អ.ស.ប. បរិហារពីការបំបិតសិទ្ធិ លើក្រុមប្រឆាំងនៅកម្ពុជា
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី០៧ កញ្ញា ២០១៦
- កែប្រែចុងក្រោយ: September 07, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
«នៅក្នុងរយៈពេលប៉ុន្មានថ្ងៃចុងក្រោយនេះ មានការចល័ត បង្ហាញកម្លាំងរបស់កងទ័ពកម្ពុជា នៅក្បែរទីស្នាក់ការធំ របស់គណបក្សសង្គ្រោះជាតិ។ កិច្ចអន្តរាគមន៍នេះ ក៏ដូចជាការលើកឡើង ក្នុងពេលថ្មីៗនេះ ដោយមេដឹកនាំជាន់ខ្ពស់ របស់កងទ័ព ដែលបានធ្វើការស្បថស្បែ ថានឹងការពារគណបក្សកាន់អំណាច ទល់នឹងចលនាប្រឆាំងបែបនយោបាយនោះ មានលក្ខណៈគួរឲ្យបារម្ភជាទីបំផុត។» នេះជាការថ្លែង របស់អ្នកស្រី រ៉ាវីណា សាមដាសានី (Ravina Shamdasani) អ្នកនាំពាក្យរបស់ស្នងការជាន់ខ្ពស់ របស់អង្គការសហប្រជាជាតិ ទទួលបន្ទុកខាងសិទ្ធិមនុស្ស ចេញពីទីក្រុង ហ្សឺណែវ ប្រទេសស្វីល នៅក្នុងសន្និសីទសារព័ត៌មានមួយ កាលពីថ្ងៃអង្គារម្សិលម៉ិញ។
ផ្ដើមចេញពីការព្រួយបារម្ភ ដែលត្រូវបានបង្ហោះផ្សាយជាផ្លូវការ នៅលើគេហទំព័រ របស់អង្គការពិភពលោកមួយនេះ អ្នកនាំពាក្យស្នងការជាន់ខ្ពស់ បានថ្លែងរំលឹកទៅរដ្ឋាភិបាលកម្ពុជា ពីកាតព្វកិច្ចរបស់ខ្លួន ក្នុងការអនុវត្តន៍ និងធានាឲ្យបាន នូវសុវត្ថិភាពជូនដល់ពលរដ្ឋកម្ពុជាគ្រប់រូប ជាពិសេសជូនដល់ក្រុមអ្នកនយោបាយ បើទោះជាពួកគេមាននិន្នាការបែបណាក្ដី។ អ្នកស្រី រ៉ាវីណា បានលើកយកមកថ្លែង ពីករណីអនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ លោក កឹម សុខា ដែលកំពុងត្រូវញាំញីដោយសំនុំរឿងក្ដីក្ដាំ នៅឯតុលាការជាមួយនឹងសមាជិក និងអ្នកគាំទ្រចំនួន២៩នាក់ផ្សេងទៀត ក្នុងនោះមាន១៤នាក់ ត្រូវបានផ្ដន្ទាទោស ឲ្យជាប់ពន្ធនាគារយ៉ាងធ្ងន់ធ្ងរ។
អ្នកស្រីបានបន្តថា៖ «ការដាក់បន្ទុកទៅលើពួកគេ ដែលមិនមានទំងន់ និងភាពខុសប្រក្រតី នៃដំណើរនីតិវិធី បានបង្កើតឲ្យមានការព្រួយបារម្ភយ៉ាងខ្លាំង ពីភាពត្រឹមត្រូវ យុត្តិធម៌ ដែលទទួលបាន ពីការជំនុំជម្រះក្ដីទាំងនេះ»។
អ្នកនាំពាក្យបានថ្លែងទៀតថា៖ «យើងសូមជំរុញទៅអាជ្ញាធរ (កម្ពុជា) ឲ្យគោរពយ៉ាងខ្ពាប់ខ្ជួន នូវការជំនុំជម្រះក្តីដោយត្រឹមត្រូវ តាមស្តង់ដារអន្តរជាតិ ក្នុងនីតិវិធីព្រហ្មទណ្ឌ រួមទាំងការធានាឱ្យមានតម្លាភាព ក្នុងការគ្រប់គ្រងរដ្ឋបាល របស់ប្រព័ន្ធតុលាការ»។
មន្ត្រីជាន់ខ្ពស់ របស់អង្គការសហប្រជាជាតិរូបនេះ ក៏បានលើកយកមកបញ្ជាក់ដែរ ទាក់ទងនឹងការបិតផ្លូវមួយចំនួន នៅក្នុងរាជធានីភ្នំពេញ កាលពីព្រឹកថ្ងៃចន្ទ ពីសំណាក់អាជ្ញាធរ បន្ទាប់ពីមានការប្រកាស របស់ក្រុមអ្នកគាំទ្រគណបក្សប្រឆាំង ក្នុងការដាក់ញត្តិ និងការដង្ហែដោយ«សន្តិវិធី» នូវញត្តិទាំងនោះ ទៅដាក់នៅតាមបណ្ដាស្ថានទូតបរទេសមួយចំនួន ប្រចាំនៅប្រទេសកម្ពុជា។ អ្នកស្រី រ៉ាវីណា សាមដាសានី បានបន្តថា៖ «អាជ្ញាធរបានឃាត់ខ្លួន មនុស្ស១០នាក់ នៅក្នុងព្រឹត្តិការណ៍ សំដែងមតិដាច់ដោយឡែកមួយ និង១០នាក់ទៀត ក្នុងការជួបជុំគ្នាមួយផ្សេង នៅរាជធានីភ្នំពេញ»។
អ្នកស្រីបានថ្លែងថា៖ «យើងសូមជំរុញឲ្យរដ្ឋាភិបាល (កម្ពុជា) ឲ្យបង្កើតនូវបរិយាកាល សម្រាប់ការអាស្រ័យផល នៃសេរីភាព "នៃការបញ្ចេញមតិ - ការជួបជុំដោយសន្តិវិធី និងការបង្កើតអង្គការសមាគម" ដែលជាសារៈសំខាន់ដ៏ពិសេស នៅក្នុងបរិបទមុនការបោះឆ្នោតឃុំសង្កាត់ ឆ្នាំ២០១៧ និងបោះឆ្នោតជាតិ ឆ្នាំ២០១៨ មកដល់»៕