«យើងកំពុងរងចាំ ការរំលោភឈ្លានពានណាមួយ នៅគ្រប់ពេលវេលាទាំងអស់ ហើយយើងក៏ត្រៀមខ្លួនរួចជាស្រេច ដើម្បី​វាយបកវិញនៅគ្រប់ពេលដែរ» នេះជាសម្ដីរបស់អ្នកទទួលខុសត្រូវជាន់ខ្ពស់ម្នាក់ ផ្នែកខាងសន្តិសុខនៃរបបគ្រប់​គ្រង​ស៊ីរី ដែលលើកពីករណីនៃវាយប្រហារណាមួយ ពីសំណាក់កងទ័ពបស្ចឹមលោក ទៅលើរដ្ឋអំណាចរបស់ប្រធានាធិបតីស៊ីរី លោក បាឆារ អាល់អាសាធ (Bachar al-Assad)។

មនុស្សទាំងស្រីប្រុស ក្មេងចាស់ ដួលដេកស្លាប់នឹងឧស្ម័នគីមីបំពុល នៅតំបន់ជាយក្រុងដាម៉ាស ប្រទេសស៊ីរី។ (រូបថត Liberation.fr)

របបគ្រប់គ្រងនៅប្រទេសស៊ីរីនេះ ត្រូវបានគេសង្ស័យថា បានធ្វើការវាយប្រហារដែលមានជាតិថ្នាំគីមីពុល កាលពីថ្ងៃទី២១​ខែសីហាកន្លងទៅ ទៅលើពួកអ្នកបះបោរ និងប្រជាជនស្លូតត្រង់ខ្លួនឯង។ សហរដ្ឋអាមេរិក ក្នុងពេលនេះ បានដាក់ពង្រាយ​នាវាចម្បាំងយក្សធំៗ នៅព័ទ្ធជុំវិញប្រទេសនេះ ហើយទំនងជាបើការវាយប្រហារ ក្នុង«ប៉ុន្មានម៉ោង»ខាងមុខនេះ។

បារាំង សម្ព័នមិត្តចាក់ទឹកមិនលេចថ្មីមួយ ជាមួយសហរដ្ឋអាមេរិក?

ទីក្រុងប៉ារីស បានប្រកាសខ្លួនរួចជាស្រេច ក្នុងការរួមសហការជាមួយសហរដ្ឋអាមេរិក ដើម្បីអន្តរាគមន៍យោធាអន្តរជាតិ សំដៅវាយប្រហាររបបស៊ីរី ដែលផ្ទុយពីជំហររ​បស់ទីក្រុងម៉ូស្គូ និងទីក្រុងប៉េកាំង ដែលជានិច្ចជាកាលជំទាស់នឹងប្រត្តិបត្តិការ​យោធានេះ។ សាធារណមតិបារាំង ប្រមាណជា៦៤% បានប្រឆាំងនឹងការចូលរួមនេះ មិនខុសគ្នាប៉ុន្មាននឹងទីក្រុងឡុងដ៍ ដែលសភាជាន់ទាបរបស់ខ្លួន បានជំទាស់ទៅនឹងប្រតិបត្តិការយោធាដូចគ្នាដែរ ដោយពួកគេខ្លាចបារម្មណ៍ ពីព្រឹត្តិការណ៍​មិនអាចស្មានទុកមុនបាន ដូចនៅប្រទេសអៀរ៉ាក់។

ប៉ុន្តែទោះបីជាយ៉ាងណាក៏ដោយ ទីក្រុងប៉ារីសបានអះអាងថា ខ្លួននៅរងចាំលទ្ធផលនៃការស៊ើបអង្កេត របស់ក្រុមការងារ​របស់អង្គការសហប្រជាជាតិ ដែលបានចូលទៅស្វែងរកការពិត នៅក្នុងប្រទេសស៊ីរីជុំវិញការវាយប្រហាដោយជាតិគីមី ហើយនឹងត្រូវបញ្ចេញឲ្យដឹងនៅក្នុងចុងសប្ដាហ៍នេះ។

ទណ្ឌកម្មប្រឆាំងនឹងការប្រើប្រាស់អាវុធគីមី តែមិនផ្ដួល អាលអាសាធ ទេ

ប្រទេសបារាំង និងប្រទេសអាមេរិក បានរំពឹងរួចជាស្រេចថា អន្តរាគមន៍យោធានេះ មិនមានរយៈពេលវែងទេ ហើយក៏មិន​មានបំណងចង់ទម្លាក់រដ្ឋអំណាចលោក បាឆារ អាលអាសាធនោះដែរ។ ប្រទេសទាំងពីរថែមទាំងបាននិយាយថា មិន​បាន​បន្ថែមទម្ងន់ទៅលើសង្គ្រាមស៊ីវិលក្នុងប្រទេសស៊ីរីនោះទេ តែអះអាងថា«មិនយល់ព្រម ឲ្យប្រទេសមួយបំពុល​ប្រជាជន​ខ្លួន​ឯង មានទាំងស្ត្រីទាំងកុមារយ៉ាងដូច្នេះទេ»។

រហូតមកដល់ម៉ោងនេះ ក្រុមការងាររបស់ អ.ស.ប ដែលចូលទៅធ្វើការស៊ើបអង្កេត តាំងពី៤ថ្ងៃមកហើយនោះ នៅស្ងៀម​ស្ងាត់មិនបានមាត់កអ្វីទាំងអស់ ទៅលើការសម្លាប់រង្គាលនៃអាវុធគីមី ដែលទំនងជាមានពិតប្រាកដ តែមិនទាន់​ធ្លោយ​ឲ្យ​ដឹងថានរណាជាដើមហេតុនៅឡើយ ខណៈពេលដែលរដ្ឋអំណាច និងក្រុមបះបោរចោទគ្នាទៅវិញទៅមក។ ប៉ុន្តែ​លោក បាន គីមូន (Ban Ki-Moon) អគ្គលេខាធិការនៃ អ.ស.ប និងសហរដ្ឋអាមេរិក បានអះអាងថាពួកគេមិនគិតថា របាយការណ៍របស់​ក្រុមការងារនេះ នឹងផ្ដល់ជាលទ្ធផលច្បាស់ការប៉ុន្មាននោះឡើយ។

នាវាចម្បាំងយក្ស ផ្ទុកដោយយន្ដហោះប្រដេញអាមេរិក ត្រូវបានបញ្ជូនទៅពង្រាយនៅសមុទ្រមេឌីទែរ៉ាណេ។ (រូបភាព TF1)

នៅក្រុមប្រឹក្សាសន្តិសុខ រ៉ូស្សីឃាំងជាប់ !

ការយកវត្ថុតាងមួយចំនួន យកមកពិសោធន៍នៅក្នុងមន្ទីរពិសោធន៍មួយ នៅអ៊ឺរ៉ុប ទំនងជាត្រូវប្រើរយៈពេលយូ អាចដល់​ច្រើនសប្ដាហ៍។ ម្យ៉ាងទៀត ជាមួយនឹងភាពជាប់គាំង នៅក្រុមប្រឹក្សាសន្តិសុខនៃ អ.ស.ប តាំងពីជាងពីរឆ្នាំកន្លះមកហើយ​នោះ លោក បារ៉ាក់ អូបាម៉ា (Barack Obama) ទំនងជាមិនរងចាំបន្តទៅទៀតទេ។ ប្រតិបត្តិការនេះ យ៉ាងហោចណាស់ ក៏​អាមេរិកមានបារាំង នៅក្បែរជាមួយ។

សម្រាប់ប្រធានាធិបតីបារាំង លោក ហ្វ្រងស៊័រ ហូឡង់ (François Hollande) វាដល់ពេល ដែល«សហគមន៍អន្តរជាតិ ត្រូវ​ធ្វើប្រតិកម្ម»ហើយ។

ចំណែកទីក្រុងម៉ូស្គូវិញ មើលសំនុំរឿងនេះ មិនសូវចំដូចក្រុមប្រទេសនៅបស្ចឹមលោកទេ។ នៅថ្ងៃសៅរ៍​ទី៣១​ខែសីហានេះ ប្រធានាធិបតីរ៉ូស្សី លោក វ្លាឌីមៀរ ពូទីន (Vladimir Poutine) បានចាត់ទុកថា ជា«ឆាកកំប្លែងទាំងស្រុង» នូវ​ការចោទ​ប្រកាន់ទាំងឡាយ ប្រឆាំងរបបគ្រប់គ្រងស៊ីរីសព្វថ្ងៃ ដែលថារបបនេះបានប្រើឧស្ម័នគីមីពុល។ ប្រធានាធិបតី​រូបនេះ​ក៏បាន​ថ្លែងដែរថា លោកមិនរងចាំអ្វីច្រើន ពីរបាយការណ៍លទ្ធផលនៃក្រុមការងាររបស់ អ.ស.ប ទេ។ ទោះជារបាយការណ៍​នោះ មានរូបរាងយ៉ាងណាក៏ដោយ ក៏លោកបាននិយាយថា មិនមែននៅក្រុមប្រឹក្សាសន្តិសុខនៃ អ.ស.ប ទេ ដែលអាចធ្វើឲ្យ​ស្ថានភាពនៅស៊ីរី មានភាពល្អប្រសើរនោះ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី៣១ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ