- គេហទំព័រលក់ទំនិញ តាមអាំងធើណែតមួយ របស់បារាំង ឡា រ៉ឺឌូត (La Redoute) បានដាក់រូបថតផ្សាយ​លក់​ខោអាវកូនក្មេង នៅលើគេហទំព័រ តែភ្លេចដករូបបុរស«ស្រាត»ម្នាក់ ចេញពីខាងក្រោយកូនក្មេងទាំងនោះ។ រឿងនេះ​កើតឡើងនៅថ្ងៃទី០៤ ខែមករា ឆ្នាំ២០១២ តែប៉ុន្មានថ្ងៃប៉ុណ្ណោះ បន្ទាប់ពីចូលឆ្នាំថ្មីសកល។ បើមើលមួយភ្លែត គេមិន​ចាប់អារម្មណ៍នឹងរូបថត ដែលមានបុរសស្រាតខ្លួនទទេ ងើបចេញពីទឹក នៅពីក្រោយកូនក្មេងផ្សាយខោអាវ សម្រាប់​លក់ក្នុងរដូវក្ដៅនៃឆ្នាំ២០១២នេះទេ។ ជារឿងអាស្រូវមួយ ដែលបានធ្វើអោយផ្ទុះ នូវការជជែកបែកអូរហូរជាស្ទឺង នៅ​គ្រប់បណ្ដាញផ្សព្វផ្សាយ ជាពិសេសនៅលើបណ្ដាញសង្គម។ ប៉ុន្តែគេហទំព័រ បានបញ្ចប់រឿងអាស្រូវនេះ ដោយបាន​ចេញមកសុំទោស នៅលើទំព័រទ្វីធើរ (Twitter) ជាផ្លូវការរបស់ខ្លួន ហើយបានដករូបថតនេះ ចេញជាបន្ទាន់ ពីគេហទំព័រ​លក់ទំនិញ។

-​ ព្រឹត្តិការណ៍ ដ៏គួរអោយខ្លាច របស់«មនុស្សស៊ីមនុស្ស» នៅមីអាមី (Miami) ក្នុងរដ្ឋផ្លរីដ (Floride) សហរដ្ឋអាមេរិក ហើយរហូតមកដល់ថ្ងៃនេះ គេនៅមិនទាន់ដឹងថា បញ្ហានឹងមានតែមួយនេះ ឬយ៉ាងណានោះទេ។ នៅថ្ងៃទី២៦ឧសភា «មនុស្សខ្មោច» ដែលជាបុរសម្នាក់ឈ្មោះ រូឌី អឺហ្សែន (Rudy Eugene) អាយុ ៣១ឆ្នាំ ត្រូវបាននគរបាលទីក្រុង​នេះបាញ់​សម្លាប់ ខណៈពេលដែលជននេះ កំពុងបកស្បែក ហែកសាច់មុខ របស់បុរសគ្មានទីជម្រកម្នាក់ទៀត ឈ្មោះ រ៉ូណាល់ ប៉ូប៉ូ (Ronald Poppo) ដាក់ចូលក្នុងមាត់ទំពារស៊ីជាអារហារ។ ក្នុងសេចក្ដីពន្យល់បឋម បន្ទាប់ពីបានពិនិត្យ​ទៅលើសាកសព​ របស់ រូឌី អឺហ្សែន បានអោយដឹងថា ដំណើរទៅក្នុងផ្លូវអាក្រក់ (សេពថ្នាំ ...) បានធ្វើអោយបុរសនេះ ហ៊ានប្រព្រឹត្តិនូវអំពើ​នេះ។ តែនៅក្នុងការពន្យល់មួយទៀត មិនផ្លូវការ បានអោយដឹងថា រូឌី អឺហ្សែន បានរង«អំពើរ»របស់«គ្រូធ្មប់»ណាម្នាក់។ តែសេចក្ដីសន្និដ្ឋាននេះ នៅមិនអាចរកការបញ្ជាក់បាននៅឡើយ។ សូមចុចអានអត្ថបទនេះ ដែលមនោរម្យព័ងអាំងហ្វូ បានធ្វើរបាយការណ៍ជូន តាំងពេលកើតហេតុនោះភ្លាម (អត្ថបទហាមឃាត់ មិនអោយអាន នូវកុមារអាយុក្រោម១៦ឆ្នាំ និងមនុស្សដែលមានអារម្មណ៍ ប៉ះទង្គិចខ្លាំង)។

- រូបព្រះអង្គម្ចាស់ ហារី លែងខ្លួនទទេ ធ្វើអោយផ្អើលពិភពលោក។ រដូវក្ដៅនៅឆ្នាំនេះ បានធ្វើអោយព្រះរាជវង្ស របស់ប្រទេសអង់គ្លេស ក្ដៅក្រហាយមិនតិចទេ។ ខណៈពេលដែល ព្រះអង្គម្ចាស់វីលីយ៉ាម (William) និងមហេសី ឃេដ បានបង្ហាញពីរូបភាពគំរូរបស់ខ្លួន ដល់អ្នកផងទាំងឡាយនោះ ព្រះរាជអនុចរបស់ទ្រង់ ឯណេះវិញ មិនត្រូវបានគេទុក​អោយនៅស្ងប់ស្ងៀមទេ។ រូបថតខ្លួនស្រាតននលគោក នៅជិតនឹងស្រីៗស្លៀកខ្លីជាច្រើននាក់ នៅក្នុងសណ្ឋាគារមួយ នៃទីក្រុងឡាស វេហ្គាស ត្រូវបានចេញដាក់ផ្សាយព្រោងព្រាត តាមប្រព័ន្ធផ្សព្វផ្សាយនានាលើពិភពលោក​ ពេញមួយ​ខែសីហាឆ្នាំនេះ។ គឺជារូបថតដ៏អាស្រូវ ដែលព្រះបុរមរាជវាំង ប៊ែកឃីញហ៊ាម (Buckingham) មិនចង់ធ្វើការបកស្រាយ សូម្បីតែមួយម៉ាត់។

- នៅអាស៊ីអាគ្នេយ៍ ស្វាដែលមានរូបរាងធំ ដែលគេហៅថា អូរ៉ង់ អ៊ូតង់ (orangs-outans) ត្រូវចាប់អោយមកបម្រើ​ផ្លូវភេទ ជាមួយមនុស្ស។ ជារឿងមួយហួសនិស្ស័យ ដែលសឹងតែជឿមិនបាន ដែលមនុស្សបានចាប់ សត្វស្វាញីធំៗ​ទាំង​នោះ មកបម្រើតណ្ហាដ៏ហួសប្រមាណរបស់ខ្លួន។ ញត្តិមួយត្រូវបានគេដាក់ នៅលើគេហទំព័រស្វែងរកហត្ថលេខាគាំទ្រ ដើម្បីប្រឆាំងនឹងការធ្វើទារុណកម្ម ទៅលើសត្វបែបនេះ។ នៅក្នុងអត្ថបទដែលភ្ជាប់ជាមួយនឹងញត្តិនោះ បានលើកឡើង​ជាឧទាហរណ៍ ពីសត្វស្វាញីអាយុ១២ឆ្នាំមួយក្បាល ដែលត្រូវបានគេកោររោមចេញ លាងសម្អាត បាញ់ទឹកអប់ និងថែម​ទាំងលាបក្រែម នៅលើបបេមាត់ថែមទៀតផងនោះ ត្រូវគេចង់ច្រវាក់ភ្ជាប់ទៅនឹងគ្រែ ដើម្បីទុកអោយភ្ញៀវ ដែលមករក​សេវាកម្មនេះ ឡើងស្ថានសួគ៌ជាមួយ។ រឿងនេះត្រូវបានគេរាយការណ៍មកថា បានកើតឡើងនៅលើកោះ ប៊រណេអូ (Bornéo) ប្រទេសឥណ្ឌូនេស៊ី និងកន្លែងខ្លះមួយចំនួនទៀត ក្នុងប្រទេសថៃ។

- តារាភាពយន្ដស្រាត  វ័យ២៩ឆ្នាំមួយរូបឈ្មោះ លុកា រ៉ូកូ ម៉ាញ៉ូតា (Luka Rocco Magnotta)  ជាជនសង្ស័យ «មាន​រោគចិត្ត» ជាតិកាណាដា ដែលបានសម្លាប់កូនឆ្មារជាដំបូង និងមិត្តប្រុសរបស់ខ្លួនម្នាក់ទៀត។ គេបានផ្អើល តាមបណ្ដាញ​អាំងធើណែតរួចម្ដងហើយ ថាជននេះបានសម្លាប់កូនឆ្មារជាច្រើន ជាមួយនឹងថង់ផ្លាស្ទីក។ តែអ្វីដែលគួរអោយរន្ធត់ចិត្តនោះ ជននេះបានសម្លាប់ មិត្តភ័ក្រខ្លួនម្នាក់ ជាជនជាតិចិន ហើយបានកាត់ជាចំរៀកៗ សាកសពរបស់ជនរងគ្រោះ ផ្ញើរតាម​ប្រៃសណីយ៍ ទៅអោយគណបក្សនយោបាយ និងវិទ្យាល័យក្នុងប្រទេសកាណាដា។ ជនសង្ស័យ ថែមទាំងបានថតជាវីដេអូ នូវរាល់សកម្មភាពរបស់ខ្លួន ហើយដាក់ចែកផ្សាយវីដេអូនេះ នៅលើបណ្ដាញអាំងធើណែតថែមទៀត។ តារាភាពយន្ដ បានរត់គេចចេញពីប្រទេសកាណាដា ហើយបានចូលមករស់នៅ ក្នុងប្រទេសបារាំងមួយរយះ មុននឹងធ្វើដំណើរ ទៅកាន់​ទីក្រុងប៊េរឡាំងប្រទេសអាឡឺម៉ង់ ហើយត្រូវបាននគរបាលនៅទីនោះ ចាប់ខ្លួននៅថ្ងៃទី៤មិថុនា។ បន្ទាប់មក អាជ្ញាធរ​បាន​សម្រេច ចាប់បញ្ជូនខ្លួន លុកា ទៅកាន់ប្រទេសកាណាដាវិញ។ សូមអានអត្ថបទរបស់មនោរម្យព័ងអាំងហ្វូ នៅពេល​ហេតុការណ៍នេះ បានកើតឡើងនាពេលនោះ។

- ពិតជាមានបញ្ហាហើយ ព្រោះ«លិង្គបានរួញតូច»។ ការសិក្សាស្រាវជ្រាវមួយ ដ៏គួរអោយជឿជាក់បាន របស់សកល​វិទ្យាល័យវេជ្ជសាស្ត្រ នៃទីក្រុង ប៉ាឌូ (Padoue) ប្រទេសអ៊ីតាលី បានលើកបង្ហាញពីការពិតមួយ ដែលនឹងធ្វើអោយបុរសៗ ក្នុងលោក «ភ័យបុកពោះ» ព្រោះនៅឆ្នាំ២០១២នេះ ប្រដាប់ភេទបុរស (លិង្គ) បានរួមតូចជាទូទៅ ៨មីលីម៉ែត្រ បើប្រៀប​ទៅនឹងពាក់កណ្ដាលសតវត្សទី២០។ កំហុសធំបំផុត ត្រូវបានគេពន្យល់ថា មកពីកម្រិតជាតិពុល និងភាពធាត់ចុកខ្លាញ់ ដែលមានឥទ្ធិពលខ្លាំងទៅលើ ជាតិបម្រែបម្រូលរាងកាយ នៃជនវ័យជំទង់។ លទ្ធផលនៃការស្រាវជ្រាវនេះ ក៏បាន​ប្រាប់​ផងដែរ ពីការរីកវែងជាងមុន នូវអវយវះផ្សេងៗទៀត។ ដូច្នេះបើគេនិយាយមក អោយស្រួលយល់ មនុស្សប្រុសសម័យនេះ មានដៃជើងវែងៗ និងមានលិង្គតូច។ មើលទៅ បែបមិនស្រួលហើយ លោកប្រុស !

- ហ្វេលីស ប៊ូមហ្គាតន័រ (Félix Baumgartner) ហោះពីលំហអវកាស។ បុរសជនជាតិអូទ្រីសមួយនេះ បានសម្រេច​បាននូវឯកទគ្គកម្មពិភពលោក ក្នុងការលោតបង្ហោះខ្លួន ទៅក្នុងអាកាសបានខ្ពស់ជាងគេ។ នៅថ្ងៃទី១៥តុលាកន្លងទៅ គាត់បានព្រលែងខ្លួនពីលើយន្ដមួយ ដែលហោះទៅដល់កំពស់ខ្ពស់ជាង ៣៦ ០០០ម៉ែត្រ ហួសកំរិតទំនាញផែនដី ជាមួយ​នឹងសម្លៀកបំពាក់អវកាសរបស់គាត់។ គាត់បានមកជាន់ជើង ដល់ផែនដីវិញ បន្ទាប់ពីការទម្លាក់ខ្លួន ដែលមានល្បឿន​លឿន និងប្រើរយះពេល ប្រមាណជាជាង ៤នាទី។

- «អវសាននៃពិភពលោក» មិនមានពិតនោះទេ។ តែអ្នកណាដែលបានពង្រីកបន្ថែម នូវជំនឿដែលចេញ​ពីវប្បធម៌​នៃជនជាតិម៉ាយ៉ានេះ? បើនិយាយទៅ ប្រហែលនៅឆ្នាំ២០០៩ នៅពេលដែលខ្សែរភាពយន្ដ ហូលិវូដ ចេញបញ្ចាំងរឿង «២០១២» នរណាៗក៏ចាប់ផ្ដើមជឿតាមដែរ ពីព្រឹត្តិការណ៍ ដែលនឹងអាចបង្កើតអោយមាន នូវ«អវសាននៃពិភពលោក» ត្រូវចំថ្ងៃទី២១ ខែធ្នូ ឆ្នាំ២០១២កន្លងទៅថ្មីៗ។ ប្រព័ន្ធផ្សព្វផ្សាយនៅក្នុងពិភពលោក ក៏បាននិយាយបំពងបន្ថែមទៀត ពីព្រឹត្តិការណ៍នេះ ជាមួយនឹងបទយកការណ៍ និងខ្លះទៀតផលិតជាភាពយន្តឯកសារ ដែលលើកនិយាយ ពីប្រភព​យ៉ាង​«ពិតជាក់ស្ដែង» មកបញ្ជាក់ផង។ តែដល់ពេល ថ្ងៃដែល«អវសាននៃពិភពលោក»បានមកដល់ សូម្បីតែខ្យល់ព្យុះ​អោយ​រង្គើទឹកកែវ ក៏មិនមានផង ! សូមអានអត្ថបទ របស់មនោរម្យព័ងអាំងហ្វូ ដែលលើកពីបញ្ហានេះ មកសរសេរជូន​លោកអ្នក​នៅថ្ងៃនោះ។

- វិបត្តិប្រធានបក្សនយោបាយ ក្នុងប្រទេសបារាំង កើតមាននៅក្រោយពេល ការបោះឆ្នោតក្នុងគណបក្ស បានចេញ​ផ្សាយលទ្ធផល។ បើទោះជា«អវសាននៃពិភពលោក» មិនលេចចេញជារូបរាងពិត តែ«ជម្លោះនៃប្រធានបក្ស អ៊ុយអឹមប៉េ (UMP)» មានលក្ខណៈស្រួចស្រាវជាង និងបានធ្វើអោយនរណាៗ ក៏មានការភ្ញាក់ផ្អើលដែរ។ នៅថ្ងៃទី១៨វិច្ឆិការ សមាជិក​គណបក្សទាំងអស់ បានត្រូវគេអញ្ជើញអោយទៅបោះឆ្នោត ដើម្បីជ្រើសរើសប្រធានគណបក្ស។ តែបេក្ខជនម្នាក់ ពីក្នុង​ចំណោមបេក្ខជនឈរឈ្មោះ គឺលោក ហ្សង់ ហ្វ្រង់ស៊័រ កូប៉េ (Jean-François Copé) បានប្រកាសជ័យជំនះមុន  ខណៈការ​បោះឆ្នោតនៅតាមមណ្ឌលខ្លះ នៅមិនទាន់ចប់សព្វគ្រប់ផង។ ដើម្បីកុំអោយចាញ់ចិត្ត បេក្ខជនប្រជែង លោក ហ្រ្វង់ស៊័រ ហ្វីយ៉ុង (François Fillon) ក៏បានប្រកាសលទ្ធផល ពីជ័យជំនះរបស់ខ្លួនដែរ។ ជាការប្រយុទ្ធដណ្ដើមកៅអីមេបក្ស ដែល​បានអូសបន្លាយយ៉ាងយូរ រហូតមានការបង្កើត ក្រុមមួយបែកពីបក្សរបស់ខ្លួនក្នុងរដ្ឋសភា និងមានការប្រើប្រាស់​ចម្រៀង​នយោបាយឆ្លើយឆ្លងគ្នា ទៅវិញទៅមក យ៉ាងជក់ចិត្តដឹតអារម្មណ៍ជាទីបំផុត។ មកដល់ថ្ងៃនេះ គូរបដិបក្ខទាំងសងខាង បានយល់ព្រមធ្វើការបោះឆ្នោតឡើងវិញ នៅឆ្នាំ២០១៣ខាងមុខ។ តែដំណើររឿងនេះ ពិតជានឹងមិនចប់ ដោយងាយ​ស្រួលនោះឡើយ ហើយលោកអ្នកនឹងយល់បន្ថែម ពី«ជម្លោះបារាំងគ្រូខ្មែរ» ដោយចុចអានអត្ថបទនៅទីនេះ។

- តើសត្វចម្លែកនៅជាប់នឹងទន្លេ ខាងកើត (East River) នៃទីក្រុងញ៉ូយក ជាអ្វីអោយប្រាកដ? គេបានសង្ស័យរវាង សត្វជ្រូក កណ្ដុរធំ និងសត្វចម្លែកដែលចេះបែកភាគ។ សាកសពរបស់សត្វ ដែលគេមិនស្គាល់អត្តសញ្ញាណនេះ ត្រូវ​បានរកឃើញនៅមាត់ច្រាំងនៃទន្លេខាងកើត កាលពីខែកក្កដាកន្លងទៅ ហើយបានធ្វើអោយ លេចចេញនូវ​សេចក្ដី​សន្និដ្ឋានជាច្រើន ដើម្បីរកអោយឃើញថា តើសត្វចម្លែកដ៏ធំនេះ ស្ថិតនៅក្នុងប្រភេទ«សត្វអ្វី»? តាមការស្រាវជ្រាវ និង​ការអង្កេតរបស់អ្នកជំនាញ គេបាននិយាយថា វាជាសត្វឆ្កែ ...។ អ្នកអាចមើលរូបបន្ថែមទៀត ដោយចុចនៅទីនេះ។

- ព្រឹត្តិការណ៍ខឹងសម្បារ របស់បណ្ដាជនមូស្លីម ប្រឆាំងនឹងភាពយន្តអាមេរិកដ៏អាក្រក់មួយ។ ព្រឹត្តិការណ៍ដ៏អភ័ព មិនគួរអោយវាកើតមានទេ បើគេពិនិត្យអោយបានដឹតដល់ ទៅលើខ្សែរភាពយន្ដមួយ ដែលមានលក្ខណៈបញ្ចេញ​មតិ​យោបល់ បែបកំប្លែង បានប្រើប្រាស់ថវិការដ៏តិចតួចជាទីបំផុត និងប្រើប្រាស់តួអង្គសមញ្ញធម្មតាៗនេះ។ តែសម្រាប់​បណ្ដាជនអ៊ីស្លាមវិញ គេចាត់ទុកថា ភាពយន្ត «ចរិកស្លូតបូតនៃមូស្លីម (Innocence of Muslims)»នេះ ថាបានប្រមាថ​ទៅដល់និមិត្តរូបដ៏សំខាន់ របស់ពួកគេ។ ពួកគេបានបញ្ចេញកំហឹង យ៉ាងហឹង្សា ដោយបានដើរដុតកម្ទេច និងបំផ្លាញ​នូវ​រាល់ផលប្រយោជន៍ របស់បស្ចឹមលោក ជាពិសេសរបស់សហរដ្ឋអាមេរិក។  សឹងតែពេញមួយខែកញ្ញាកន្លងទៅ កូដកម្ម​បានសម្លាប់ មន្ត្រីការទូតអាមេរិកាំងជាច្រើននាក់ ក្នុងនោះមានឯកអគ្គរដ្ឋទូតម្នាក់ផង ប្រចាំនៅប្រទេសលីប៊ី។

- ជ្រួលច្របល់នឹង ចង្វាក់រាំរបស់អ្នកចម្រៀងកូរ៉េខាងត្បូង ជាមួយនឹងបទចម្រៀង «Gangnam style»។ តើនរណា​នឹកស្មានដល់ ថាចង្វាក់រាំចម្លែកៗ របស់អ្នកចម្រៀងព្សាយ (Psy) ច្រៀងនិងរាំ យកត្រាប់តាមរបៀបជិះសេះ និងតាម​ជីវភាពរបស់សង្កាត់អ្នកធូធារមួយ ក្នុងទីក្រុងសេអ៊ូល ប្រទេសកូរ៉េខាងត្បូង បានក្លាយជាជោគជ័យប្រចាំឆ្នាំយ៉ាងសម្បើម និងរីកសុសសាយពាសពេញ ទាំងពិភពលោកនោះ? ក្នុងពេលនេះ ចម្រៀងនេះ នៅតែជាទីពេញនិយមនៅឡើយ សម្រាប់​មនុស្សទូទៅ ដែលចង់ច្រៀង និងរាំតាម។ តែមនុស្សជាច្រើនផ្សេងទៀត ក៏នៅតែយកចម្រៀងនេះ ទៅធ្វើត្រាប់តាម និងខ្លះទៀត បានយកទៅបន្ថែមបន្ថយ ធ្វើសារជាថ្មី ទៅតាមចំណងចំណូលចិត្តរបស់គេរៀងៗខ្លួន។ មកដល់ម៉ោងនេះ នៅលើគេហទំព័រចែកផ្សាយវីដេអូ យូធូប ចម្រៀងដ៏ល្បីតែមួយគត់លើលោក បានទទួលការចុចចូលទៅមើល ប្រមាណ​ជាជាង «១ ០៥៨ ៧៣២ ៧៤០» ដងហើយ៕

-------------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី២៦ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ