ខាងក្រោមនេះ ជារបាយការណ៍លំអិត ធ្វើនៅថ្ងៃសៅរ៍ ទី១៤ ខែវិច្ឆិកា វេលាម៉ោង៧ព្រឹក (ម៉ោង១៣រសៀល ម៉ោងនៅកម្ពុជា) ពីស្ថានការណ៍ទាំងឡាយ ដែលបានកើតឡើង នៅក្នុងការវាយប្រហារ ចំនួន៦កន្លែងនៅ​រដ្ឋធានីប៉ារីស និងនៅតំបន់ជាយក្រុង។ ប៉ុន្តែទស្សនាវដ្ដីមនោរម្យ.អាំងហ្វូ សូមលើកយកតែព័ត៌មាន ដែល​ផ្ដល់​ឲ្យ ដោយប្រភពជាផ្លូវការ (រដ្ឋាភិបាល នគរបាល តុលាការ...) និងរាយការណ៍ ដោយអ្នកយកព័ត៌មាន​របស់​យើង ដែលមានវត្តមាននៅនឹងកន្លែងប៉ុណ្ណោះ។

ការបាញ់ប្រហារ បានធ្វើឡើង ចំនួន៥ចំណុច កណ្ដាលរដ្ឋធានីប៉ារីស

ភោជនីយដ្ឋាន និងហាងផឹកស៊ីជាច្រើន បានរងនូវការបាញ់រះ ពីខាងក្រៅ ដោយអាវុធស្វ័យប្រវត្ត ក្នុងនោះ​មានភោជនីយដ្ឋានម្ហូបខ្មែរមួយឈ្មោះ «Le Petit Cambodge» ផង។ ការបាញ់ប្រហារដ៏ខ្លាំងក្លា និងបាន​ធ្វើ​ឲ្យមនុស្សជាច្រើនស្លាប់នោះ គឺនៅក្នុងរោងល្ខោន បាតាក្លង់ (Bataclan) ដែលកំពុងមានការប្រគុំតន្ត្រីរ៉ុក របស់​ក្រុមចម្រៀង របស់អាមេរិក។

ការបំផ្ទុះគ្រាប់បែក នៅក្បែរពហុកីឡាដ្ឋាន «Stade de France»

គ្រាប់បែកចំនួន៣គ្រាប់ ត្រូវបានជនបីនាក់ បំផ្ទុះខ្លួនឯង នៅក្បែរពហុកីឡាដ្ឋានធំ របស់បារាំង ដែលមាន​ឈ្មោះ «Stade de France» ខណៈការប្រកួតកីឡាបាល់ទាត់ ជាលក្ខណៈមិត្តភាព រវាងក្រុមបាល់ទាត់​ជម្រើស​ជាតិបារាំង និងអាល្លឺម៉ង់ កំពុងប្រព្រឹត្តិទៅ។ ប្រធានាធិបតីបារាំង លោក ហ្វ្រង់ស៊័រ ហូឡង់ (François Hollande) ដែល​មាន​វត្តមាន នៅក្នុង​ការប្រកួតកីឡាមិត្តភាពនេះ ត្រូវបានជម្លៀសខ្លួនចេញ ដោយ​លាក់​កំបាំង ដើម្បីបញ្ជៀស​ការជ្រួលច្របល់។

» សូមរកមើលកន្លែង វាយប្រហារទាំងនេះ នៅលើផែនទីដូចខាងក្រោម៖

ការចាត់ចំណាប់ខ្មាំង នៅរោងល្ខោន បាតាក្លង់

នៅល្ងាចថ្ងៃសុក្រនេះ មានការប្រគុំតន្ត្រី របស់ក្រុមតន្ត្រីរ៉ុក របស់អាមេរិក នៅក្នុងរោងល្ខោន បាតាក្លង់ ជា​មួយ​នឹងទស្សនិកជន ប្រមាណជាង១៥០០នាក់។ ប៉ុន្តែនៅពេលនោះ ភេរវករបួននាក់ ប្រដាប់ដោយអាវុធ និង​គ្រាប់​បែក បានចូលទៅក្នុងសាល ហើយបានបើកការបាញ់រះ ទៅលើហ្វូងមនុស្ស និងបានចាប់មនុស្ស នៅ​ក្នុង​នោះ​ធ្វើជាចំណាប់ខ្មាំង អស់ប្រមាណជាង៣ម៉ោង។ ប៉ុន្តែការចាប់ចំណាប់ខ្មាំងនេះ បានត្រូវបញ្ចប់ទៅ ដោយ​ការវាយលុករំដោះ របស់កងកម្លាំងពិសេសបារាំង ដែលចាប់ផ្ដើមធ្វើ នៅវេលាម៉ោង០ និង៣០នាទី រហូត​ដល់​ម៉ោង១រំលងអាធ្រាត។ ជនទាំងបួននាក់ បានស្លាប់ ក្នុងនោះបីនាក់ បានបំផ្ទុះខ្សែក្រវ៉ាត់ ដែល​មាន​គ្រាប់បែកសម្លាប់ខ្លួន។ នៅមិនឆ្ងាយពីទីនោះ ក្នុងមហាវិថី វ៉ុលទែ (Voltaire) ភេរវករម្នាក់ទៀត ក៏បានបំផ្ទុះ​គ្រាប់​បែក ដែលមានជាប់ខ្លួន ដើម្បីធ្វើអត្តឃាតដែរ។

យ៉ាងតិច១២៦នាក់បានស្លាប់ និងជាង២០០នាក់បានរងរបួស ខណៈ​ភេរវជន​​៨នាក់​បានស្លាប់

តុល្យភាពនៃជនរងគ្រោះ មានសភាពធ្ងន់ធ្ងរណាស់ និងមិនទាន់ច្បាស់នៅឡើយ (អាចមានចំនួន​កើន​ឡើង)។ តុល្យភាពបណ្ដោះអាសន្ន ដែលទស្សនាវដ្ដីទទួលបាន នៅវេលានេះ បានឲ្យដឹងថា មនុស្សយ៉ាង​តិច​១២៦នាក់ បានស្លាប់។ រដ្ឋអាជ្ញានៃសាធារណរដ្ឋបារាំង ប្រចាំរដ្ឋធានីប៉ារីស បាននិយាយថា មានមនុស្ស​ស្លាប់​១៨នាក់ នៅនឹងផ្លូវ ឆារ៉ូន (Charonne) ៥នាក់ នៅនឹងផ្លូវ ហ្វុងតែន (Fontaine) និងមិនតិចជាង១២នាក់ នៅ​នឹង​ផ្លូវ​អាលីប៊ែរ (Alibert) កែងជាមួយផ្លូវ ប៊ីឆា (Bichat)។ រីឯនៅក្នុងរោងល្ខោនវិញ មនុស្ស«រាប់សិប»នាក់ បាន​ស្លាប់។ មនុស្សរងរបួស មានចំនួនច្រើនជាង២០០នាក់ ក្នុងនោះ៨២នាក់រងរបួសធ្ងន់។

នៅជាយក្រុង ជាប់នឹងពហុកីឡាដ្ឋាន មនុស្ស៤នាក់បានស្លាប់ ដែលក្នុងនោះបីនាក់ ត្រូវបាន​ប្រភពស្និត​នឹង​នគរបាល ឲ្យដឹងថា ជាជនដែលបានបំផ្ទុះ គ្រាប់បែកសម្លាប់ខ្លួន។

ផ្នែកស៊ើបអង្កេតបារាំង បានឲ្យដឹងថា ភេរវជនដែលប្រដាប់ដោយអាវុធ ចំនួន៨នាក់ បានស្លាប់ ក្នុង​នោះ​៧នាក់ បានស្លាប់ដោយបំផ្ទុះគ្រាប់បែក ធ្វើអត្តឃាត។ មកដល់ពេលនេះ គេនៅមិនទាន់ដឹងថា តើមាន​ភេរវករ​ណាផ្សេង បានរត់គេចខ្លួន ឬយ៉ាងណានោះទេ។ ដំណើរការនៃហេតុការណ៍ទាំងអស់ (ទាំង៦កន្លែង) ក៏នៅ​មិន​ទាន់​ឲ្យ​ដឹង ថាបានកើតឡើងយ៉ាងដូចម្ដេច នៅឡើយដែរ។

ប្រទេសបារាំងទាំងមូល ត្រូវបានដាក់​ទៅក្នុងភាពអាសន្ន ហើយព្រំដែនប្រទេស ត្រូវបានបិទ

ប្រធានាធិបតីបារាំង លោក ហ្វ្រង់ស៊័រ ហូឡង់ បានប្រកាសនៅតាមបទអន្តរាគមន៍ លើកញ្ចក់ទូរទស្សន៍ ពីការ​សម្រេចចិត្តរបស់លោក ក្នុងការដាក់ប្រទេសបារាំង ទៅក្នុងភាពអាសន្ន ដើម្បីឆ្លើយតប ទៅនឹងអំពើភេរវកម្ម មិន​ដែលធ្លាប់កើតមាននេះ។ ប្រមុខរដ្ឋបារាំង បានស្នើសុំឲ្យកងទ័ព ចូលអន្តរាគមន៍ ដើម្បីគ្រប់គ្រង​ស្ថាន​ការណ៍។ លោកបានថ្លែងឲ្យដឹងថា៖ «យើងនឹងដឹកនាំការប្រយុទ្ ដោយគ្មានលើកលែង ឬអាណិត​អាសូរ​អ្វី​ទាំង​អស់»។

ប្រជុំគណៈរដ្ឋមន្ត្រីជាបន្ទាន់ និងមានលក្ខណៈវិសមញ្ញ

ការប្រជុំពិសេសនេះ ត្រូវបានកោះធ្វើ នៅវេលារំលងអាធ្រាត នៅក្នុងវិមានប្រធានាធិបតីបារាំង។ បន្ទប់​ដោះ​ស្រាយ​វិបត្តិមួយ ត្រូវបានបង្កើត​ឡើង នៅនឹងវិមានរដ្ឋាភិបាល (Matignon)។ នៅប៉ុន្មានម៉ោងក្រោយមក លោក​ប្រធានាធិបតី François Hollande នាយករដ្ឋមន្ត្រី Manuel Valls រដ្ឋមន្ត្រីមហាផ្ទៃ Bernard Cazeneuve និង​រដ្ឋមន្ត្រី​យុត្តិធម៌ Christiane Taubira បានធ្វើដំណើរទៅដល់ផ្ទាល់ នៅនឹងកន្លែងកើតហេតុ ដើម្បី​ត្រួត​ពិនិត្យ​ស្ថានការណ៍ និងផ្ដល់ការលើកទឹកចិត្ត ទៅដល់ជនរងគ្រោះ និងបណ្ដារអ្នកជួយសង្គ្រោះ ក៏​ដូច​ជា​កង​កម្លាំង​ប្រដាប់អាវុធបារាំង។

ការស៊ើបអង្កេតស៊ីជម្រៅ បានប្រព្រឹត្តិទៅហើយ

ការិយាល័យស៊ើបអង្កេត បានប្រកាសបើកធ្វើការស៊ើបអង្កេត ពីបទមនុស្សឃាត ដែលទាក់ទងនឹងបណ្ដាញ​ភេរវកម្ម ដើម្បីរកឲ្យឃើញ ពីការពិត និងជនដែលទាក់ទងផ្សេងទៀត។ នេះបើតាមការអះអាងឲ្យដឹង របស់​រដ្ឋអាជ្ញា​បារាំង ប្រចាំរដ្ឋធានីប៉ារីស លោក ហ្វ្រង់ស៊័រ មូឡាំង (François Molins)។ ការវាយប្រហារនេះ បាន​ក្លាយ​ជាការវាយប្រហារដ៏រង្គាល មិនដែលធ្លាប់កើតមាន នៅក្នុងប្រទេសបារាំង និងជាការវាយប្រហារ ដែល​មានជនរងគ្រោះស្លាប់ច្រើនទីពីរ នៅក្នុងទ្វីបអ៊ឺរ៉ុបខាងលិច បន្ទាប់ពីភេរវកម្ម នៅរាជធានីម៉ាឌ្រីត ប្រទេស​អេស្ប៉ាញ កាលពីឆ្នាំ២០០៤ (មនុស្ស១៩១ស្លាប់ និងជិត២០០០នាក់រងរបួស)។

គ្មានការប្រកាសទទួលស្គាល់ មកដល់ម៉ោងនេះ

មកដល់វេលានេះ គេនៅមិនទាន់ទទួលបាន នូវការប្រកាសទទួលស្គាល់ នូវការវាយប្រហារនេះ ថាត្រូវ​បាន​រៀបចំឡើង ដោយក្រុមណាមួយនៅឡើយ។ បណ្ដាជន ដែលបានរួចរស់មានជីវិត ពីការធ្វើចំណាប់ខ្មាំង នៅ​រោង​ល្ខោន បាតាក្លង់ បានឲ្យដឹង ក្រុមភេរវករបានធ្វើសកម្មភាព ជាមួយនឹងសម្រែករបស់ពួកគេ «Allah Akbar» ដែលមានន័យថា សងសឹកដើម្បីព្រះអាឡាហ៍ជាម្ចាស់។ សាក្សីម្នាក់ បានថ្លែងឲ្យដឹងថា៖ «ខ្ញុំបាន​ឮ​ផ្ទាល់ត្រជៀក នូវសម្ដីរបស់ពួកវា (ភេរវករ) ដែលនិយាយទៅកាន់ចំណាប់ខ្មាំងទាំងអស់ថា "ជាកំហុសរបស់ ហ្វ្រង់ស៊័រ ហូឡង់។ ជាកំហុសរបស់ប្រធានាធិបតីអ្នកឯង។ ហ្វ្រង់ស៊័រ ហូឡង់ មិនត្រូវធ្វើអន្តរាគមន៍យោធា នៅ​ក្នុង​ប្រទេសស៊ីរី នោះទេ។»

នៅចំពោះហេតុការណ៍ទាំងនេះ ប្រធានាធិបតីបារាំង លោក ហ្វ្រង់ស៊័រ ហូឡង់ បានថ្លែងឡើងថា៖ «យើង​បាន​ដឹងរួចហើយ ថានរណាជាឧក្រិដ្ឋជន នរណាជាភេរវជនទាំងនេះ»៕