ហ្វូងខ្លាបានខាំស៊ីសម្លាប់ស្ត្រីម្នាក់ និងធ្វើឲ្យរបួស ដល់ស្ត្រីម្នាក់ទៀត កាលពីថ្ងៃសៅរ៍ម្សិលម្ងៃនេះ នៅក្នុង​សួន​សត្វដ៏ធំមួយ ឈ្មោះ «Badaling Wildlife World» ស្ថិតនៅក្បែររដ្ឋធានីប៉េកាំង ប្រទេសចិន។ រឿងរ៉ាវ​​បាន​​កើត​ឡើង ដោយសារជម្លោះមួយ នៅក្នុងគ្រួសារនៃស្ត្រីទាំងពីរនាក់។ ប៉ុន្តែហេតុការណ៍ជម្លោះ បាន​បញ្ចប់​ទៅ ដោយ​ក្លាយទៅជារឿង ដ៏អាណោចអាធម និងដ៏សោកសៅបំផុត សម្រាប់ស្ត្រីទាំងពីរ។

សារព័ត៌មានអង់គ្លេស «The Telegraph» បានឲ្យដឹងថា បន្ទាប់ពីបានឈ្លោះគ្នា នៅក្នុងរថយន្ដរួច ស្ត្រី​​ម្នាក់​​បាន​ចុះ​ចេញ​ពី​រថយន្ដ ដើម្បីទៅជជែកតវ៉ា ជាមួយនឹងស្ត្រីម្នាក់ទៀត។ តែនាងមិនចូលទៅជជែក ក្នុងរថយន្ដ​ភ្លាមៗ​នោះ​ទេ រហូតនាងត្រូវបានខ្លាសង្គ្រប់ពីក្រោយ ចាប់អូសទាញចេញទៅ។ នៅចំពោះហេតុការណ៍នេះ ស្ត្រី​ម្នាក់​ទៀត បាន​ចេញមកពីក្នុងរថយន្ដ ដើម្បីទៅជួយនាង ប៉ុន្តែគឺស្ត្រី (ដែលចេញទៅក្រោយ) នេះហើយ ដែលត្រូវ​បាន​​ខ្លា​​មួយ​​ក្បាល​​ផ្សេងសង្គ្រប់ និងខាំសម្លាប់។

ស្ត្រី ដែលចេញពីរថយន្ដដំបូង ត្រូវបានសង្គ្រោះទាន់ពេល តែបានរងរបួសធ្ងន់ធ្ងរ។ ខណៈនេះ នាងកំពុង​សម្រាក​ព្យាបាល នៅឯមន្ទីរពេទ្យ។

នៅត្រង់តំបន់នោះ ដែលសម្បូរដោយសត្វសាហាវៗ គេបានអនុញ្ញាតឲ្យទេសចរណ៍ អាចធ្វើចរាចរណ៍​រថយន្ដ​បាន ដើម្បី​អាចទស្សនា នូវទិដ្ឋភាពដោយផ្ទាល់ ដូចជាការឆ្លងកាត់​របស់សត្វទាំងនោះ នៅតាមដងផ្លូវ​ជា​ដើម។ ប៉ុន្តែក្រុមអ្នកទេសចរណ៍ ត្រូវបានព្រមានជាមុនហើយ ពីបម្រាម«ហាមដាច់ខាត មិនឲ្យចុះពីរថយន្ដ»​ឡើយ។

នាពេលនេះ សួនសត្វនោះត្រូវបានអាជ្ញាធរ​បញ្ជាឲ្យបិទទ្វា​ជាបណ្ដោះអាសន្ន។ ប៉ុន្តែផ្ទុយទៅវិញ នៅ​លើ​គេហទំព័រ​​ផ្លូវការ ឬនៅលើបណ្ដាញសង្គម ដែលមានទំព័រផ្លូវការ​របស់សួនសត្វនេះ មិនមានអះអាង ឬប្រកាស​ព័ត៌មាន ពី​ហេតុ​ភេទ​អ្វីសូម្បីបន្តិច៕