ស្ដេចខ្មែរធ្លាប់ប្រទាន«មេដាយសហមេត្រី» ឲ្យមន្ត្រីយួន២១នាក់រឿងព្រំដែន
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី២០ ធ្នូ ២០១៤
- កែប្រែចុងក្រោយ: December 21, 2014
- ប្រធានបទ: កិត្តិយស
- អត្ថបទ: មានបញ្ហា?
- មតិ-យោបល់
-
ការផ្ដល់មេដាយឲ្យមន្ត្រីជាន់ខ្ពស់ផងគ្នា ទៅវិញទៅមក បានបង្ហាញពីសភាពចាក់ទឹកមិនលេច នៃសម្ព័ន្ធមេត្រីភាព រវាងប្រទេសបងប្អូនម្មឺនឆ្នាំទាំងពីរ កម្ពុជា-វៀតណាម។ បើមន្ត្រីជាន់ខ្ពស់កម្ពុជាបីរូប ក្នុងនោះមានពីរនាក់ជាប្អូនស្រីបង្កើត របស់នាយករដ្ឋមន្ត្រីលោក ហ៊ុន សែន បានទទួលមេដាយ«ស្នេហាជាតិ»ជាកិត្តិយស ពីប្រទេសវៀតណាម កាលពីពីរសប្ដាហ៍មុននោះ មន្ត្រីជាន់ខ្ពស់របស់ប្រទេសកុម្មុយនីសវៀតណាម ក៏ធ្លាប់ទទួលមេដាយ«សហមេត្រី»ជាច្រើនថ្នាក់ ពីព្រះមហាក្សត្រកម្ពុជាដែរ។
នៅក្នុងព្រះរាជក្រិត្យមួយ ដែលចេញផ្សាយនៅក្នុងសៀវភៅរាជកិច្ច តាំងពីឆ្នាំ២០០៥ បានបង្ហាញថា មន្ត្រីជាន់ខ្ពស់ និងថ្នាក់មធ្យមវៀតណាមចំនួន២១រូប ត្រូវបានព្រះមហាក្សត្រកម្ពុជា ព្រះបាទ ព្រះនរោត្ដម សីហមុនី ទ្រង់ប្រោសប្រទាន ផ្ដល់មេដាយ«សហមេត្រី»ជូន។ ការផ្ដល់មេដាយសហមេត្រីនេះ បានធ្វើឡើង ព្រោះមន្ត្រីវៀតណាមទាំងនោះ បានធ្វើកិច្ចសហប្រតិបត្តិការ និងការអភិវឌ្ឍន៍ខេត្តជាប់ព្រំដែន កម្ពុជា-វៀតណាម បានល្អប្រសើរ។
ព្រះរាជក្រិត្យនេះ បានផ្ដល់មេដាយសហមេត្រី ថ្នាក់«មហាសេរីវឌ្ឍន៍» ជូនលោក ង្វៀន តឹនយុង ឧបនាយករដ្ឋមន្ត្រីអចិន្ត្រៃយ៍ ថ្នាក់«ធិបឌិន» ជូនមន្ត្រីជាន់ខ្ពស់វៀតណាមផ្សេងទៀត ចំនួន១២រូប និងថ្នាក់«សេនា» ជូនមន្ត្រីថ្នាក់មធ្យមវៀតណាមចំនួន៨រូប។ រាជក្រិត្យនេះ ក៏បានត្រាស់បង្គាប់ដែរឲ្យលោក ហ៊ុន សែន ជានាយករដ្ឋមន្ត្រី យកទៅអនុវត្តន៍ឲ្យបានសម្រេច។
មេដាយ«សហមេត្រី» ដែលបានផ្ដល់ជូនមន្ត្រីវៀតណាមទាំង២១ បានធ្វើឡើងនៅមុនសន្ធិសញ្ញាបំពេញបន្ថែម ឆ្នាំ២០០៥ ដ៏ចម្រូងចម្រាស ដែលត្រូវបានចុះហត្ថលេខាព្រមព្រៀង រវាងប្រទេសទាំងពីរ នៅថ្ងៃទី ១០ ខែ តុលា ឆ្នាំ ២០០៥ រួចត្រូវបានរដ្ឋសភាកម្ពុជាអនុម័តនៅថ្ងៃទី ១១ ខែ វិច្ឆិកា ឆ្នាំ ២០០៥ នាសម័យប្រជុំរដ្ឋសភា លើកទី៣ នីតិកាលទី ៣៕
សូមភ្ជាប់មកជាមួយនូវ រាជក្រិត្យទាំងស្រុងដូចតទៅ៖
