អ្នកសារព័ត៌មានជាតិហុងគ្រី អ្នកស្រី Petra Laslzo របស់ស្ថានីយទូរទស្សន៍ N1TV ត្រូវបានបណ្ដេញ​ចេញពី​ការងារ កាលពីថ្ងៃអង្គារមុននេះ បន្ទាប់ពីអ្នកស្រី បានប្រព្រឹត្តិទង្វើខុសប្រក្រតី ទៅលើជនភៀសខ្លួនច្រើននាក់ ខណៈអ្នកស្រីបានចុះ ទៅយកព័ត៌មាននៅទីនោះ។ បើតាមស្ថានីយ៍ទូរទស្សន៍ ដែលគេស្គាល់ថា មាននិន្នាការ​ស្និតនឹងក្រុមស្ដាំនិយមជ្រុល របស់ប្រទេសហុងគ្រី បានអះអាងថា កាយវិការរបស់អ្នកស្រី ជារឿងមួយ មិនអាច​ទទួលយកបាន ហើយស្ថានីយទូរទស្សន៍ បានបណ្ដេញអ្នកស្រីចេញពីការងារ ចាប់ពីពេលជូនដំណឹង​នេះ​ភ្លាម។

ហេតុការណ៍បានកើតឡើង នៅក្រុង «Rozske» ជាប់ព្រំដែនភាគខាងត្បូង នៃប្រទេសហុងគ្រី កាលពីថ្ងៃអង្គារ ដើមសប្ដាហ៍នេះ។ នៅក្នុងរូបភាពដែលថតជាប់ ដោយអ្នកសារព័ត៌មានផ្សេងទៀត បានបង្ហាញឲ្យឃើញថា អ្នកស្រីបានយកជើង ទាក់ឲ្យបុរសម្នាក់ អាយុប្រមាណជា៣០ឆ្នាំ ដែលមានពរកុមារម្នាក់ផង ឲ្យដួលទៅលើដី។ បន្ទាប់ពីនោះមក ក្នុងរូបភាពដដែល គេឃើញអ្នកស្រី បានទាត់ជនភៀសខ្លួនផ្សេងទៀត ខណៈជនភៀសខ្លួន​ទាំងនោះ បានរត់គេសខ្លួន ពីការប្រមាញ់របស់នគរបាលហុងគ្រី។

នៅថ្ងៃនោះ ជនភៀសខ្លួនច្រើនសិបនាក់ បានព្យាយាមឆ្លងព្រំដែន របស់ប្រទេសស៊ែប៊ី ចូលមកក្នុងប្រទេស​ហុងគ្រី ហើយបានជួបនឹងការព័ទ្ធស្ទាក់ របស់ក្រុមនគរបាលហុងគ្រី  ដើម្បីប្រមូលក្រុមជនភៀសខ្លួនទាំង​នោះ យកទៅដាក់ក្នុងមជ្ឈមណ្ឌលមួយ។ ប៉ុន្តែកាយវិការរបស់អ្នកស្រី Petra Laslzo ត្រូវបានក្រុមអ្នកសង្កេត​ការណ៍ វាយតម្លៃថា ជាការសម្ដែងនូវការស្អប់ខ្ពើម របស់បណ្ដាជនហុងគ្រីជាច្រើននាក់ ទៅលើជនអន្តោរប្រវេសន៍​ទាំង​នោះ ដែលបានធ្វើដំណើរ ទាំងពាន់ៗនាក់ ចូលមកស្វែងរកសិទ្ធិជ្រកកោន នៅក្នុងបណ្ដាប្រទេស​ជឿន​លឿន នាទ្វីបអ៊ឺរ៉ុបខាងលិច៕