យន្ដហោះ ដែលមានផ្ទុកមនុស្សចំនួន ២៩៥ នាក់ បានធ្លាក់នៅក្នុងតំបន់ ដូនិក (Donetsk) ភាគខាងកើត នៃប្រទេស​អ៊ុយក្រែន។ របាយការណ៍ដំបូង បានចោទប្រកាន់ប្រទេសរ៉ូស្សី ថាបានបាញ់យន្ដហោះនេះច្រឡំ។

យន្ដហោះប៊ូអ៊ីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ។ (រូបថតក្រុមហ៊ុន)

ធ្លាក់យន្ដហោះ - គ្រោះជួនពីលើគ្រោះ។ បន្ទាប់ពីយន្ដហោះបាត់ខ្លួន MH370 នៅមិនទាន់រកឃើញ​ដាន​របស់ខ្លួន​នៅ​ឡើយ នៅរសៀលថ្ងៃទី១៧ ខែកក្កដានេះ ហេតុការណ៍ដ៏អាក្រក់មួយទៀត បានកើតឡើង។

យន្ដហោះរបស់ក្រុមហ៊ុនម៉ាឡេស៊ីអ៊ែឡាញ ដែលហោះចេញពីរាជធានី អាមស្ទែដាម នៃប្រទេសហូឡង់ ឆ្ពោះទៅ​កាន់រដ្ឋធានីកូឡាឡំពួរ នៃប្រទេសម៉ាឡេស៊ី បានបាត់ពីកញ្ចក់រ៉ាដា នៅកំពស់១០គីឡូម៉ែត្រពីដី វេលាម៉ោង ៤និង​១៦នាទីរសៀល (ម៉ោងនៅនឹងកន្លែង) ហើយបានធ្លាក់​នៅក្បែរនឹងទីក្រុង ចាខតាស (Chakhtarsk) ក្នុងតំបន់ ដូនិក ភាគខាងកើតនៃប្រទេសអ៊ុយក្រែន។ នេះបើតាមការ​ប្រកាស​ឲ្យដឹង នៃទីភ្នាក់ងាសារព័ត៌មានប្រចាំតំបន់ នៅ​រសៀល​ថ្ងៃទី១៧ ខែកក្កដានេះ ដោយបញ្ជាក់ថា យន្ដហោះ​ទំនងជាបានកាំជ្រួញមួយប្រភេទ បាញ់ទម្លាក់។

ទីភ្នាក់ងារសារព័ត៌មានដដែល បានលើកយកប្រភពដែលស្និតនឹងកងកម្លាំងសន្តិសុខ របស់ប្រទេសអ៊ុយក្រែន មក​បញ្ជាក់ថា ក្រុមអ្នកជួយសង្គ្រោះរបស់ប្រទេសនេះ ត្រូវបានបញ្ជូនទៅដល់កន្លែងភ្លាមៗ តែអាចនឹងជួបការលំបាក ដោយ​សារតែនៅក្នុងតំបន់នោះមួយភាគធំ ត្រូវបានគ្រប់គ្រងដោយ ក្រុមអ្នកបំបែកទឹកដី ដែលស្និតនឹងប្រទេសរ៉ុស្សី។

ក្នុងរបាយការណ៍ដំបូង បានឲ្យដឹងថា យន្ដហោះនេះទំនងជា ប្រភេទប៊ូអ៊ីង ៧៧៧ របស់ក្រុមហ៊ុន ម៉ាឡេស៊ី អ៊ែឡាញ ដែលផ្ទុកអ្នកដំណើរ២៨០នាក់ និងអ្នកបម្រើការលើយន្ដហោះ ១៥នាក់។ ក្រសួងមហាផ្ទៃរបស់ប្រទេសអ៊ុយក្រែន បាននិយាយថា យន្ដហោះត្រូវបានបាញ់ឲ្យធ្លាក់ ដោយច្រឡំ ពីសំណាក់កងទ័ពរ៉ូស្សី ប៉ុន្តែការចោទប្រកាន់នេះ ត្រូវ​បាន​ច្រាន​ចោល​ភ្លាមៗ ដោយ​ប្រទេសរ៉ូស្សី។

វីដេអូខាងក្រោម ត្រូវបានអ្នករស់នៅតំបន់នោះ ថតបានពីចំងាយ៖