កាលពីថ្ងៃទី២៣ ខែមិថុនា ម្សិលម៉ិញនេះ លោក ឈាង វុន អ្នកនាំពាក្យរដ្ឋសភា បានលើកឡើងដូចគ្នា ទៅនឹង​ការបញ្ជាក់ របស់លោកនាយករដ្ឋ ហ៊ុន សែន នាពេលកន្លងមកនេះថា ច្បាប់សម្រាប់គ្រប់គ្រង អង្គការក្រៅ​រដ្ឋាភិបាល ចាំបាច់ត្រូវតែមាន ព្រោះដល់ពេលវេលា សម្រាប់រដ្ឋធ្វើការគ្រប់គ្រង ទៅលើអង្គការទាំងនោះ តាម​ច្បាប់មួយជាក់លាក់ហើយ។

សម្រាប់អង្គការសង្គមស៊ីវិល ជាតិ និងអន្តរជាតិ ចំនួនជិត៤០០អង្គការ ដែលកំពុងមានសកម្មភាព ជួយសង្គម​នោះ បានបដិសេធ និងច្រានចោលនូវច្បាប់នេះ ដែលពួកគេគិតថា មានការកាត់បន្ថយនូវសិទ្ធិ និងសេរីភាព​របស់ប្រជាពលរដ្ឋ ពិសេសកិច្ចដំណើរការ ក្នុងស្ថាប័នអង្គការរបស់ពួកគេ។ ហើយតាមច្បាប់ថ្មីនេះ អង្កការ​មួយ​ចំនួន អាចឈានទៅរកការបិទចោល ដោយស្វ័យប្រវត្ត។

ចំពោះសេចក្តីព្រាងច្បាប់នេះ បើទោះជាមានការអះអាងដោយតំណាងរដ្ឋាភិបាលថា បានឆ្លងកាត់ការពិគ្រោះ​យោបល់ និងសិក្ខាសាលានានា ជួយអង្គការសង្គមស៊ីវិល នាពេលកន្លងមកគ្រប់គ្រាន់ក៏ដោយ ក៏អង្គការ​សមាគម សង្គមស៊ីវិលទាំងនោះ បានអះអាងថា ព្រាងច្បាប់នោះមិនមានការកែប្រែ ឬទទួលយកនូវអនុសាស្រ្ត របស់ពួកគេឡើយ។

មន្ត្រីជាន់​ខ្ពស់​មួយរូប ពីអង្គការការពារសិទ្ធិមនុស្ស លីកាដូ (Licadho) លោក អំ សំអាត បានលើកឡើងថា ច្បាប់​នេះជាផ្នែកមួយ នៃការហាមឃាត់សង្គមស៊ីវិល ធ្វើសកម្មភាពត្រួតពិនិត្យ ការអនុវត្តច្បាប់ និងការគោរព​សិទ្ធិ​មនុស្ស ដែលអនុវត្តដោយមន្រ្តីសាធារណៈរបស់រដ្ឋ ពិសេសលើប្រព័ន្ធតុលាការ។

ប្រធានគណបក្សសង្គ្រោះជាតិ លោក សម រង្ស៊ី បានគាំទ្រនូវការលើកឡើងរបស់សង្គមស៊ីវិល ដោយច្រាន​ចោល នូវការអះអាងរបស់តំណាងរដ្ឋាភិបាល ទាមទារឲ្យមានដាច់ខាត នូវច្បាប់នេះ។ លោក សុន ឆៃ តំណាង​រាស្ត្រមកពីគណបក្សប្រឆាំង ក៏បានបញ្ជាក់ដែរថា បើរដ្ឋាភិបាលចង់បានច្បាប់នេះ អាចធ្វើទៅបាន តែក៏ត្រូវ​ទទួលយកអនុសាស្រ្តរបស់សង្គមស៊ីវិល និងសេចក្តីព្រាងច្បាប់ ស្តីពីសមាគម និងអង្គការក្រៅរដ្ឋាភិបាល​របស់​គណបក្សសង្គ្រោះជាតិ ទៅពិនិត្យនិងពិចារណារទាំងអស់គ្នា។

រដ្ឋធម្មនុញ្ញកម្ពុជា មាត្រា៤២ បានចែងថា៖ «ប្រជាពលរដ្ឋខ្មែរ មានសិទ្ធិបង្កើតសមាគម និង គណបក្ស​នយោបាយ» មាត្រានោះក៏បានបញ្ជាក់ចុងក្រោយបន្ថែមថា៖ «សិទ្ធិនេះ ត្រូវកំណត់ក្នុងច្បាប់»។ រីឯត្រង់​មាត្រា​៣៥ បានចែងថា៖ «ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្ម ក្នុងជីវភាពនយោបាយ សេដ្ឋកិច្ច សង្គមកិច្ច និង វប្បធម៌របស់ប្រទេសជាតិ។ សេចក្ដីស្នើទាំងឡាយ របស់ប្រជាពលរដ្ឋ ត្រូវបានទទួលការ​ពិនិត្យ និង ដោះស្រាយយ៉ាងហ្មត់ចត់ ពីអង្គការរដ្ឋ។» ឯមាត្រា៤៩ ក៏ចែងបន្ថែមទៀតថា៖ «ប្រជាពលរដ្ឋខ្មែរ​គ្រប់​រូប ត្រូវគោរពរដ្ឋធម្មនុញ្ញ និង គោរពច្បាប់។ ប្រជាពលរដ្ឋខ្មែរគ្រប់រូប មានកាតព្វកិច្ចរួមចំណែក កសាង​ប្រទេស​ជាតិ និង ការពារមាតុភូមិ។»

សេចក្តីព្រាងច្បាប់របស់រដ្ឋាភិបាល ស្តីពី សមាគម និងអង្គការក្រៅរដ្ឋាភិបាលនេះ មានចំនួន៣៩មាត្រា និង​៩ជំពូក ។ ទស្សនាវដ្តីមនោរម្យ.អាំងហ្វូ សូមធ្វើការចុះផ្សាយនូវសេវក្តីព្រាងច្បាប់នេះ ដែលបានចូលដល់​ដៃ​រដ្ឋសភា​ទាំងស្រុង ដូចខាងក្រោម៖