ក្រុមហ៊ុនស៊ូស្សូគី (Suzuki) នឹងត្រឡប់ទៅចូលរួមការប្រណាំងពានរង្វាន់ម៉ូតូជីភី (MotoGP) វិញ នៅឆ្នាំ២០១៥ បន្ទាប់​ពី​ក្រុមហ៊ុនរបស់ជប៉ុនមួយនេះ បានធ្វើតេស្តសាកល្បងម៉ូតូគំរូរបស់ខ្លួនបានជោគជ័យនៅប្រទេសអេស្ប៉ាញ កាលពីថ្ងៃច័ន្ទ​កន្លងទៅ។

ស៊ូស្សូគី ធ្លាប់បានឈ្នះពានរង្វាន់ពិភពលោកប្រភេទម៉ាស៊ីន ៥០០ស៊េស៊េ (500cc) ចំនួន៣សម័យកាល ក្រោមថ្វីដៃ​កីឡាករអង់គ្លេសបារី ស្សីណេ (Barry Sheene) និងកីឡាករអាមេរិក២រូបទៀត ឃេវីន ស្ស័កវាន់ (Kevin Schwantz) និង ឃិនី រ៉ូបឺត (Kenny Roberts)។

ប៉ុន្តែពួកគេបានដកខ្លួនពីការប្រណាំង កាលពីឆ្នាំ២០១១ ដោយពូកគេនិយាយថា ក្រុមហ៊ុនត្រូវកាត់បន្ថយចំណាយ ព្រោះ​ខ្លាចវិបត្តិសេដ្ឋកិច្ចរបស់ពិភពលោកធ្លាក់ចុះ។ ហើយពួកគេនិយាយក្នុងពេលនោះថា នឹងចូលរួមប្រណាំងវិញនៅ​ឆ្នាំ២០១៤។

ក្រុមហ៊ុនផលិតគ្រឿងយន្តមួយនេះ បានមកចូលរួមសាកល្បងម៉ូតូជីភី នៅឯទីលានប្រណាំងទីក្រុងបាសេឡូណា (Barcelona) កាលពីថ្ងៃច័ន្ទកន្លងទៅ ហើយបានចេញសេចក្តីថ្លែងការណ៏ថា ពួកគេនឹងធ្វើតេស្តសាកល្បងជាបន្តទៀត នៅប្រទេសជប៉ុន នាពេលបន្ទាប់។

ក្នុងសេចក្តីថ្លែងការណ៏នោះ បាននិយាយថា «ក្រុមហ៊ុនសាជីវកម្មរបស់ម៉ូតូស៊ូស្សូគី នឹងចូលរួមប្រកួតប្រជែង ក្នុងការ​ប្រណាំងម៉ូតូជីភី ចាប់ពីឆ្នាំ២០១៥ទៅ។»

អ្នកប្រណាំងអ៊ីតាលី ដេវីដ ប្រីវីយ៉ូ (Davide Brivio), អតីតអ្នកប្រណាំងក្រុមយ៉ាម៉ាហា (Yamaha) វ៉ាឡិនទីណូ រ៉ូស្សី (Valentino Rossi) និងអ្នកប្រណាំងសញ្ជាតិបារាំង រែនឌី ដេភូនែត (Randy De Puniet) នឹងក្លាយជាអ្នកបើកសាកល្បង​ម៉ាស៊ីនថ្មី ១០០០ស៊េស៊េ (ប្រភេទម៉ូតូធំ)។

ការវិលត្រឡប់របស់ក្រុមហ៊ុនស៊ូស្សូគីនេះ នឹងធ្វើឲ្យការប្រកួតពានរង្វាន់ម៉ូតូជីភី មានក្រុមហ៊ុនធំៗ ចំនួន៤ផ្សេងៗគ្នា ក្នុង​នោះ​មានដូចជា ក្រុមហ៊ុនហុងដា (Honda), យ៉ាម៉ាហា (Yamaha) និងក្រុមហ៊ុនឌូកាទី (Ducati) បន្ទាប់ពីក្រុមហ៊ុន​កាវ៉ាសាគី (Kawasaki) បានដកខ្លួនកាលពីឆ្នាំ២០០៩មក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៨ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ