ភ្នំពេញ៖ សាលាដំបូងរាជធានីភ្នំពេញ បានសម្រេចដោះលែងយុវជន៤នាក់ ឲ្យនៅក្រៅឃុំជាបណ្តោះអាសន្ន បន្ទាប់ពីធ្វើ​ការពិចារណាអស់រយៈពេលពីរថ្ងៃ ទៅលើសំណើរសុំនៅក្រៅឃុំរបស់គ្រួសារយុវជនបួននាក់ ដែលតុលាការបាន​ធ្វើការ​ចោទប្រកាន់ពីបទ ញុះញង់ឲ្យប្រព្រឹត្តបទឧក្រិដ្ឋ ដែលអ្នកនាំពាក្យក្រសួងមហាផ្ទៃបានអះអាងថា មានចេតនា​ញុះញង់​ឲ្យ​កងកម្លាំងប្រដាប់អាវុធ ធ្វើរដ្ឋប្រហារផ្តួលរំលំរដ្ឋាភិបាល។

យុវជន ទុត ច័ន្ទបញ្ញា ដែលត្រូវបានដោះលែង ហើយផ្ដល់កិច្ចសម្ភាសខ្លីទៅអ្នកការសែត។ (រូបថត ហ្វេសប៊ុក)

នៅខាងមុខរបងពន្ធនាគារមណ្ឌលអប់រំកែប្រែទី១ និងទី២ ក្រុមយុវជនរបស់គណបក្សប្រឆាំង ប្រមាណជិត១០០នាក់ បានឈរចាំគាំទ្រការដើរចេញ ពីពន្ធនាគាររបស់យុវជនទាំង៤នាក់ និងរងចាំបំពាក់កម្រងផ្កា ប៉ុន្តែត្រូវបានបង្វៀងដោយ​ក្រុមមន្ត្រីពន្ធនាគារ។ ហើយរថយន្តរបស់អង្គការសិទ្ធិមនុស្សលីការដូ ដែលបានដឹកបុរសពីនាក់ចេញពីពន្ធនាគារ ត្រូវបាន​ក្រុមយុវជនគណបក្សសង្គ្រោះជាតិ ស្ទាក់កណ្តាលផ្លូវ ដោយបើករថយន្តទៅពាំងពីមុខនិងពីក្រោយ ដោយពួកគេគិតថា​មានគេលួចរំដោះ តត់ ច័ន្ទបញ្ញា ប៉ុន្តែស្ថានការណ៍បានធូរស្រាលវិញ បន្ទាប់ពីលោក ហូរ វណ្ណ តំណាងរាស្ត្រគណបក្ស​សង្គ្រោះជាតិ បានចេញមុខទៅពន្យល់ក្រុមយុវជនទាំងនោះ។

សុខ ដាលីស អាយុ ២៨ ឆ្នាំ បានថ្លែងប្រាប់អ្នកសារព័ត៌មាន បន្ទាប់ពីបានដឹកពីពន្ធនាគារព្រៃស មកដល់ទីស្នាក់ការ​របស់​អង្គការលីកាដូ បានថ្លែងឲ្យដឹងថា នាងមានការសប្បាយចិត្ត ដែលតុលាការបានសម្រេចដោះលែងនាង ឲ្យមានសេរីភាព​នៅក្រៅឃុំ ហើយសម្តែងនូវការអគុណ ចំពោះការខំប្រឺងប្រែងរបស់យុវជនទាំងអស់ ដើម្បីឲ្យរូបនាងមានសេរីភាពវិញ។ នាងបានបញ្ជាក់ថា ៖ «ខ្ញុំត្រូវបានដោះលែងឲ្យនៅក្រៅឃុំ ប៉ុន្តែនៅជាប់បទចោទដដែល។ ប៉ុន្តែខ្ញុំនឹងនិយាយ​នៅថ្ងៃក្រោយ ដោយសារតែពេលនេះខ្ញុំនឿយហត់។»

ចំនែកឯលោក តត់ ច័ន្ទបញ្ញា បានថ្លែងឲ្យដឹងយ៉ាងខ្លីថា លោកសប្បាយចិត្ត ដែលបានដោះលែងឲ្យរួចខ្លួន ប៉ុន្តែលោកមិន​បាន​ផ្តល់បទសម្ភាសន៍ឲ្យបានទេ ដោយសារលោកពុំទាន់មានអារម្មណ៍ល្អនៅឡើយ។ លោកបានថ្លែងឲ្យដឹងទៀតថា៖ «ខ្ញុំ​មិនបានធ្វើខុសទេ»។

រីឯអ្នកស្រី ចាន់ សេដ្ឋា អាយុ ៥០ ត្រូវជាម្តាយយុវជន ទុត ច័ន្ទបញ្ញា បានថ្លែងនៅខាងមុខពន្ធនាគារ នៅខណៈខ្ចប់បាយ​យកទៅឲ្យកូន របស់អ្នកស្រីនោះបានថ្លែងឲ្យដឹងថា អ្នកស្រីសប្បាយចិត្ត ដែលតុលាការបានសម្រេចដោះលែង កូន​អ្នកស្រី​ឲ្យមានសេរីភាពវិញ អាចជូបជុំគ្រួសារនៅ និងបានត្រឡប់ចូលរៀនវិញ។ អ្នកស្រីបានសម្ដែងទឹកចិត្តថា ៖ «នៅពេលនេះ​ខ្ញុំសប្បាយចិត្ត ដែលកូនបានចូលរៀនវិញ ចំនែករឿងបទចោទនោះ ខ្ញុំមិនថាយ៉ាងម៉េចទេ តែអ្វីដែលសំខាន់​គ្នាបានចូល​រៀនវិញ»។

លោក សេង នាង ចៅក្រមកាន់ក្នុងសុំណុំរឿងនេះ ពុំអាចទំនាក់ទំនងដើម្បីធ្វើការអត្ថាធិប្បាយបានទេ។

សូមរម្លឹកថា យុវជនទាំង ៤ នាក់ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី ១៥ ខែសីហា ដែលក្នុងចំណោមនោះ មាន​ពីរនាក់ ម្នាក់ឈ្មោះ ទុត ច័ន្ទបញ្ញា អាយុ ៣០ ឆ្នាំ និងសុខ ដាលីស អាយុ ២៨ ឆ្នាំ ត្រូវបានចាប់ខ្លួននៅពេលដែលពួកគេ ទៅ​ទទួលផ្កា ១ ពាន់ទង ពីជនមិនស្គាល់មុខម្នាក់ នៅផ្សារធំថ្មី ដើម្បីយកទៅចែកជូនកងកម្លាំង ដែលត្រូវបានដាក់ពង្រាយ​នៅ​ក្នុងទីក្រុងភ្នំពេញ បន្ទាប់ពីមានការទាក់ទងគ្នា ជាមួយជនមិនស្គាល់មុខនោះតាមហ្វេសប៊ុក។ ចំណែកពីរនាក់ផ្សេងទៀត ឈ្មោះ ហ៊ើយ បូរិន និង ឡុង លីផេង ត្រូវបានចាប់ខ្លួននៅកន្លែងផ្សេង។ អ្នកទាំងបួន ត្រូវតុលាការរាជធានីភ្នំពេញ ចោទ​ប្រកាន់កាលពីថ្ងៃសៅរ៍ ពីបទញុះញង់ឲ្យប្រព្រឹត្តបទឧក្រិដ្ឋ នៃមាត្រា ៤៩៥ ក្រមព្រហ្មទណ្ឌ ដែលអាចជាប់ពន្ធនាគារពី ៦ ខែដល់ ២ ឆ្នាំ និងពិន័យជាប្រាក់រហូតដល់ ៤ លានរៀល។

ចំនែកឯលោក កែវ សាមឌី ដែលជាអ្នកសរសេរ blogger តាមរយៈ Online Media និងជាមិត្តភ័ក្តដែលធ្វើការជាមួយ ទុត ច័ន្ទបញ្ញា ជាច្រើនឆ្នាំមកហើយនោះ បានថ្លែងឲ្យដឹងថា លោកស្វាគមន៍ចំពោះការដោះលែងយុវជនទាំងបួននាក់ ឲ្យមាន​សេរីភាពវិញ ហើយលោកជឿជាក់ថាសកម្មភាព ដែលពួកគេបានធ្វើនោះ គឺពុំមានកំហុសទាល់តែសោះ។

លោក សាមឌី បានថ្លែងទៅកាន់អ្នកសារព័ត៌មានថា៖ «នៅក្នុងប្រទេសសង្គមលទ្ធិប្រជាធិបតេយ្យ គឺគាត់មានសិទ្ធិពេញ​លេញ ក្នុងការចូលរួមសកម្មភាពនយោបាយ ជាពិសេសគឺយុវជន។ ហើយអ្វីដែលពួកគាត់បានធ្វើ គឺពុំមានជាសកម្មភាព​ក្នុងនិន្នាការនយោបាយនោះទេ គឺគាត់ធ្វើសកម្មភាពបែបមនុស្សធម៌ប៉ុណ្ណោះ ពីព្រោះនៅឆ្នាំ២០០៨មាន​ការចល័តទ័ព​ទៅ​កាន់ព្រំដែន។ ដូច្នេះនៅពេលនេះ ពេលឃើញមានការចល័តទ័ពនៅក្នុងទីក្រុង យុវជនគាត់ចង់បង្ហាញ ពីទឹកចិត្តស្រលាញ់​របស់យុវជនទៅកាន់បងៗសមត្ថិកិច្ច ហើយចង់បង្ហាញទៅរដ្ឋាភិបាល ឲ្យស្វែងរកដំណោះស្រាយ នៅតាមនិតិវិធី​ច្បាប់​តាមបែប ប្រទេសកាន់លទ្ធិប្រជាធិបតេយ្យ។»។

លោក ហូរ វណ្ណ តំណាងរាស្ត្រអតីតគណបក្សសមរង្ស៊ី និងជាមន្ត្រីជាន់ខ្ពស់គណបក្សសង្គ្រោះជាតិ បានថ្លែងឲ្យដឹង នៅ​ខណៈរងចាំអ្នកទាំងបួន នៅខាងមុខពន្ធនាគារព្រៃសថា លោកសប្បាយចិត្ត ដែលអ្នកទាំងបួនត្រូវបានដោះលែង ឲ្យមាន​សេរីភាពវិញ ប៉ុន្តែលោកនៅតែមានការសោកស្តាយ ដោយសារអ្នកទាំងបួន ពុំបានលើកលែងបទចោទនោះទេ គឺគ្រាន់តែ​ដោះលែងឲ្យនៅក្រៅឃុំតែប៉ុណ្ណោះ។ លោកបានឲ្យដឹងទៀតថា ៖ «ខ្ញុំសូមអំពាវនាវ ឲ្យតុលាការធ្វើការពិនិត្យឡើងវិញ​ទាក់ទិនទៅនឹងបទចោទប្រកាន់នោះ ពីព្រោះអ្នកទាំងនោះគ្មានកំហុសអ្វីនោះទេ គឺគ្រាន់តែជាប់ពាក់ព័ន្ធរូបសញ្ញាសួន សេរីរដ្ឋា មួយ មិនអាចចាប់មនុស្សមកដាក់គុកកើតនោះទេ ហើយសួន សេរីរដ្ឋា ក៏បានបដិសេធទៀត ថាអ្នកទាំងបួន ពុំ​មែនជាសកម្មជនរបស់ខ្លួននោះទេ ហើយការចាប់យុវជននេះ ប្រៀបដូចជាការគំរាមបំបាក់ស្មារតី របស់យុវជន​តែ​ប៉ុណ្ណោះ»។

រីឯលោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូ ដែលបានផ្តល់មេធាវីការពារក្តី ឲ្យជន​រងគ្រោះបានថ្លែងឲ្យដឹងថា លោកស្វាគមន៍ ចំពោះចំណាត់ការរបស់តុលាការ ដែលបានសម្រេចដោះលែង​យុវជន​ទាំង​បួននាក់ ឲ្យនៅក្រៅឃុំ។ ប៉ុន្តែលោកនៅតែមានការសោកស្តាយ ដោយសារតែអ្នកទាំងបួននាក់នោះ នៅតែមានបទចោទ​ប្រកាន់នៅក្នុងតុលាការ។ លោកបានថ្លែងឲ្យដឹងថា ៖ «ក្នុងនាមសង្គមស៊ីវិល ខ្ញុំសុំអំពាវឲ្យតុលាការធ្វើការពិចារណារ ក្នុងការទម្លាក់ការចោទប្រកាន់ រឺក៏លើកលែងការចោទប្រកាន់ ទៅយុវជនទាំងបួននាក់នោះ។ ពីព្រោះយុវជនពីរនាក់ ដែល​ទៅយកផ្កាមិនមានពាក់ព័ន្ធ ទៅលើខិតប័ណ្ណទេ គឺគាត់ទៅយកផ្កាដូចអ្វី ដែលបាននិយាយនៅក្នុងហ្វេសប៊ុករបស់គាត់ ដើម្បីយកផ្កាទៅជូនកងកម្លាំង ដើម្បីសុំភាពសុខសន្តិភាព និងដើម្បីកុំឲ្យប្រើប្រាស់អំពើហឹង្សា ទៅលើប្រជាពលរដ្ឋ ដូច្នេះ​វាជារឿងទូទៅ វាមិនពាក់ព័ន្ធរឿងនយោបាយនោះទេ។ ចំណែកឯម្ចាស់ហាងហ្វូតូកូពី គាត់ពុំដឹងរឿងទេ ដោយគាត់ជា​ម៉ូយជាមួយក្រុមហ៊ុនអាតូមិក ដែលធ្លាប់ហ្វូតូកូពីពីពេលមុនៗ»។

តាមសេចក្តីប្រកាសព័ត៌មានមួយកាលពីថ្ងៃសៅរ៍ របស់អ្នកនាំពាក្យនគរបាលជាតិបានអះអាង ថាយុវជនទាំងនោះ បាន​ធ្វើការផ្សព្វផ្សាយខិត្តប័ណ្ណ តាមបញ្ជារបស់ឈ្មោះ សួន សេរីរដ្ឋា ដែលជាប្រធានចលនាអំណាចពលរដ្ឋខ្មែរ ហើយជាអ្នក​ធ្លាប់បង្កើតកងកម្លាំងប្រដាប់អាវុធខុសច្បាប់ ប្រឆាំងរដ្ឋាភិបាល ហើយការចាប់ខ្លួនជនសង្ស័យទាំងនេះ គឺក្នុងខណៈ​ដែល​ពួកគេកំពុងធ្វើសកម្មភាពផលិត និងចែកចាយ ដោយរួមមានវត្ថុតាង ជាខិត្តប័ណ្ណច្រើនរយសន្លឹក៕

-----------------------------------------------------
ដោយ គិន ង៉ុយ - ភ្នំពេញ ថ្ងៃទី២០ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ