បើជាខ្លួនអ្នកវិញ តើអ្នកគិតថា ត្រូវដោះស្រាយរបៀបណា នៅចំពោះការភ្ជង់កាំភ្លើង មករកខ្លួនអ្នកនោះ? ចំពោះ​កងកម្លាំងនគរបាលវិញ ដំណោះស្រាយដែលសមស្រប គឺត្រូវប្រើប្រាស់អាវុធ ជាកាំភ្លើងត្រឡប់ទៅវិញ ដើម្បី​បង្ក្រាប​ជន​ល្មើសបែបនេះ។ ដំណោះស្រាយរបៀបនេះ មិនមែនសម្រាប់ជនស៊ីវិលធម្មតា នោះឡើយ (ព្រោះ​ជន​ស៊ីវិល គ្មាន​កាំភ្លើងទេ) ហើយការតដៃណាផ្សេង ទោះជាជនស៊ីវិលនោះ មានកាំបិត ឬដំបងជាអាវុធ​ក៏​ដោយ ពិត​ជា​ការប្រថុយប្រថានមួយ។

តែបុរសម្នាក់ ជាបុគ្គលិកអ្នកលក់ នៅក្នុងហាងលក់គ្រឿង ឧបភោគបរិភោគមួយនេះ បានជ្រើសរើស​ការ​បណ្ដេញ ចោរប្លន់ប្រដាប់អាវុធទាំងពីរនាក់ ដែលបិតមុខ ចូលមកប្លន់ហាងនាយ ដោយប្រើ... ដាវដ៏«ធំ»​មួយ។ ឈុត​ឆាកនេះ ត្រូវបានថតជាប់ ដោយកាម៉េរ៉ាសុវត្ថិភាព បង្ហាញពីសកម្មភាពដកដាវរបស់បុរស រត់សំដៅ​ចោរ​ប្លន់​ទាំងពីរ ម្នាក់កាន់ដាវតូច ម្នាក់ទៀតកាន់កាំភ្លើង ហាក់ដូចជាបុរសម្នាក់នេះ ចេះវិជ្ជាគុនដាវដល់កំពូល រហូតធ្វើឲ្យចោរភ័យ រត់បាតជើង​ស​ព្រាត។

ហេតុការណ៍បានកើតឡើង នៅក្នុងក្រុង «Pittsburgh» នៃរដ្ឋ «Pennsylvanie» សហរដ្ឋអាមេរិក កាលពី​ថ្ងៃ​សុក្រសប្ដាហ៍មុន។ នេះបើតាមការអះអាង របស់បណ្ដាញទូរទស្សន៍ CNN។ នៅចំពោះការសម្លុតគម្រាម ដើម្បី​ប្លន់យកប្រាក់នោះ បុរសជាអ្នកគិតលុយ នៅក្នុងហាងនេះ បានសម្រេចចិត្តបណ្ដេញចោរទាំងពីរ ដោយបាន​ដកដាវមួយដើមចេញមក គ្រវីដាក់ក្រុមជនល្មើស។ នៅពេលគេចខ្លួនចេញទៅវិញ ចោរម្នាក់ ត្រូវបានអតិថិជន​មួយរូប ដែលចូលមកទិញទំនិញ ព្យាយាមឃាត់ខ្លួន តែមិនបានសម្រេច។

មកដល់ពេលនេះ នគរបាលក្រុង «Pittsburgh» បានបើកការស៊ើបអង្កេតមួយ ដើម្បីស្វែងរកជនបិទមុខ​ទាំងពីរ៕