បន្តឆែកឆេរផ្ទះ ថោង សារ៉ាត់ លើកទីបី ឃើញម៉ូតូជិះបិទគូថ?
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៨ ធ្នូ ២០១៤
- កែប្រែចុងក្រោយ: December 19, 2014
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
ការឆែកឆេរផ្ទះលោក ថោង សារ៉ាត់ ជាថ្មី ជាមួយនឹងការរុករកភស្តុតាងនានា ដែលអាចមានការពាក់ព័ន្ធ ក្នុងសំណុំរឿង«ឃាតកម្ម»លើលោក អ៊ឹង ម៉េងជឺ នោះ ត្រូវបានដឹកនាំដោយលោក អាំង មារតី ប្រធានសាលាដំបូងរាជធានីភ្នំពេញ រួមជាមួយតំណាងអយ្យការលោក លី សុខលេង (ចៅក្រមស៊ើបសួរ) ដោយមានការសហការ ជាមួយនឹងកម្លាំងនគរបាលព្រហ្មទណ្ឌរាជធានីភ្នំពេញ។ ការឆែកឆេរបានធ្វើឡើង នាព្រឹកថ្ងៃទី១៨ ខែធ្នូ ឆ្នាំ២០១៤នេះ ក្នុងគេហដ្ឋានរបស់លោក ថោង សារ៉ាត់ នាសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ក្នុងប្រតិបត្តិការលើកទីបីនេះ ទស្សនាវដ្តីមនោរម្យ.អាំងហ្វូនៅមិនទាន់មានការបញ្ចាក់ណាមួយច្បាស់លាស់ ពីក្រុមប្រតិបត្តិការនៃការរុករកភស្តុតាងថ្មីនោះដែរ។ ទាំងប្រធានតុលាការ ទាំងតំណាងអយ្យការ សុទ្ធតែមិនអាចទំនាក់ទំនងសុំការអត្ថាធិបាយបាន។ តែបើតាមមន្រ្តី ដែលបានចូលរួមគ្រាន់តែបញ្ជាក់ថា បានប្រមូលភស្តុតាងមួយចំនួន ដែលក្រុមការងារដាក់ការសង្ស័យប៉ុណ្ណោះ នៅមិនទាន់មានអ្វីដែលកំណត់មុខសញ្ញាច្បាស់លាស់នៅឡើយ។ មន្ត្រីរូបនោះ បានបន្តថា តែបានសង្ស័យលើម៉ូតូមួយគ្រឿងថា ជាម៉ូតូដែលជិះសម្រាប់ធ្វើការបិទគូទ ពេលបាញ់សម្លាប់លោក អ៊ឹង ម៉េងជឺ កាលពីយប់ថ្ងៃទី២២ ខែវិច្ឆិកា ឆ្នាំ២០១៤នោះ។
ម៉ូតូបិទគូថដ៏ចម្លែក ចេះផុសខ្លួន...
មានការដាក់ចម្ងល់មួយទៅលើក្រុមសមត្ថកិច្ច ពីបណ្តាអ្នកលេងហ្វេសប៊ុកថា នេះជាការឆែកឆេរលើកទីបី ហេតុអ្វីទើបប្រទេះឃើញម៉ូតូដែលសង្ស័យថា «បិទគូថ»។ ចុះកាលពីលើកទីមួយ លើកទីពីរ ហេតុអ្វីក៏មិនឃើញ ឬមួយម៉ូតូនេះទើបតែយកមកដាក់ទេ? តើផ្ទះដែលឆែកឆែរនោះមានបាន«បិទ» ឬហាមប្រើប្រាស់ជាបណ្តោះអាសន្នទេ ក្នុងអំឡុងពេលធ្វើការស្រាវជ្រាវ និងអង្កេតនេះ? យ៉ាងណា ក្រុមអ្នកប្រើប្រាស់បណ្ដាញសង្គម នៅតែដាក់ការសង្ស័យទៅលើការងារបស់សមត្ថកិច្ច ថាហាក់បីដូចមានភាពលាក់លៀម និងមិនច្បាស់លាស់។ ប្រិយមិត្តម្នាក់ឈ្មោះ ជុំ វិសាល បានលើកឡើងថា៖ «តាមរយៈការស្រាវជ្រាវ ការអង្កេត ការប្រមូលភស្តុតាង សមត្ថកិច្ចពាក់ព័ន្ធ«មិន»ដែលបានបង្ហាញ ពីសកម្មភាពជាព័ត៌មាន ដល់អ្នកសារព័ត៌មាន ឲ្យបានច្បាស់លាស់នោះទេ ដូចជាក្រោយការប្រមូលភស្តុតាង នាពេលកន្លងមកជាដើម។»
សូមបញ្ជាក់ថា កាលពីថ្ងៃទី១៧ ខែធ្នូ កន្លងមកនេះ ប្រធាននាយកដ្ឋានកណ្ដាល នៃនគរបាលយុត្តិធម៌របស់ក្រសួងមហាផ្ទៃ លោក ម៉ក់ ជីតូ បានលើកឡើងថា ប៉ូលិសអាំងទែប៉ូល (Police Interpole) សមត្ថកិច្ចនៃបណ្តាប្រទេសជិតខាងរបស់កម្ពុជា ឯកភាព និងព្រមសហការ ដើម្បីស្វែងរកចាប់ខ្លួនលោក ថោង សារ៉ាត់ មកផ្តន្ទាទោសតាមច្បាប់។ លោកបានថ្លែងថា៖ «ប៉ូលិសអាំងទែប៉ូល និងសមត្ថកិច្ចនៃប្រទេសជិតខាងកម្ពុជា គេទទួលចាត់ការហើយ។ កាលណាគេបញ្ជូនមកយើង យើងនឹងចាត់ការហើយ។ ហើយគេដំណើរការ តាមសំណូមពររបស់យើង។»
កាលពីថ្ងៃទី១១ ខែធ្នូ សមត្ថកិច្ចកម្ពុជា បានបញ្ជូន«ដីកាបង្គាប់ឲ្យចាប់ខ្លួនលោក ថោង សារ៉ាត់» ទៅកាន់ប៉ូលីសអាំងទែប៉ូល (នគរបាលអន្តរជាតិ) មានមូលដ្ឋានក្នុងទីក្រុងលីយ៉ុង ប្រទេសបារាំង។ ការបញ្ជូនដីកានេះក្នុងគោលបំណងឲ្យនគរបាលអន្តរជាតិនេះ ចេញនិវេទន៍ក្រហម ធ្វើការផ្សព្វផ្សាយទៅដល់បណ្តាប្រទេស ដែលជាសមាជិកប៉ូលិសអន្តរជាតិទាំងអស់ ឲ្យស្វែងរកចាប់ខ្លួនលោក ថោង សារ៉ាត់។ នេះបើតាមការបញ្ជាក់របស់លោក ខៀវ សុភ័គ អ្នកនាំពាក្យក្រសួងមហាផ្ទៃ។ ឯលោក ម៉ក់ ជីតូ កាលពីថ្មីៗនេះ ក៏ធ្លាប់បានថ្លែងដែរថា ប៉ូលិសប្រទេសវៀតណាម បានឆ្លើយតបចំពោះការស្នើសុំកិច្ចសហការ ពីប៉ូលិសកម្ពុជាហើយ។
មកទល់ពេលនេះ តែមួយសប្តាហ៍ទៀតប៉ុណ្ណោះ ដែលជាខួបមួយខែ នៃការបាញ់សម្លាប់លោក អ៊ឹង ម៉េងជឺ នៅកណ្តាលរាជធានីភ្នំពេញ ប៉ុន្តែសួរថា ជនសង្ស័យលេខ១ ដែលសមត្ថកិច្ចដាក់បន្ទុកទៅលើលោក ថោង សារ៉ាត់ នោះ នៅមិនទាន់ដឹងច្បាស់នៅឡើយ ហើយក៏មិនដឹងថានៅទីណាដែរ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់បានធ្វើការអំពាវនាវដល់ប្រជាពលរដ្ឋ ពិសេសសាច់ញាតិ ឲ្យជួយសង្កេតមើល បើឃើញវត្តមានលោក ថោង សារ៉ាត់ ប្រញាប់រាយការណ៍ជាបន្ទាន់ មកមន្រ្តីអាជ្ញាធរមានសមត្ថកិច្ច។ លោក ខៀវ សុភ័គ បានលើកឡើងថា «ខ្ញុំសូមអំពាវនាវ ចំពោះបងប្អូនប្រជាពលរដ្ឋយើង ពិសេសសាច់ញាតិលោហិត ដែលធ្លាប់ស្គាល់លោកឧកញ៉ា ថោង សារ៉ាត់ ហ្នឹង សូមឲ្យផ្តល់ព័ត៌មានដល់សមត្ថកិច្ចយើងដើម្បីជាផលប្រយោជន៍រួមទាំងអស់គ្នា។ ពីព្រោះថា អ្នកដែលពាក់ព័ន្ធមានតែគាត់ហ្នឹងមួយទេ មិនពាក់ព័ន្ធដល់អ្នកណាផ្សេងក្រៅពីគាត់ឡើយ។»
អ្នកនាំពាក្យក្រសួងមហាផ្ទៃបានបន្ថែមថា នៅពេលចាប់ខ្លួនលោកឧកញ៉ា ថោង សារ៉ាត់ បាន នៅពេលនោះ ប៉ូលិសនឹងធ្វើសន្និសីទកាសែតជាសាធារណៈ ឲ្យសាធារណជនបានដឹងពីរឿងក្តីនេះ៕