ជនកាន់កាំបិតចាក់មនុស្សនៅអាមស្ទែដាម មានចេតនាភេរវនិយម
ជនសង្ស័យ ជាតិអាហ្វហ្គានីស្ដង់ អាយុ១៩ឆ្នាំ ដែលមានក្រដាសស្នាម ស្នាក់នៅបណ្ដោះអាសន្ន នៅក្នុងប្រទេសអាល្លឺម៉ង់ ត្រូវបានសាកសួរ ដោយក្រុមអ្នកស៊ើបអង្កេត ហូឡង់ នៅផ្ទាល់នឹងមន្ទីរពេទ្យ ដែលជននេះកំពុងសម្រាកព្យាបាយ មុខរបួសរបស់ខ្លួន បណ្ដាលមកពីការបង្ក្រាបរបស់នគរបាល។
នៅក្នុងសេចក្ដីប្រកាសព័ត៌មានមួយ របស់ក្រុមប្រឹក្សារាជធានី អាមស្ទែដាម បានឲ្យដឹងថា៖ «ការអះអាងដំបូងៗ របស់ជនសង្ស័យ បានបង្កចំណុចសង្ស័យ ពីចេតនាបែបភេរវនិយម»។
សេចក្ដីប្រកាសព័ត៌មានដដែល បានឲ្យដឹងទៀតថា តាមការស្នើសុំ របស់អាជ្ញាធរហូឡង់ នគរបាលអាល្លឺម៉ង់បានធ្វើការឆែកឆេរលំនៅដ្ឋាន របស់ជនសង្ស័យ (ដែលស្ថិតនៅក្នុងប្រទេសអាល្លឺម៉ង់) ហើយបានរកឃើញ អង្គផ្ទុកទិន្នន័យជាច្រើន។