កីឡាករ ជឺច ឡូរ៉ិនស្ស៊ូ (Jorge Lorenzo) របស់អេស្ប៉ាញ ធ្វើបានយ៉ាងល្អក្នុងការប្រកួតការពារដំណែងជើងឯក ម៉ូតូជីភី (MotoGP) ដោយបានឈ្នះការប្រណាំងបើកឆាក នៅលើទីលានប្រណាំងអន្តរជាតិនៃប្រទេសកាតា (Qatar's Losail International Circuit) កាលពីថ្ងៃអាទិត្យកន្លងទៅ។

កីឡាករ ជឺច ឡូរ៉ិនស្ស៊ូ បានឈ្នះពានរង្វាន់លើកទី២៤។

អ្នកប្រណាំងឲ្យក្រុមហ៊ុន យ៉ាម៉ាហា (Yamaha) ដែលបានឈ្នះពានរង្វាន់លើកទី២៤ ក្នុងអាជីពរូបនេះ បានបញ្ចប់ក្នុងរយះ-​ពេល ៥៩៩០វិនាទី និងនាំមុខមិត្តរួមក្រុម ដែលជាម្ចាស់ជើងឯកម៉ូតូជីភី ៧សម័យកាល កីឡាករ វ៉ាឡិនទីណូ រ៉ូស្ស៊ី (Valentino Rossi)។ រីឯអ្នកប្រណាំងឲ្យក្រុមហ៊ុន ហុងដា (Honda) កីឡាករ ម៉ាក ម៉ាកេស (Marc Marquez) បញ្ចប់ទៅ ដោយទទួលបានចំណាត់ថ្នាក់លេខ៣។

កីឡាករ ឡូរ៉ិនស្ស៊ូ បានប្រាប់ដល់ទូរទស្សន៏ ប៊ីប៊ីស៊ី (BBC) ថា «ខ្ញុំបានដឹងថា វាប្រាកដជាមានការលំបាក។ ខ្ញុំរីករាយខ្លាំង​ណាស់ ជាពិសេសបានឃើញកីឡាកររ៉ូស្ស៊ី អាចទទួលបានចំណាត់ថ្នាក់លេខ២ វាពិតជារឿងដ៏ល្អ សំរាប់ក្រុមយ៉ាម៉ាហា»។

អ្នកប្រណាំង រ៉ូស្ស៊ី ដែលធ្វើពុំបានល្អ នៅពេលចាប់ផ្តើមក្នុងការប្រណាំងនោះ បានឡើងវ៉ាផ្តាច់ អ្នកប្រណាំងក្រុមហុងដា ២រូប កីឡាករ ដានី ផិដ្រូសា (Dani Pedrosa) និងកីឡាករ ម៉ាកេស នៅជុំផ្តាច់ព្រ័ត្រ ហើយទទួលបានជោគជ័យ​យ៉ាងឆាប់​រហ័ស។

កីឡាករអ៊ីតាលីរូបនេះ បាននិយាយថា «វាពិតជាអស្ចារ្យខ្លាំងណាស់ ខ្ញុំគិតថា ចំណាត់ថ្នាក់លេខ២ ជាចំណាត់ថ្នាក់​ដែលល្អ​បំផុតសំរាប់ខ្ញុំ ខណៈដែល ឡូរ៉ិនស្ស៊ូ គេធ្វើបានយ៉ាងឥតខ្ចោះថ្ងៃនេះ។ ខ្ញុំធ្វើឲ្យមានកំហុស នៅពេលចាប់ផ្តើម ជាមួយនឹង​កីឡាករ ផិដ្រូសា។ ចំណាត់ថ្នាក់នេះជាគោលដៅរបស់ខ្ញុំ តាំងពីខែវិច្ឆិកា ឆ្នាំមុន។ ម៉ូតូរបស់ខ្ញុំថ្ងៃនេះ ពិតជាមានភាព​ប្រសើរ​ណាស់ ព្រោះវាគ្មានភាពរអាករអួលដល់ការប្រកួត។»

ទទឹមនឹងជ័យជំនះនៅក្នុងប្រទេសកាតានេះ ក្រុមយ៉ាម៉ាហា បាននាំមុខគេក្នុងការប្រកួត ដែលមាន ៤៥ពិន្ទុ ខណៈដែល​ក្រុមហុងដា មាន២៩ពិន្ទុ ស្ថិតនៅចំណាត់ថ្នាក់លេខ២។ ការប្រណាំងបន្ទាប់ នឹងធ្វើឡើងនៅទីលានប្រណាំង នៃប្រទេស​អាមេរិក នៅថ្ងៃទី២១ ខែមេសា ខាងមុខ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៨ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ