អ្នកភូមិទាំង១៦៦គ្រួសារ ដែលបានឃើញ សកម្មភាពផ្ទាល់ភ្នែក លឺផ្ទាល់នឹងត្រចៀក ពីសម្តីមេភូមិខាងលើ បាននាំគ្នា​ផ្តិត​មេដៃ នៅលើលិខិត«បដិសេធន៍»មួយច្បាប់ កាលពីម៉ោង១១ថ្ងែទី ១២ ខែមិនា ឆ្នាំ២០១៥នេះ ប្រគល់ឲ្យអ្នកស្រី ឡុង សុគន្ធី ជាតំណាងអ្នកភូមិ យកទៅដាក់នៅសាលាស្រុកអូរជ្រៅ ដើម្បីសុំកិច្ចអន្តរាគមន៍ ឲ្យបញ្ឈប់មេភូមិ និងបក្សពួក នូវ​ការ​ភ្ជូរ​រាស់​លើដី ដែលកំពុងមានជម្លោះ។

មិនត្រឹមតែបង្ករការភ្ញាក់ផ្អើល ដល់អ្នកភូមិនោះទេ តែមេភូមិឈ្មោះ លោក ថា ទន ថែមទាំងបាននិយាយ ជាមួយអ្នកភូមិថា គ្មានអ្នកណាម្នាក់ មានសិទ្ធធ្វើអ្វី នៅលើដីនេះទេ មានតែលោកម្នាក់ប៉ុណ្ណោះ។ ហើយលោកមេភូមិ បាននិយាយ ដោយ​ប្រើ​ឈ្មោះអភិបាលស្រុក មកធ្វើជាសំអាង កុំឲ្យអ្នភូមិហ៊ានឃាត់គាត់។ ការលើកឡើងរបស់លោក មេភូមិរូបនោះ បាន​ធ្វើ​ឲ្យអ្នកភូមិនអូរបីជាន់ ដែលជាម្ចាស់ដី កំពុងមានជម្លោះដ៏រ៉ាំរ៉ៃច្រើនឆ្នាំ  កាន់តែមានភាពតក់ស្លុត ទ្វេឡើង។

បន្ទាប់ពីបានទទួលសំនុំឯកសារ និងស្នាមមេដៃរបស់អ្នកភូមិត នៅរសៀលថ្ងៃទី១២ ខែមីនានេះ អ្នកស្រី ឡុង សុគន្ធី ជា​តំណាង​ប្រជាពលរដ្ឋ នៅភូមិខាងលើ បានលើកយកសំដីអ្នកភូមិ មកនិយាយឲ្យទស្សនាវដ្តីមនោរម្យ.អាំងហ្វូដឹងថា មេភូមិ​គម្រាម មិនឲ្យអ្នកភូមិ ធ្វើសំណើរទៅណាទាំងអស់ ព្រោះលោកមានបញ្ជា ពីអភិបាលស្រុកអ៊ូរជ្រៅ លោក សាន ស៊ានហូ។ អ្នកស្រី បានបន្ថែមថា គាត់មិនជឿសម្តីមេភូមិននេះទេ ព្រោះអស់រយៈពេល ជាច្រើនឆ្នាំមកហើយ មេភូមិ​រូប​នេះ មិនដែលបានសហការអ្វី ឲ្យហ្មត់ចត់ ជួយអ្នកភូមិ ពីបញ្ហាដីនេះទេ ស្រាប់តែដល់ថ្ងៃនេះ ចេញមុខភ្ជូររាស់លើដីជម្លោះនោះ ដោយគ្មានហេតុផល។

ដោយឡែក ប្រធានភូមិថ្នល់បត់លោក ថា ទន បានឲ្យទស្សនាវដ្តីដឹងថា លោកពិតជា បានបញ្ជាឲ្យពលរដ្ឋមួយចំនួនតូច ទៅទៅភ្ជូររាស់លើដី មានទំនាស់នោះមែន។ បន្ទាប់មកទៀត លោកបានបញ្ជាក់ខ្លាំងៗថា ពលរដ្ឋក្រោមបង្កាប់ទាំងនោះ មាន​សិទ្ធ ព្រោះលោក ជាអ្នកផ្តួចផ្តើមឲ្យពួកគេធ្វើ ដោយសំអាងលើសម្តី របស់អភិបាលស្រុកថា ពលរដ្ឋមានសិទ្ធិ​បង្ក​បង្កើន​ផល លើដីទាំងអស់ ឲ្យតែដល់រដូវបង្កបង្កើនផល។ តែមេភូមិនខាងលើ គ្មានលិខិតណាមួយ ដែលចេញពីសាលា​ស្រុក​អូជ្រៅ ឲ្យធ្វើសកម្មភាពនោះទេ គ្រាន់តែជាពាក្យសម្តីរបស់លោក តែប៉ុណ្ណោះ។

ទស្សនាវដ្ដីព្យាយាមទាក់ទង ទៅអភិបាលស្រុអូជ្រៅ លោក សាន ស៊ានហូ ពាក់ព័ន្ធជាមួយបញ្ហាទាំងអស់ខាងលើ តែ​ទូរស័ព្ទ​បស់លោក មិនអាចទំនាក់ទំនងបាន។ ដោយឡែកអភិបាលរង ខេត្តបន្ទាយមានជ័យ លោក អ៊ុំ រាត្រី បាន​បដិសេធន៍​មិនដឹងរឿងទាំងអស់នេះថា លោកមិនបានទទួលរឿងរ៉ាវនេះទេ ដោយលោករវល់ ទៅកាត់ខ្សែបូ ជាមួយ​អភិបាល​​ខេត្ត លោក គោ ស៊ុំសារឿន នៅថ្ងៃដដែលនេះ៕