នៅពេលដែលការតវ៉ា ឬការដង្ហែក្បួន ដែលគណបក្សសង្គ្រោះជាតិអះអាង ថាត្រូវបានធ្វើឡើងដោយសន្តិវិធី បែរ​ជា​រង​ការ​រំពឹងទុក ពីការផ្ទុះអំពើហិង្សា...

ស្ថានទូតសហរដ្ឋអាមេរិក បានចេញសេចក្ដីជូនដំណឹងមួយ កាលពីយប់ថ្ងៃទី០៤ ខែកញ្ញានេះ ព្រមានទៅ​ពលរដ្ឋ​​អាមេរិក ដែលកំពុងរស់នៅ និងកំពុងធ្វើដំណើរទៅកាន់ប្រទេសកម្ពុជា ឲ្យជៀសវាងការ​ជួបជុំ​នយោបាយ របស់គណបក្សសង្គ្រោះជាតិ ដែលអាចផ្ទុះទៅជាអំពើហិង្សា នៅក្នុងថ្ងៃទី៥ ខែកញ្ញានេះ។ កន្លែង​ដែល​ស្ថានទូត​អាមេរិក បានព្រមានពលរដ្ឋខ្លួនឲ្យជៀសវាងទៅក្បែរនោះ មាននៅទីស្នាក់ការកណ្ដាល របស់​គណបក្ស​សង្គ្រោះ​ជាតិ (នៅតំបន់ជុំវិញ) និងនៅជុំវិញសាលាដំបូងរាជធានីភ្នំពេញ ដែលស្ថិតនៅលើមហាវិថី សម្តេច​មុនីរ៉េត។

នៅ​ព្រឹក​​ថ្ងៃ​ចន្ទ​ទី ៥ ខែកញ្ញា ក្រុមតំណាងរាស្ត្រ​គណបក្ស​សង្គ្រោះ​ជាតិ មានគម្រោង​យក​ញត្តិ​ ទៅ​ដាក់​នៅតាម​ស្ថានទូត ​របស់បណ្ដា​ប្រទេស​ម្ចាស់​ហត្ថលេខី ​នៃ​កិច្ចព្រមព្រៀង​សន្តិភាព​ទីក្រុង​ប៉ារីស​ថ្ងៃទី ២៣ ខែតុលា ឆ្នាំ ១៩៩១។ បើទោះជាមានការហាមឃាត់ ពីសំណាក់អាជ្ញាធរក៏ដោយ ក៏ក្រុមមន្ត្រីគណបក្សប្រឆាំង នៅតែរក្សា​ជំហរ ក្នុងការដាក់ញត្តិនោះ ជាមួយនឹងការដង្ហែ ចេញពីទីស្នាក់ការរបស់គណបក្ស នៅក្នុងសង្កាត់ចាក់​អង្រែ​លើ នៅវេលាម៉ោង១០ព្រឹក។

» ការប្រកាសប្រកាន់ជំហរ របស់មន្ត្រីគណបក្សប្រឆាំង៖

ទំនងជាបណ្ដាលមកពីភាពប្រទាំងប្រទើសខាងលើនេះហើយ ដែលបង្កក្ដីបារម្ភទៅដល់ស្ថានទូតបរទេស ជា​ពិសេស​ស្ថានទូត​អាមេរិកតែម្ដង។ ​នៅលើទំព័រហ្វេសប៊ុករបស់ស្ថានទូត នៃប្រទេសមហាអំណាចមួយនេះ បាន​សរសេរ​បញ្ជាក់​ដូច្នេះថា បើសូម្បីតែការតវ៉ា ឬការជួបជុំនោះ ធ្វើឡើងតាមបែប​សន្តិវិធីក៏ដោយ តែ​ការសង្ស័យ​ពី​ការ​ប្រឈម​មុខ​​ដាក់គ្នា និង​អំពើហិង្សា ត្រូវបានរំពឹងថា ​នឹងអាច​កើតមាន។​ ហើយដើម្បីសុវត្ថិភាពផ្ទាល់ខ្លួន ពលរដ្ឋ​អាមេរិក​ត្រូវជៀសចេញ ពីកន្លែងបាតុកម្ម ឬពីការជួបជុំនោះ និង​ត្រូវ​តាមដាន​រាល់សេចក្តីជូនដំណឹង​ជា​បន្ត​បន្ទាប់ ​របស់​​ស្ថានទូត​​អាមេរិក​​ប្រចាំ​នៅ​កម្ពុជា​​៕