ដំណើរដើមទងលំអិត ក្នុងជំហានដំបូង នៃអំពើភេវរកម្ម កាលពីថ្ងៃសុក្រ ទី២៦ ខែមិថុនា ត្រូវបានរកឃើញ និង​ត្រូវបានយកមកពន្យល់ នៅក្នុងសន្និសីទសារព័ត៌មានមួយ ដោយរដ្ឋអាជ្ញានៃសាធារណរដ្ឋបារាំង ប្រចាំ​រដ្ឋធានី​ ប៉ារីស លោក ហ្វ្រង់ស៊័រ ម៉ូឡាំង (François Molins)។ ជាភាពលំអិត ប្រកបដោយភាពតក់ស្លុត បន្ទាប់ពីគេ​បាន​ដឹង ថាជនសង្ស័យឈ្មោះ យ៉ាស៊ីន សាលី (Yassine Salhi) សមាជិកម្នាក់ របស់អង្គការរដ្ឋអ៊ីស្លាម បានកាត់​ក្បាល បុរសចំណាស់ម្នាក់ ដែលជាថៅកែរបស់ខ្លួន នៅក្នុងទឹកដីបារាំង។

ដោយមានជំនួយការ ពីកាម៉េរ៉ាសុវត្ថិភាពចំនួនពីរ របស់រោងចក្រនោះផង លោករដ្ឋអាជ្ញាបារាំង បានប្រកាស​ពីដំណើរដើមទងទាំងស្រុង នៃអំពើភេវរកម្មនេះដូចតទៅ៖

• ម៉ោង៩ និង២៨នាទី រថយន្ដធុនតូច សម្រាប់ធ្វើការមួយ បានចូលមកក្បែររោងចក្រ ដូចជាធម្មតា ដើម្បី​មកទទួលដឹង​ធុងហ្គាស។ ជនសង្ស័យបានចុចកណ្ដឹង ហើយទ្វារោងចក្រក៏បានបើកឡើង ដោយទំនង​ជាអ្នក​ចាំបើកទ្វា បាន​ស្គាល់អ្នកចុចកណ្ដឹង ដែលធ្លាប់ចុះឡើងរោងចក្រ ជារឿយៗ។
• រថយន្ដបានបើក តាមបណ្ដាយជញ្ជាំង ចូលទៅក្នុងរោងចក្រ។ នៅម៉ោង៩ និង៣៥នាទី ក្នុងរូបភាព នៃ​កាម៉េរ៉ា​សុវត្ថិភាព គេឃើញរថយន្ដតូចនោះ បានបង្កើនល្បឿន និងបើកចូលទៅបុកកន្លែងមួយ ដែល​មានផ្ទុកសុទ្ធតែធុងហ្គាស។
• ម៉ោង៩ និង៣៦នាទី ការផ្ទុះដ៏ខ្លាំងមួយ បានលាន់ឮឡើង។
• ម៉ោង៩ និង៤១នាទី ក្រុមពន្លត់អគ្គិភ័យបានមកដល់ទីកន្លែង។
• ម៉ោង១០ ក្រុមអ្នកពន្លត់អគ្គិភ័យ បានឃើញជនសង្ស័យ កំពុងធ្វើសកម្មភាពក្បែរធុងហ្គាស នៅនឹង​កន្លែង​ផ្ទុកធុង​ហ្គាស ហើយពួកគេបានបង្ក្រាបជនសង្ស័យនេះ នៅនឹងកន្លែង។

ប៉ុន្តែនៅមុខរថយន្ដតូច ដែលជនសង្ស័យបើកទៅចតចោល និង​ដែល​កាម៉េរ៉ាសុវត្ថិភាព ចាប់រូបភាពមិន​បាន​នោះ អ្នកស៊ើបអង្កេតបានរកឃើញ សាកសពគ្មានក្បាល របស់​ជនរង​គ្រោះ។ នៅក្បែរសាកសពនោះ កាំបិត​មួយត្រូវបានរកឃើញ និងនៅឆ្ងាយពីនោះ  ក្បាលរបស់​ជន​រងគ្រោះ ត្រូវ​បានរកឃើញដោត​នៅលើចំរឹង​របង​រោងចក្រ អមដោយទង់ខ្មៅចំនួនពីរ របស់អង្គការរដ្ឋអ៊ីស្លាម។

លោករដ្ឋអាជ្ញា បានថ្លែងអះអាងថា៖ «មិនមានភស្ដុតាងណាមួយ បង្ហាញថាជនសង្ស័យមានគូកន នៅក្នុង​រថយន្ដ​តូចនោះឡើយ។ ជននេះទំនងជា ធ្វើសកម្មភាពតែឯងប៉ុណ្ណោះ។»

ជនរងគ្រោះដែលរកឃើញស្លាប់ ដាច់ក្បាលនេះ ជាប្រធានក្រុមហ៊ុនដឹកជញ្ជូនទំនិញមួយ ដែលជនសង្ស័យ​បានធ្វើការជាមួយ ក្នុងនាមជាអ្នកបើកបរ។ បើតាមលោករដ្ឋអាជ្ញា បានបញ្ជាក់ទៀតថា ជនសង្ស័យបាន​រៀបការ តាំងពីជាង១០ឆ្នាំមកហើយ និងមានកូន៣នាក់។ ជនសង្ស័យត្រូវបានអាជ្ញាធរបារាំង ស្គាល់នៅ​រវាង​ឆ្នាំ២០០៦ និងឆ្នាំ២០០៨ និងបន្ទាប់មកទៀត រវាងពីឆ្នាំ២០១១ និងឆ្នាំ២០១៤ ពីទំនាក់ទំនងរបស់ជននេះ ជា​មួយចលនាអ៊ីស្លាមនិយមតឹងមួយ នៅទីក្រុង លីយ៉ុង។

រហូតមកទល់យប់នេះ អាជ្ញាធរបានចាប់ឃាត់ខ្លួន ភរិយា និងប្អូនស្រីរបស់ជនសង្ស័យ បន្ថែមទៀត ដើម្បីទុក​ធ្វើការ​សាកសួរ និងស៊ើបអង្កេត៕