបញ្ជាឲ្យឃើញ» ហើយព្រះរាជអាជ្ញាក៏ឆ្លើយត្រឡប់មកវិញដែរថា «ខ្ញុំនឹងស៊ើបអង្កេតជាបន្ទាន់»៕

សូមទស្សនាវីដេអូ ស្ដីពីព្រឹត្តិការណ៍នេះ ដូចតទៅ៖

---------------------------------------------------------
ដោយៈ អ៊ុម វ៉ារី - ថ្ងៃទី១៣ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ