ការប្រឈមមុខគ្នារវាងកងកម្លាំងនគរបាល និងបាតុករអ្នកប្រឆាំងនឹងអត្ថបទច្បាប់ «អាពាហ៍ពិពាហ៍នៃអ្នកមានភេទ​ដូចគ្នា» បានផ្ទុះឡើងនៅជិតរដ្ឋសភាជាតិ វេលាពាក់កណ្ដាលអាធ្រាត ថ្ងៃទី២៣ខែមេសា បន្ទាប់ពីច្បាប់នេះត្រវបានអនុម័ត្រ ដោយ​សម្លេងភាគច្រើននៃអ្នកតំណាងរាស្ត្រ កាលពីវេលាម៉ោងប្រមាណជា៥រសៀលនោះមក។

ក្រុមអ្នកប្រឆាំងនឹងអត្ថបទច្បាប់ ក្នុងពេលរាត្រីថ្ងៃទី២៣ខែមេសា កំពុងប្រឈមជាមួយនឹងកងកម្លាំងនគរបាល។

ពួកអ្នកប្រឆាំងនឹងអត្ថបទច្បាប់ទាំងនោះ បានចោលសម្បកដប កាំជ្រួចភ្លើងផ្សែង និងវត្ថុរឹងផ្សេងទៀត ទៅលើកម្លាំង​នគរបាល តែពួកគេក៏រងនូវការវាយបកវិញ ពីសំណាក់កងម្លាំងប្រឆាំងកុបករ ដោយបាញ់ឧស្ម័នបង្ហូរទឹកភ្នែក។ ព្រឹត្តិការណ៍នេះ បានកើត​ឡើង​នៅ​ទី​លានអាំងវាលីដ (Invalides) ស្ថិតនៅមិនឆ្ងាយប៉ុន្មាន ពីរដ្ឋសភាជាតិ ហើយបាន បណ្ដាលឲ្យបាតុករ​យ៉ាងតិច​១២នាក់ ត្រូវបានឃាត់ខ្លួន។ នៅក្នុងព្រឹត្តិការណ៍ដដែល នៅខេត្តលីយ៉ុង (Lyon) ភាគខាង ត្បូងនៃប្រទេសបារាំង ការឃាត់ខ្លួន មាន​រហូត​ដល់ទៅជាង៤០នាក់។

អត្ថបទច្បាប់ «អាពាហ៍ពិពាហ៍នៃអ្នកមានភេទដូចគ្នា»ត្រូវបានអនុម័ត្រ ដោយសម្លេងភាគច្រើន៣៣១ ទល់នឹង២២៥ នៅក្នុងរដ្ឋសភា ដែលមានសុទ្ធសឹងជាអ្នកតំណាងរាស្ត្រ មកពីគណបក្សសង្គមនិយម។ នៅមិនឆ្ងាយប៉ុន្មានពី​សាលា​ក្រុងប៉ារីស ក្រុមអ្នកគាំទ្រអត្ថបទ​ច្បាប់​នេះ ក៏បានជួបជុំគ្នាប្រារព្ធការអបអរសាទរ នីងការអនុម័ត្រនេះដែរ។

កាលពីពេលរសៀល នៅក្នុងរដ្ឋសភា រដ្ឋមន្ត្រីក្រសួងយុត្តិធម៌ លោកស្រី គ្រឹស្ទីយ៉ាន តូប៊ីរ៉ា (Christiane Taubira) បាន​អះអាងថា អាពាហ៍ពិពាហ៍ដំបូងគេ នៃក្រុមអ្នកស្រឡាញ់ភេទដូចគ្នា ក្នុងប្រទេសបារាំង នឹងអាចមាន​រូបរាងចាប់​តាំង​ពី​ខែមិថុនាខាងមុខ។ លោកស្រីបានបន្តថា «យើងគិតថា អាពាហ៍ពិពាហ៍ដំបូងទាំងនោះ មានភាពល្អពិសេសណាស់។ (...) អ្នកដែលតវ៉ានៅថ្ងៃនេះ នឹងពិតជាត្រូវត្រឡប់ទៅជាយល់ ដោយការរីករាយសប្បាយចិត្ត នឹងសុភមង្គលនៃគូរស្រករ​ទាំងនោះ។»

នៅពេលដែលលោកហ្វ្រង់ស័រហូឡង់ (François Holande) ប្រធានាធិបតីបារាំងសព្វថ្ងៃ បានសន្យាថានឹងប្រគល់ភាព​ស្របច្បាប់ ទៅឲ្យ​អាពាហ៍ពិពាហ៍នៃអ្នកមានភេទដូចគ្នា ក្នុងពេលឃាសនាបោះឆ្នោតនោះ ប្រធានបទនេះ មិនសូវ​ជា​មានការ​ចាប់​អារម្មណ៍​តវ៉ាប៉ុន្មាននោះឡើយ។ ប៉ុន្តែប្រធានបទដ៏ក្ដៅគគុក បានផ្លាស់ប្ដូររូបភាពរបស់វា​ក្នុងពេល​បច្ចុប្បន្ន​នេះ ដោយសារ​ស្ថានភាព​សេដ្ឋកិច្ច​របស់ប្រទេស មិនបានជឿនលឿនទៅមុខ ចំនួននៃអ្នកគ្មានការងារធ្វើបានកើនឡើង ដែលសុទ្ធសឹង​ជាបញ្ហបង្ក​អោយ​ប្រជាប្រិយភាព របស់ប្រធានាធិបតីរូបនេះស្រុតធ្លាក់ចុះយ៉ាងខ្លាំង។

ក្រុមអ្នកអភិរក្សនិយម ដែលបានខកចិត្តដោយការចាញ់ឆ្នោ តរបស់អតីតប្រធានាធិបតី នីកូឡា ស្សាកូហ្សី (Nicolas Sarkozy) បានប្រើប្រាស់ឱកាសនៃចលនាប្រឆាំង ទល់នឹងអាពាហ៍ពិពាហ៍នៃអ្នកមានភេទដូចគ្នានេះ ជាបុព្វហេតុ​ចម្បងមួយ និងដើម្បីបម្រួបបម្រួមចលនានយោបាយរបស់ពួកគេ។ ពួកគេនៅតែរក្សាក្ដីសង្ឃឹម ថាប្រធានបទ នឹងត្រូវ​នៅបន្តជជែកគ្នាតទៅទៀត ដោយបានដាក់ពាក្យបណ្ដឹងតវ៉ាទៅកាន់ ក្រុមប្រឹក្សាធម្មនុញ្ញបារាំង។

ការអនុម័ត្រច្បាប់កាលពីម្សិលម៉ិញ បានធ្វើឲ្យបារាំងក្លាយជាប្រទេសទី១៤ ក្នុងពិភពលោក ដែលបានអនុញ្ញាតឲ្យមាន​អាពាហ៍ពិពាហ៍«ស្របច្បាប់» នៃអ្នកមានភេទដូចគ្នា។ ប្រទេសនេះបានអនុញ្ញាតឲ្យមាន ការរួមសម្ព័ន្ធភាពស្នេហាស៊ីវិល ដែលមិនមានអាពាហ៍ពិពាហ៍ កាលពីឆ្នាំ១៩៩៩កន្លងមក។ ប៉ុន្តែសម្ព័ន្ធភាពស្នេហាស៊ីវិលនេះ មិនបានអនុញ្ញាតឲ្យ សាមី​ខ្លួននៅក្នុងសម្ព័ន្ធភាពនៃភេទដូចគ្នា មានសិទ្ធអាចទទួលកូនមកចិញ្ចឹមនោះបានឡើយ។

ការស្ទង់មតិថ្មីៗនេះ បានបង្ហាញថា ប្រជាជនបារាំងច្រើនជាងពាក់កណ្ដាល បានជម្ទាស់នឹងការសុំកូនមកចិញ្ចឹមដោយ គូរស្រករដែលមានភេទដូចគ្នា៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៣ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ