ទស្សនាវដ្ដីមនោរម្យ.អាំងហ្វូ បានធ្វើរបាយការណ៍ ជូនជាដំណឹងភ្លាមៗកាលពីម្សិលម៉ិញ ថាជនរងគ្រោះមាន​យ៉ាងហោច ២៧នាក់។ ប៉ុន្តែនៅថ្ងៃនេះ តុល្យភាពនៃជនរងគ្រោះ នៅតែមានតួលេខកើនឡើង ដ៏គួរឲ្យតក់​ស្លុត៖ យ៉ាងហោច៣៧នាក់ស្លាប់ និង៣៦នាក់ទៀតរងរបួស។ នេះបើតាមតួលេខ ដែលផ្សាយដោយក្រសួង​សុខាភិបាល នៃប្រទេសតួនេស៊ី។

កងកម្លាំងអាជ្ញាធរ បានសម្លាប់ជនសង្ស័យ ប្រដាប់ដោយអាវុធ នៅនឹងកន្លែង បន្ទាប់ពីជននេះ បានតម្រង់​កាណុង សំដៅជនរងគ្រោះផ្សេងទៀត។ ជនសង្ស័យនេះ ត្រូវបានគេស្គាល់ថា ជានិស្សិតជាតិតួនេស៊ីមួយរូប ដែលបានលាក់អាវុធ ធុនអាការបស់ខ្លួន នៅក្នុងឆ័ត្រមួយ នៅពេលដើរចូលទៅក្នុងសណ្ឋាគារ។

អ្នកទទួលខុសត្រូវខាងសន្តិសុខជាតិមួយរូប លោក រ៉ាហ្វិក ឆេល្លី (Rafik Chelly) បានថ្លែងតាមវិទ្យុមួយថា៖ «ជនសង្ស័យបានដើរចូលទៅក្នុងសណ្ឋាគារ ពីខាងឆ្នេមកវិញ ស្លៀកពាក់ដូចជាមនុស្ស ចុះទៅងូតទឹកសមុទ្រ និងមានកាន់ឆ័ត្រមួយ ដែលនៅក្នុងនោះមានកាំភ្លើង អាកាមួយដើម។»

» ជនសង្ស័យ ដែលត្រូវបានបាញ់សម្លាប់ ដោយកងកម្លាំងអាជ្ញាធរ៖

ការវាយប្រហារនេះ បានធ្វើឡើងប្រឆាំងសណ្ឋាគារ ដែលមានឈ្មោះ «Imperial Marhaba» នៃទីក្រុងមាត់​សមុទ្រ របស់ប្រទេស។ នៅក្នុងចំណោមជនរងគ្រោះ ដែលតុល្យភាពបណ្ដោះអាសន្នបានបង្ហាញ នាពេល​នេះ បានបង្ហាញថា មានប្រាំនាក់ជា ជាទេសចរណ៍ជាតិអង់គ្លេស និងក្រៅពីនេះ ជាទេសចរណ៍មកពីប៊ែលហ្សិក អាល្លឺម៉ង់ និងអៀឡង់។ សហគ្រាសម្ចាស់សណ្ឋាគារ បាននិយាយថា ក្នុងចំណោមអតិថិជនទាំង៥៦៥នាក់ របស់សណ្ឋាគារខ្លួន សុទ្ធសឹងមានដើមកំណើត ពីប្រទេសអង់គ្លេស និងពីបណ្ដាប្រទេសនៅអ៊ឺរ៉ុបកណ្ដាល។

ស្ត្រីទេសចរណ៍ម្នាក់ ដែលបានមកស្នាក់នៅ ក្នុងសណ្ឋាគារមួយ នៅជាប់នោះ បានអះអាងពីការភ័យរត់ជាន់គ្នា នៅលើឆ្នេរខ្សាច់ នៅពេលដែលការបាញ់រះ បានបើកធ្វើឡើង។ ស្ត្រីរូបនោះ បានថ្លែងទៀតថា៖ «ខ្ញុំបានគិត​ជា​ដំបូងថា ជាគ្រាន់តែជាការដុតកាំជ្រួច ដើម្បីសប្បាយប៉ុណ្ណោះ ព្រោះខ្ញុំឃើញមនុស្សរត់ (...) បុគ្គលិកបម្រើការ និងភ្នាក់ងារសន្ដិសុខជាច្រើននាក់ ដែលនៅលើឆ្នេរនោះ បានប្រាប់ឲ្យពួកយើងរត់»។

ប្រធានាធិបតីនៃប្រទេសតួនេស៊ី លោក បេជីកាអីដ អេសេបស៊ី (Béji Caïd Essebsi) ដែលបានធ្វើដំណើរមក​ដល់ កន្លែងកើតហេតុ​ដោយផ្ទាល់ នៅរសៀលថ្ងៃសុក្រនោះ បានវាយតម្លៃថា «ការវាយប្រហារនេះ ជាភស្ដុតាង​មួយ ដែលតម្រូវឲ្យប្រទេស ប្រកាន់លិទ្ធិប្រជាធិបតេយ្យទាំងអស់ ក្នុងលោក បង្កើតរួមគ្នា នូវ​យុទ្ធសាស្ត្រ​ដ៏​ខ្លាំង​មួយ។ (...) ប្រទេសតួនេស៊ី កំពុងប្រឈម នឹងចលនាអន្តរជាតិមួយ ដូច្នេះប្រទេសនេះ មិន​អាច​ធ្វើការ ឆ្លើយ​តប​តែ​ឯង​បាន​ឡើយ។»៕