នាយកដ្ឋាននគរបាលព្រហ្មទណ្ឌកម្រិតធ្ងន់ នៃក្រសួងមហាផ្ទៃ បាននឹងកំពុងធ្វើការកោះហៅ ជាបន្តបន្ទាប់ចំពោះ​អ្នក​របួស និងក្រុមគ្រួសារអ្នកបាត់បង់ជីវិត ក្រោយការផ្ទុះអាវុធ (គ្រាប់ពិត) របស់អាជ្ញាធរកម្ពុជា នៅផ្លូវវេងស្រេងកាល​ពី​ថ្ងៃទី៣ ខែមករា ឆ្នាំ២០១៤ ចូលមកសាកសួរបំភ្លឺ ជានីតិវិធីដំបូង មុននឹងបញ្ជូនសំណុំរឿងនេះទៅកាន់តុលាការ។ លោក ឡឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ បានបញ្ជាក់ថា នីតិវិធីដំបូងនេះ ដើម្បី​ផ្តល់​នូវយុត្តិធម៌ ជូនដល់គ្រួសារជនរងគ្រោះ។

ស្នាមឈាមដែលបន្សល់ទុក នៅលើដី បន្ទាប់បីការប្រឈមមុខប្រកបដោយឈាម រវាងកងកម្លាំងសមត្ថកិច្ច និងបាតុករ។ (រូបថត MONOROOM.info/ O.Vary)

ប្រព័ន្ធយុត្តិធម៌ - បងថ្លៃរបស់សពយុវជនអាយុ ២៥ឆ្នាំឈ្មោះ យាន រិទ្ធី មកពីស្រុកព្រះស្ដេច ខេត្តព្រៃវែង លោក សួន ណារ៉ា បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថា នគរបាលព្រហ្មទណ្ឌកម្រិតធ្ងន់ នៃក្រសួងមហាផ្ទៃបាន​ហៅ​ឲ្យចូលបំភ្លឺ នៅថ្ងៃទី២៦ ខែមីនា ខាងមុខ ទាក់ទងនឹងការស្លាប់របស់ប្អូនថ្លៃរបស់លោក។ លោកបន្តថា លោកនឹងចូល​បំភ្លឺតាមការកោះហៅនេះ តែមិនទាន់ដឹងច្បាស់ទេ ថាតើក្រសួងមហាផ្ទៃចង់ដឹងពីអី។ លោកបានថ្លែងយ៉ាងខ្លីថា «បើ​គេ​សួរអី ឆ្លើយហ្នឹងទៅ»។

សម្រាប់ លោក សំ សារី ត្រូវជាបងប្រុសជនរងគ្រោះ ដែលជាយុវជនអាយ២៣ឆ្នាំ ឈ្មោះ ផេង កុសល មកពី ស្រុក​បាធាយ ខេត្តកំពង់ចាម បានបញ្ជាក់ថា លោកមិនបានចូលទៅតាមការណាត់នោះទេ ព្រោះ​ជាប់រវល់កិច្ចការ​ចាំចាប់​ផ្ទាល់ខ្លួន ហើយលោកនឹងចូលទៅបំភ្លឺនៅពេលក្រោយវិញ។ លោកបានទទួលដីកាកោះ ពីនគរបាល​ព្រហ្មទណ្ឌ​កម្រិតធ្ងន់នៃក្រសួងមហាផ្ទៃ ឲ្យ​ចូលបំភ្លឺជុំវិញការស្លាប់របស់ប្អូនប្រុស កាលពីថ្ងៃទី១៨ ខែមីនាកន្លងមកនេះ។

ដោយឡែក ឪពុករបស់ជនរងគ្រោះអាយុ២៩ឆ្នាំ ឈ្មោះ គឹម ផល្លាត មកពីខេត្តកំពង់ស្ពឺ លោកសួស សំអុល បាន​បញ្ជាក់នៅថ្ងៃនេះ បន្ទាប់ពីលោកបានចូលទៅបំភ្លឺកាលពីថ្ងៃទី២០ ខែមីនាម្សិលម៉ិញរួចមក ថា ខាងនគរបាល​គ្រាន់​តែសាកសួរពីសាវតា ប្រវត្តិការងារ ការស្នាក់នៅ និងហេតុការណ៍ដែលកើតឡើងនាពេលនោះប៉ុណ្ណោះ។ ដោយមាន​អមដំណើរ ដោយមេធាវីមកពីអង្គការការពារសិទ្ធិមនុស្ស លីកាដូន នោះផង ឪពុករបស់ជនរងគ្រោះរូបនេះ បានឆ្លើយ​ថា លោកមិនបានដឹងពីរឿងហេតុ យ៉ាងណានោះទេ។ តែលោកសួស សំអុល បានស្រង់សំដីនគរបាល​នៅពេល​សាកសួរនោះ មកនិយាយថា «សំណងរដ្ឋប្បវេណីត្រូវតែមាន។ គេនឹងបញ្ជូនទៅដល់ដៃតុលាការ។ គេគ្រាន់តែ​ជា​អ្នកកាប់ឆ្កាព្រៃទេ ហើយនិងហៅជាបន្តបន្ទាប់ ទាំងអ្នកស្លាប់ និងអ្នករបួស។»

សម្រាប់អ្នកស្រី ហាស់ សំនៀង ត្រូវជាភរិយាលោក គឹម ផល្លាត បានប្រាប់នគរបាលក្នុងពេលសាកសួរនោះ ថានៅ​ថ្ងៃកើតហេតុ លោក គឺម ផល្លាត គ្រាន់តែបាននិយាយតាមទូរស័ព្ទ ប្រហែលម៉ោងប្រាំបី​ព្រឹកថា «គាត់នឹង​ចូលរួមធ្វើ​បាតុកម្ម ទាមទារតំឡើងប្រាក់ខែ១៦០ដុល្លាដែរ។ (…) លុះម៉ោងជាង១០ព្រឹក ក៏ហៅលែងចូល។ ទើបរសៀល​ម៉ោង​ពីរ បានទទួលដំណឹងថាប្តីត្រូវបានគេបាញ់ស្លាប់។»

ទោះជាយ៉ាងនេះក៏ដោយ ក៏នៅមានគ្រួសារម្នាក់ក្នុងចំណោមគ្រួសារនៃជនរងគ្រោះទាំងបួននាក់ នៅមិនទាន់បាន​ទទួលដីកាកោះនោះនៅឡើយ។ អ្នកស្រី ឈីវ ផានិត ភរិយាជនរងគ្រោះអាយុ២៥ឆ្នាំ ឈ្មោះ កង រ៉ាវី  មកពីខេត្តតាកែវ ដែលមិនទាន់ត្រូវបានក្រសួងមហាផ្ទៃកោះហៅទៅសាកសួរនេះ បានបង្ហាញក្ដីសង្ឃឹមថា អ្នកស្រីនឹងត្រូវ​ក្រសួង​មហាផ្ទៃ ហៅនៅពេលណាមួយ ដូចគ្រួសារបីខាងលើជាក់ជាមិនខាង។

តាមការបញ្ជាក់របស់លោក ឡឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និងជាអ្នក​ទទួល​បន្ទុក ក្នុងការសារសួរសាច់ញាតិនៃជនរងគ្រោះ និងអ្នកដែលបានបាត់បង់ជីវិតនៅផ្លូវវេងស្រេង បានបញ្ជាក់ប្រាប់​ទស្សនាវដ្តីមនោរម្យ.អាំងហ្វូ ថា លោកបានចេញដីកាកោះហៅនោះ មានចំនួនប្រាំមួយគ្រួសារ ទៅតាមការចង្អុល​បង្ហាញរបស់តុលាការ ក្នុងការសាកសួរជាជំហានទីមួយ។ លោកបន្តរថា មកទល់នឹងពេលនេះ ទើបមានគ្រួសារនៃ​អ្នកស្លាប់តែម្នាក់គត់ (គ្រួសាជនរងគ្រោះ ឈ្មោះ គឹម ផល្លាត) ដែលបានចូលមកភ្លឺ។ លោកនៅមិនទាន់ដឹងថា ត្រូវ​ចេញដីកាកោះហៅថែម ឬយ៉ាងណានោះទេ ដោយត្រូវពិនិត្យទៅលើភាពជាក់ស្តែង ថានឹងត្រូវធ្វើការកោះហៅ​អ្នក​ណាទៀត ក្រោយពេលសាកសួរបានគ្រប់គ្នាហើយនោះ។ សំរាប់អ្នកទទួលដីការហើយ មិនទាន់បានចូលមក​បំភ្លឺ​តាមការកំណត់ ត្រូវបានលោកបញ្ជាក់ថា «អាចចូលនៅពេលក្រោយក៏បាន។ ពេលណាក៏បានដែរ បើមិនរវល់នោះ ឬថ្ងៃច័ន្ទនេះក៏បានដែរ មិនទាស់ខុសអីនោះទេ។»

លោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ បានបញ្ជាក់ប្រាប់ទស្សនាវដ្តី ថា ក្រសួង​មហាផ្ទៃ ជាសេនាធិការរបស់ព្រះរាជអាជ្ញា។ ព្រះរាជអាជ្ញា ជាដើមបណ្តឹងអាជ្ញា តំណាងឲ្យសាធារណៈជនទូទៅ។ ទោះជាគ្មានពាក្យបណ្តឹងក៏ដោយ ករណីមនុស្សស្លាប់ នៅវេងស្រេង ព្រះរាជអាជ្ញាអាចចាត់ឲ្យសេនាធិការ​ធ្វើការ​សាកសួរ ទៅលើអ្នកដែលពាក់ព័ន្ធទាំងអស់។ លោកបន្តរថា សម្រាប់អ្នកស្លាប់នៅផ្លូវវេងស្រេងទាំងនោះ ដែល​បាន​ដាក់ពាក្យបណ្តឹងមកឲ្យអង្គការលោក ឲ្យជួយអន្តរាគមរកយុត្តិធម៌ លោកបន្តអន្តរាគមតាមច្បាប់ ដូចជាបាន​ចាត់តាំង​មេធាវីម្នាក់ ដើម្បីអមជាមួយនឹងការសាកសួរនេះ (ជាក់ស្តែងជាមួយគ្រួសារសពលោកគឹម ផល្លាត ដែលទើប​នឹងត្រូវ​បានក្រសួងមហាផ្ទៃកោះសួរ)។

ទោះយ៉ាងណាក្តី មន្រ្តីសិទ្ធិមនុស្សរូបនេះបានបន្តថា លោកគ្មានជំនឿលើការស្វែងរកយុត្តិធម៌ របស់ក្រសួងមហាផ្ទៃ​នោះទេ បើពួកគាត់នៅតែគ្មានឆន្ទៈដោះស្រាយ ជូនជនរងគ្រោះពិតប្រាកដនោះ។ លោកបានថ្លែងបញ្ជាក់ថា «ស្ពាន​អាកាសក្បាលថ្នល់ បាញ់ស្លាប់មួយ របួសជាច្រើន។ គល់ស្ពានស្ទឹង មានជ័យស្លាប់មួយ របួសជាច្រើន។ (…) មក​ទល់​ពេលនេះ មិនទាន់មានឃើញជនល្មើសណាមួយ ដែលត្រូវនាំទៅតុលាការ ដើម្បីធ្វើការផ្តន្ទាសទោសតាមច្បាប់ទេ ក្រៅពលរដ្ឋត្រូវបានគេចាប់ និងដាក់ពន្ធនាគាររហូតមកទល់ពេលនេះ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២១ មីនា ២០១៤