ក្រុមហង្សក្រហមលីវើភូល (Liverpool) បានប្រាប់ដល់ខ្សែប្រយុទ្ធរបស់ខ្លួន ល្វីស ស្វារែស (Luis Suarez) ថា ឲ្យសរសេរ​សំណើរសុំផ្ទេរ ជា«​លាយលក្ខណ៍​អក្សរ»មក បើគាត់ពិតជាចង់ចាកចេញពីទឹកដីប្រទេសអង់គ្លេសមែន។

ល្វីស ស្វារ៉ែស កីឡាករខ្សែរប្រយុទ្ធរបស់ ក្រុមបាល់ទាត់លីវើភូល។

ខ្សែប្រយុទ្ធអន្តរជាតិអ៊ុយរ៉ាហ្គាយរូបនេះ គ្មានបំណងចង់បន្តអនាគតជាមួយក្រុមហង្សក្រហមទៀតទេ បន្ទាប់ពីដឹងថាមាន​ក្រុមរៀលម៉ាឌ្រីដ (Real Madrid) និងក្រុមបាសេឡូណា (Barcelona) ចង់បានរូបគាត់។

ស្វារែស វ័យ២៦ឆ្នាំ បាននិយាយថា គាត់ត្រូវតែចាកចេញ គាត់មិនអាចទ្រាំនៅក្នុងទឹកដីអង់គ្លេសឲ្យគេមើលងាយ និងជាទី​ប្រមាញ់សម្រាប់អ្នកកាសែតនោះទេ បើទោះបីជាអ្នកគាំទ្រទទូចសុំឲ្យនៅបន្ត ជួយក្លឹបមួយរដូវកាលទៀត យ៉ាងណាក៏​ដោយ។

អ្នកគាំទ្រ និងក្លឹបលីវើភូល តែងតែគាំទ្រខ្សែប្រយុទ្ធរូបនេះជានិច្ច បើទោះបីជាគាត់បានធ្វើទង្វើខុសឆ្គង លក្ខណៈផ្ទាល់ខ្លួន​យ៉ាងណាក៏ដោយ។ ដូចជាការដែលរឿងជាមួយនឹងកីឡាករផាទ្រិក អេវរ៉ា (Patrice Evra) និងថ្មីៗនេះ គាត់បានខាំដៃ​កីឡាករប្រែនីស្លាវ អ៊ីវ៉ានូវីក (Branislav Ivanovic) ជាដើម។

ប៉ុន្តែកីឡាកររូបនេះ មិនត្រឹមតែមិនសងគុណក្លឹបវិញទេ គាត់ថែមទាំងបំបាក់មុខក្លឹបបន្ថែមទៀត ខណៈដែលគាត់​កំពុង​តែ​ជាប់ភារៈកិច្ចជម្រើសជាតិអ៊ុយរ៉ាហ្គាយ ក្នុងការប្រកួតខុនហ្វេដឺរ៉េសិនខាប់ (Confederations Cup) នៅប្រទេសប្រេស៊ីល​នោះ គាត់តែងតែនិយាយជាសាធារៈណៈថា គាត់ចង់ចាកចេញ ទៅចូលរួមជាមួយក្រុមរៀលម៉ាឌ្រីដ ទាំងបើកចំហរ ដោយគ្មានភាពអៀនខ្មាស់។

ប៉ុន្តែពេលនេះ អ្នកគាំទ្រ និងក្លឹបលីវើភូលពុំមានការអត់ធ្មត់បន្តទៀតទេ ហើយក្លឹបបានព្រមានដល់កីឡាកររូបនេះថា បើ​ពិត​ជាចង់ចាកចេញខ្លាំងណាស់ សូមសរសេរសំណើរមកក្លឹបមក ក្លឹបនឹងជួយដោះស្រាយឲ្យ កុំទៅនិយាយទីសាធារណៈ​ដោយបើកចំហរ នាំបាត់បង់កិត្តិយសរបស់ក្លឹប និងកិត្តិយសក្នុងនាមជាកីឡាករអាជីព សម្រាប់ខ្លួនឯងទៀត។

ក្រុមលីវើភូល បានកំណត់តម្លៃស្វារែស ជាង៤០លានផោន (៦២.៧៤លានដុល្លា) ដល់ក្រុមរៀលម៉ាឌ្រីដ ដែលមាន​បំណង​ចង់ទិញផ្តាច់កិច្ចសន្យា។ ហើយក្លឹបក៏សង្ឃឹមថា នឹងមានការព្រមព្រាងគ្នាឆាប់ៗ ដើម្បីងាយស្រួលស្វែងរកខ្សែប្រយុទ្ធ​ឆ្នើម​ថ្មីរូបណាមួយ មកជំនួសដំណែងគាត់វិញដែរ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៨ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ