នៅក្នុងសម័យកំព្យូទ័រដ៏ទំនើបនេះ តើគេអាចមានលទ្ធភាពសាងសង់លំនៅដ្ឋាន ជាមួយនឹងតែបាតដៃទទេ បាន​ឬទេ? គ្មានពូថៅ គ្មានកាំបិត... គ្មានអ្វីទាំងអស់ មានតែធម្មជាតិនៅជុំវិញ តើអាចសាងសង់ ជម្រកមួយ​សមរម្យ សម្រាប់ស្នាក់អាស្រ័យបានឬទេ? យុវជនជាតិអូស្ត្រាលីម្នាក់នេះ បានបង្ហាញថាទោះ​ជាស្ថិត​ក្នុង​ស្ថានភាព​បែបណាក៏ដោយ ក៏មនុស្សនៅតែមានលទ្ធភាព អាចធ្វើការឆ្នៃប្រឌិត បង្កើតជាគេហដ្ឋានមួយ ដើម្បី​បញ្ជៀស​ខ្លួន ពីភាពហាលក្ដៅហាលភ្លៀង និងអាចមានកម្ដៅ ជួយបង្កើតភាពកក់ក្ដៅ នៅពេលធាតុអាកាស ចុះត្រជាក់​នោះទៀត។

នៅកណ្ដាលព្រៃ គ្វីនស្លេន (Queensland) នៃកោះអូស្ត្រាលី យុវជនម្នាក់នេះ បានសង់កូនផ្ទះនេះ​ឡើងជាថ្មី​ទៀត ដោយប្រើពេលជាង៣ខែ បន្ទាប់ពីខ្លួនបានសង់​កូនផ្ទះជាច្រើន លើកមុនៗ ដែលធ្វើឡើងត្រឹមតែ ពី​ស្លឹក​ឬពីចំបើងប៉ុណ្ណោះ។ ចេញពីបាតដៃទទេ យុវជនបានយកដុំថ្មមកធ្វើជាពូថៅ ហើយបានកាប់ឈើជាច្រើន​កំណាត់ ដើម្បីរៀបជាគ្រោងផ្ទះឡើង។ បន្ទាប់មក យុវជនបានបង្កើតចង្ក្រានមួយ សម្រាប់ដុតបន្ទះដីឥដ្ឋ​ជា​ច្រើន ដែលបានក្លាយជាក្បឿង សម្រាប់យកទៅប្រក់ជាដំបូលផ្ទះ។

ខាងក្រោមនេះ ជាតួលេខសំខាន់ៗមួយចំនួន ដើម្បីសង់ផ្ទះនេះ ដែលកើតឡើងពីបាតដៃទទេ៖

• ១០ថ្ងៃ ដើម្បីកាប់ឈើ មកលើកជាគ្រោងផ្ទះឡើង (សសរ ធ្នឹម និងគ្រោងដំបូល)
• ៥ថ្ងៃ ដើម្បីធ្វើចង្ក្រាន និងពុម្ភក្បឿង
• ២៨ថ្ងៃ ដើម្បីធ្វើក្បឿង ប្រមាណជា៤៥០សន្លឹក
• ១៣ថ្ងៃ ដើម្បីសង់ចង្ក្រានដុតកម្ដៅកម្រាល និងសង់ជញ្ជាំង ធ្វើពីដីឥដ្ឋ

​​​​​​​​

• ១០ថ្ងៃ ដើម្បីសំអាតផ្ទះ និងរៀបចំតំបន់ជុំវិញ
• ៣៦ថ្ងៃ ជាថ្ងៃដែលមានភ្លៀង បង្កការរំខានដល់សំណង់ផ្ទះ ធ្វើពីដីឥដ្ឋ និងបានធ្វើឲ្យរយៈពេល​សាង​សង់ ត្រូវប្រើពេលសរុប ដល់ទៅ ១០២ថ្ងៃ។

ម្ចាស់វីដេអូ ដែលដាក់ឈ្មោះ «Primitive Technology» នៅលើយូធូប បានបញ្ជាក់ថា យុវជនជាតិអូស្ត្រាលី​ខ្លួន​ឯង មិនមែនជាមនុស្ស ដែលរស់នៅក្នុងព្រៃនោះទេ ប៉ុន្តែការសាងសង់កូនផ្ទះ ចេញពីបាតដៃ និងកម្លាំង​ផ្ទាល់ខ្លួននេះ ជាចំណង់ចំណូលចិត្តផ្ទាល់ខ្លួន របស់យុវជន។ តែសម្រាប់ក្រសែរភ្នែក របស់អ្នកទស្សនាវិញ ជារឿងគួរឲ្យអស្ចារ្យណាស់៕