គូស្នេហ៍លួចលាក់ពីរនាក់ភ្ញាក់ខ្លួន ព្រោះពួកគេជាបងប្អូនបង្កើត!
- ដោយ: សេក មនោរកុមារ អត្ថបទ ៖ សេក មនោរកុមារ ([email protected]) - ប៉ារីស ថ្ងៃទី ២២ ឧសភា ២០១៥
- កែប្រែចុងក្រោយ: May 23, 2015
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
យុវជន លី និង ផូល បានជួបទាក់ទងគ្នា នៅតាមបណ្ដាញអ៊ិនធើណែត។ អស់រយៈពេល២ឆ្នាំ ពួកគេទាំងពីរ បានផ្ញើរឲ្យគ្នាទៅវិញទៅមក នូវសារអេឡិចត្រូនិក នៃភាសាស្នេហាជាច្រើន មុននឹងសម្រេចចិត្ត ចូលដល់ទំនាក់ទំនងដោយផ្ទាល់ ដៃនៅក្នុងដៃ និងឈានទៅដល់ ការរួមរ័ក្សភិសម័យ ជាមួយគ្នា។ តាំងពីពេលនោះមក អ្នកទាំងពីរបាននៅជាមួយគ្នារហូត លែងបែកគ្នាសោះតែម្ដង ហើយគ្រោងនឹងរៀបការ ជាមួយគ្នាទៀត។ ប៉ុន្តែរឿង ដែលនឹកស្មានមិនដល់មួយ បានកើតឡើង...
ក្រុមគ្រសាររបស់ លី បានជួបជាមួយយុវជន ផូល គូស្នេហ៍ស្រឡាញ់គ្នា ចាក់ទឹកមិនលេចរបស់ លី។ រំពេចនោះ ពួកគេបានកត់សម្គាល់ឃើញ មុខមាត់របស់ ផូល មានលក្ខណៈដូចគ្នា ទៅនឹងអតីតស្វាមី (ប្ដីមុន) នៃម្ដាយរបស់យុវជន លី។
ដើម្បីដឹងពីរឿងនេះច្បាស់ ប្រុសស្នេហ៍ទាំងពីរ បានស្នើសុំទៅកម្មវិធីមួយ របស់ទូរទស្សន៍អង់គ្លេស មានឈ្មោះថា «Jeremy Kyle Show» ដើម្បីធ្វើការត្រួតពិនិត្យ «តេស្ត៍ ADN»។ ពិធីករនៃកម្មវិធីទូរទស្សន៍នេះ បានសង្ខេបប្រវត្តិស្នេហ៍របស់អ្នកទាំងពីរថា៖ «លោកអ្នកបានរួមរ័ក្សជាមួយ មនុស្សដែលលោកអ្នកស្រឡាញ់ ហើយលោកអ្នក គិតថានឹងរៀបការជាមួយគ្នា... តែនៅទីបំផុត មានមនុស្សផ្សេង បានប្រកាសប្រាប់លោកអ្នកថា លោកអ្នកជាបងប្អូនបង្កើត នឹងគ្នា» មុននឹងពិធីករបានប្រកាសថា បុរសទាំងពីរ គឺពិតជាបងប្អូនបង្កើត ដែលចេញពីម្ដាយតែមួយ និងឪពុកដោយខ្លួន។
ម្ដាយបានប្រតិកម្មភ្លាមៗ
លី និង ផូល បានសម្ដែងក្ដីទោមនស្សរបស់ពួកគេ ទៅនឹងការរកឃើញនេះ។ លី បាននិយាយថា៖ «រឿងនេះ ធ្វើឲ្យខ្ញុំឈឺចាប់ណាស់។ ខ្ញុំមិនអាចរកអ្វី មកនិយាយបានទេ។»
ផូល ដែលមើលឃើញ ពន្លឺព្រះអាទិត្យមុន លី ត្រូវបានបញ្ជូន ទៅឲ្យទារកដ្ឋានមួយចិញ្ចឹម តាំងពីកុមារនេះ (ផូល) មានអាយុ១៨ខែ។ បន្ទាប់មកប៉ុន្មានខែ ទារក លី ក៏បានកើតឃើញពន្លឺថ្ងៃ តាមក្រោយដែរ។ និយាយមកជារួម អ្នកទាំងពីរ មានឪពុកផ្សេងទីទៃ និងមានម្ដាយតែមួយ គឺអ្នកស្រី អេណា (Ena)។ អ្នកស្រី អេណា បានប្រតិកម្មភ្លាម នៅពេលដែលអ្នកស្រីដឹងថា កូនទាំងពីររបស់អ្នកស្រី បានរួមរ័ក្សជាមួយគ្នា ក្នុងនាមជាជនស្រឡាញ់ភេទដូចគ្នា។ ប៉ុន្តែយ៉ាងណាក៏ដោយ អ្នកស្រីបានសម្ដែងក្ដីរំភើបថា អ្នកស្រីសប្បាយរីករាយណាស់ ដែលបានដឹងមកវិញថា លី ជាកូនរបស់អ្នកស្រី។
ហេតុការណ៍នេះ បានកើតឡើង តាំងពីឆ្នាំ២០១២ម្លេះ តែត្រូវបានទូរទស្សន៍ចាក់ផ្សាយឡើងវិញ កាលពីថ្ងៃព្រហស្បត្តិ៍សប្ដាហ៍មុន ដើម្បីអបអរខួប១០ឆ្នាំ នៃកម្មវិធីដែលសម្បូរមនុស្ស ចូលចិត្តទស្សនា មួយនេះ។ បើតាមពិធីកររបស់កម្មវិធី បានឲ្យដឹងទៀតថា បុរសទាំងពីរបានបញ្ឈប់ ចំណងស្នេហ៍របស់ពួកគេ តែបានក្លាយជា បងប្អូនប្រុសពីរនាក់ ដែលកាត់បំបែកលែងបាន៕
» ខាងក្រោមនេះ ជាវីដេអូ នៃកម្មវិធី «Jeremy Kyle Show» ដែលនិយាយពី យុវជន ផូល និង លី៖