ប្រវត្តិនៃការបង្ហូរឈាម មុនក្លាយជា«ទិវាពលកម្មអន្តរជាតិ»
ជារៀងរាល់ឆ្នាំ នៅថ្ងៃទី១ ខែឧសភា ប្រទេសមួយចំនួនធំនៅក្នុងពិភពលោក មិនដែលភ្លេចប្រារព្ធ ទិវាពលកម្មអន្តរជាតិឡើយ។ តើទិវានេះមានប្រវត្តិ និងអត្ថន័យខ្លឹមសារបែបណាខ្លះ? សូមលោកអ្នកអញ្ចើញតាមដាន អត្ថបទស្រាវជ្រាវមួយ ដែលដកស្រង់ពីឯកសារជាច្រើន មកជម្រាបជូនដូចខាងក្រោម៖
អត្ថន័យ
«ទិវាពលកម្ម ឬទិវាបុណ្យការងារ អន្តរជាតិ» ត្រូវបានគេហៅឈ្មោះម្យ៉ាងទៀតថា ទិវាមួយឧសភា។ ទិវានេះត្រូវបានគេប្រារព្ធឡើង នៅជុំវិញពិភពលោក តាមរយៈការដង្ហែក្រុមហ្វូងមនុស្សជាច្រើន នៅតាមដងផ្លូវ ដោយមានកាន់បដា និងបន្លឺពាក្យពេចន៍នានា ក្នុងន័យបង្ហាញ រំលឹក ឬទាមទារទៅនិយោជក រដ្ឋាភិបាល និងមហាជនផ្សេងទៀត ឲ្យគោរពសិទ្ធិបុគ្គលិក កម្មករ ឬនយោជិតស្របតាម ច្បាប់ការងាររបស់ប្រទេស ក៏ដូចជាច្បាប់ការងារអន្តរជាតិ។
ទិវានេះត្រូវបានប្រារព្ធឡើង ដោយចលនាពលកម្មអន្តរជាតិ រួមនិងចលនាឆ្វេងនិយម [...]
