អង្គការក្រៅរដ្ឋាភិបាលមួយ ជំនាញខាងការឃ្លាំមើលសិទ្ធិមនុស្ស បានថ្លែងកាលពីថ្ងៃសៅរ៍នេះ ឲ្យដឹង​ពី​ការ​វាយ​លុក របស់កងទ័ពនៃប្រទេសស៊ីរី ថាបានចូលដល់ខេត្ត «Raqqa» ដែលជាខេត្តបន្ទាយដ៏រឹងមាំ នៃក្រុម​រដ្ឋ​អ៊ីស្លាម (ពាក្យអារ៉ាប់ហៅ Daech ពាក្យ​កាត់​​បារាំង​​ហៅ EI ពាក្យ​​កាត់​​​អង់គ្លេស​​​ហៅ ISIS) ស្ថិតនៅភាគ​ខាង​ជើង​នៃប្រទេសនោះហើយ។

ការវាយលុកនេះ មានការជួយគាំទ្រយ៉ាងខ្លាំងក្លា ពីសំណាក់ប្រទេសរ៉ូស្ស៊ី។ យន្ដហោះទម្លាក់គ្រាប់បែក របស់​កងទ័ព​រ៉ូស្ស៊ី បានដឹកនាំយុទ្ធនាការទម្លាក់គ្រាប់បែក សឹងរកដកដង្ហើមមិនបាន កាលពីថ្ងៃសុក្រ នៅផ្នែក​ខាង​កើត​នៃខេត្ត «Hama» ដែលនៅជាប់នឹងព្រំខេត្ត «Raqqa»។

អង្គការឃ្លាំមើលសិទ្ធិមនុស្សស៊ីរី (OSDH) បានអះអាងទៀតថា កងទ័ពនៃប្រទេសស៊ីរី នឹងអាច​ដណ្ដើម​យក​មកកាន់កាប់វិញ នូវតំបន់ដែលស្ថិតនៅជុំវិញខេត្ត «Raqqa» បន្ទាប់ពីពួកខ្លួន ត្រូវបានកងយុទ្ធជនស្ម័គ្រ​ប្រយុទ្ធ ដើម្បីព្រះអាឡាហ៍ (នៃក្រុមរដ្ឋអ៊ីស្លាម) វាយបណ្ដេញចេញពីទីនោះ តាំងពីខែសីហា ឆ្នាំ២០១៤កន្លង​ទៅ។

ទីរួមខេត្ត ឬក្រុង«Raqqa» ដែលជាទីក្រុងចាត់តាំង​នយោបាយធំជាងគេ របស់ក្រុមរដ្ឋអ៊ីស្លាម ស្ថិតនៅ​ភាគ​ខាង​កើត នៃចំណុចវាយលុក របស់កងទ័ពស៊ីរី និងរ៉ូស្ស៊ី។ ការដណ្ដើមទីក្រុងនេះ មកកាន់កាប់វិញ ដោយ​រដ្ឋាភិបាល​ស៊ីរី ត្រូវបានគេមើលឃើញថា វាគ្រាន់តែ«មុន និងក្រោយ»ប៉ុណ្ណោះ ដូចក្រុង ម៉ូស៊ូល (Mossoul) នៅ​ក្នុង​ប្រទេស​អៀរ៉ាក់ ដែលត្រូវបានកងទ័ព​នៃប្រទេសអៀរ៉ាក់ វាយដំណ្ដើមយកពីដៃក្រុមរដ្ឋអ៊ីស្លាមវិញ កាលពីពេលថ្មីៗនេះ។

ប្រតិបត្តិការ​សិកនេះ ជាផ្នែកមួយនៃការប្រយុទ្ធតស៊ូ ប្រឆាំងនឹងក្រុមភេរវនិយមរដ្ឋអ៊ីស្លាម ដោយមាន​រាប់​បញ្ចូល ទាំងប្រតិបត្តិការសិក ទៅលើក្រុង «Manbij» (ក្នុងប្រទេសស៊ីរី) ដែលមានការជួយគាំទ្រ ពី​សហរដ្ឋ​អាមេរិក និង​ទៅលើ​ក្រុង «Fallouja» ក្នុងប្រទេសអៀរ៉ាក់នោះផង៕