ជាង១០០អង្គការ ស្នើស៊ើបអង្កេតដោយឯករាជ្យលើឃាតកម្ម កែម ឡី
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០៨ កក្កដា ២០១៧
- កែប្រែចុងក្រោយ: July 08, 2017
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
ជិតមួយឆ្នាំ ក្រោមឃាតកម្មបាញ់សម្លាប់យ៉ាងសាហាវ ទៅលើអ្នកស្រាវជ្រាវផ្នែកសង្គម និងនយោបាយ លោក កែម ឡី នៅកណ្ដាលរាជធានីភ្នំពេញ អង្គការសង្គមស៊ីវិល ច្រើនជាង១០០អង្គការសមាគម បានចេញសេចក្ដីថ្លែងការណ៍រួមគ្នាមួយ នៅថ្ងៃនេះ អំពាវនាវឲ្យមានការស៊ើបអង្កេត ដោយឯករាជ្យ ទៅលើសំនុំរឿងដ៏រសើបមួយនេះ។
សម្រាប់អង្គការសង្គមស៊ីវិល ទាំង១០៧ស្ថាប័ននោះ បានបញ្ជាក់ថា យុត្តិធម៌សម្រាប់លោក កែម ឡី ក្រុមគ្រួសារ មិត្តភ័ក្រ និងសហការីរបស់លោក នៅមិនទាន់រកឃើញនៅឡើយ ខណៈការស៊ើបអង្កេត ទៅលើករណីបាញ់សម្លាប់ យ៉ាងសាហាវព្រៃផ្សៃនេះ នៅមិនទាន់មានតម្លាភាព និងមានពោរពេញដោយមន្ទិសសង្ស័យជាច្រើន។ សេចក្ដីថ្លែងការណ៍បានអះអាងបន្តថា មន្ទិលសង្ស័យទាំងនោះ មិនទាន់មានការបកស្រាយ ឲ្យច្បាស់លាស់នោះទេ។
ក្រុមអង្គការសង្គមស៊ីវិលជាង ១០០ស្ថាប័ន បានអំពាវនាវឲ្យមានការស៊ើបអង្កេតដោយឯករាជ្យទៅលើករណីឃាតកម្មលើអ្នកវិភាគនយោបាយដ៏មានប្រជាប្រិយភាព លោកបណ្ឌិត កែម ឡី ដែលការអំពាវនាវនេះ ត្រូវបានធ្វើឡើងស្របពេលដែលខួប ១ឆ្នាំនៃឃាតកម្មនេះ នឹងចូលមកដល់នៅសប្ដាហ៍ក្រោយនេះ។
កាលពីថ្ងៃទី១០ ខែកក្កដា ឆ្នាំមុន លោក កែម ឡី ដែលគេស្គាល់ថា ជាអ្នកធ្វើអត្ថាធិប្បាយនយោបាយដ៏ល្បីឈ្មោះ ត្រូវបានបាញ់សម្លាប់ នៅខណៈលោកកំពុងទទួលទានកាហ្វេ នៅក្នុងហាងលក់ទំនិញ ស្តាម៉ាត នៃស្ថានីយចាក់ប្រេងឥន្ទនៈ កាល់តិច ស្ថិតនៅស្ដុបបូកគោ។ នៅក្រោយឃាតកម្មនោះ និងរហូតមកដល់ថ្ងៃនេះ ជនសង្ស័យតែម្នាក់គត់ ឈ្មោះ អឿង អាង ដាក់រហស្សនាម «ជួប សម្លាប់» ត្រូវបានឃាត់ខ្លួន និងផ្តន្ទាទោស។
ជនសង្ស័យរូបនេះ បានឆ្លើយសារភាព ថាលោកជា«ឃាតករ» ក្រោមមូលហតុថាលោក ចង់ជម្រះបញ្ជីលើលោក កែម ឡី ព្រោះការជំពាក់ប្រាក់មិនសង ចំនួន៣០០០ដុល្លារ។ ជាចម្លើយសារភាព ដែលក្រុមគ្រួសារលោក កែម ឡី ជាពិសេសភរិយាលោក គឺអ្នកស្រី ប៊ូ រចនា បដិសេធដាច់អហង្កា។ នៅត្រង់ចំណុចជំពាក់ប្រាក់នេះ គេមិនដែលឃើញអាជ្ញាធរ ឬតុលាការកម្ពុជា បញ្ជាក់ថា ជាការពិត និងបានកើតឡើងយ៉ាងដូចម្ដេចនោះទេ។
«ស្នើឲ្យមានការចូលរួម ពីអ្នកជំនាញអន្តរជាតិ...»
ឃាតកម្មបាញ់សម្លាប់លោក កែម ឡី បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីអ្នកស្រាវជ្រាវរូបនេះ បានធ្វើការពន្យល់ពីរបាយការណ៍មួយ របស់អង្គការឃ្លាំមើលពិភពលោក (ហៅជាភាសាអង់គ្លេស Global Witness) ដែលនិយាយពីការរកស៊ីមានបាន ក្នុងទឹកប្រាក់ច្រើនរយលានដុល្លារ របស់ក្រុមគ្រួសារផៅសន្ដាន របស់លោកនាយករដ្ឋមន្ត្រី ហ៊ុន សែន នៅក្នុងវិស័យធំៗសំខាន់ៗ ដែលល្បីល្បាញថាជាវិស័យ ដែលសម្បូរដោយអំពើពុករលួយ។
ក្នុងសេចក្ដីថ្លែងការណ៍ របស់ក្រុមអង្គការសង្គមស៊ីវិលទាំង១០៧ស្ថាប័ន បានអំពាវនាវបន្ត ស្នើឲ្យមានការស៊ើបអង្កេតដោយឯករាជ្យ ដោយមានការចូលរួម ពីសំណាក់អ្នកជំនាញអន្តរជាតិ រួមជាមួយការបង្ហាញភស្តុតាង ឲ្យបានពេញលេញ ក្នុងនោះមានទាំងវីដេអូ នៃកាមេរ៉ាសុវត្ថិភាព នៅក្នុងស្ថានីយប្រេងឥន្ទនៈ របស់ក្រុមហ៊ុនកាល់តិចនោះផង។
ក្រុមអង្គការសង្គមស៊ីវិលទាំងនោះ បានលើកឡើងថា បើនៅតែគ្មានការស៊ើបអង្កេត ដោយឯករាជ្យទេ នោះជំនឿទុកចិត្តរបស់សាធារណជន ទៅលើប្រព័ន្ធយុត្តិធម៌ អាចនឹងកាន់តែបាត់បង់ថែមទៀត ហើយលោក កែម ឡី ក្រុមគ្រួសារ មិត្តភក្តិ និងសហការីរបស់លោក នៅតែមិនទទួលបានយុត្តិធម៌ដដែល៕