តំណាងរាស្រ្ត មកពីគណបក្សសម្លេងភាគតិច ក្នុងរដ្ឋសភា លោក ម៉ៅ មុនីវណ្ណ បានធ្វើការអះអាងថា បើទោះជាតំណាង​រាស្រ្ត គណបក្សសង្គ្រោះជាតិ ក្នុងរដ្ឋសភាខ្វះសម្លេង ត្រឹមតែប្រាំពីរនាក់ក៏ដោយ តែសមាជិកតំណាងរាស្រ្ត គណបក្ស​កាន់​អំណាច ដែលនឹងមើលឃើញដែរថា ពិតជាមានការបាត់បង់ទឹកដី ឬការបកស្រាយនោះ ខុសពិការពិត ហើយអាចនឹង​«គាំទ្រ» ក្នុងការស្នើញ្ញត្តិបន្ទោស ដកសេចក្តីទុកចិត្តបាន។

ការថ្លែងរបស់លោកតំណាងរាស្ត្ររូបនេះ បន្ទាប់ពីលោក ហោ ណាំហុង រដ្ឋមន្ត្រីការបរទេសកម្ពុជា បានថ្លែងក្នុង​កម្មវិធី​តុ​មូល របស់ទីស្តីការគណៈរដ្ឋមន្រ្តី កាលពីថ្ងៃទី២១ ខែឧសភា ម្សិលម៉ិញនេះថា ការឆ្លើយតបលិខិត ទៅតំណាងរាស្រ្ត​គណបក្ស​សង្គ្រោះជាតិ រឿងព្រំដែនកម្ពុជា-វៀតណាមនៅឃុំជាំ ស្រុកមេមត់ ខេត្តត្បូងឃ្មុំ នោះ មិនមែនជាការធ្វើឡើង ដោយ​«អត្តនោម័ត»របស់លោក តែម្នាក់នោះទេ។ លោក ណាំហុង ថែមទាំងបានអះអាង នៅក្នុងកម្មវិធីនោះថា អ្វីដែល​លោក​បានឆ្លើយតបនោះ ក៏យោងតាមមាត្រាពីរ នៃរដ្ឋធម្មនុញ្ញនោះដែរ។ លោកបានទទួលស្គាល់ថា៖ «ការការពារ​ព្រំដែន​កម្ពុជា បូរណភាពទឹកដីកម្ពុជា មិនមែនជាសិទ្ធិផ្តាច់មុខរបស់បុគ្គលណាមួយ ឬគណបក្សណាមួយទេ»។

ឆ្លើយតបនឹងការអះអាងខាងលើ ក្នុង លោក ម៉ៅ មុនីវណ្ណ តំណាងរាស្រ្តខេត្តត្បូងឃ្មុំ បានបញ្ជាក់ ក្នុងកិច្ចសម្ភាស ជាមួយ​ទស្សនាវដ្តីមនោរម្យ.អាំងហ្វូ ក្នុងថ្ងៃទី២២ ខែឧសភានេះ បានបង្ហាញថា លោកចង់ឲ្យមានការបង្ហាញ នូវការពិត តាមរយៈ​ការលាតត្រដាង នូវឯកសារ ដែលតំណាងរដ្ឋាភិបាល បានយកមកធ្វើ ជាគោលការណ៍គ្រឹះ ក្នុងការកំណត់ថា «ពលរដ្ឋ​កម្ពុជា ពិតជាបានបំពានលើដី របស់វៀតណាម»។

តំណាងរាស្រ្តមណ្ឌលកំពង់ចាមរូបនេះ បានពន្យល់ថា រាល់ការបកស្រាយ ឬដោះសារ វាមិនមែនជាមូលដ្ឋាន ក្នុងការ​បញ្ជាក់ «ការពិត»នោះឡើយ។ តែអ្វីដែលលោកចង់បាន ក៏ដូចជាប្រជាពលរដ្ឋទូទៅ ចង់ដឹងនោះ គឺលោក ហោ ណាំហុង ត្រូវ​តែបង្ហាញនូវផែនទី ជាមូលដ្ឋានមួយលើមួយរយពាន់ (ផែនទីខ្នាត ១/១០០.០០០ ធ្វើនៅចន្លោះឆ្នាំ១៩៣៣-១៩៥៣) ដែល​ខ្លួនកំពុងអះអាងថា ជាខ្នាតគោល ក្នុងការរៀបចំ ឲ្យមានការបោះបង្គោលព្រំដែន កំណត់ដោយឥណ្ឌូចិន និងកំពុង​ដំកល់​ទុក នៅអង្គការសហប្រជាជាតិ មកធ្វើការបង្ហាញជាសាធារណៈ។

លោក ម៉ៅ មុន្នីវណ្ណ បានថ្លែងឲ្យដឹងទៀតថា៖ «បើគាត់(ហោ ណាំហុង) ប្រើផែនទីណ្នឹងមែន មូលដ្ឋានណ្នឹងមែន ឲ្យគាត់​បង្ហាញមក បង្ហាញផែនទីនោះ ជាសាធារណៈមក។ (...) ហើយយើងយក និយាមការពិតប្រាកដ ទៅដាក់លើផែនទីនោះទៅ ឃើញហើយ ឃើញថា តើចំណុចព្រំដែនហ្នឹង វាអនុលោមទៅតាមផែនទី ដែលដំកល់នៅអង្គការសហប្រជាជាតិមែន ឬ​មិន​មែន។»

លោកបន្តថា តែរាល់ការអះអាង របស់លោក ហោ ណាំហុង ឬលោក វ៉ា គឹមហុង មិនដែលបានឃើញបង្ហាញ នូវផែនទីនោះ ជាសាធារណៈនៅឡើយទេ ក្រៅពីការលើកឡើង ដោយមាត់ទទេនោះ។ លោកក៏បាននាំពាក្យរបស់ លោក ហោ ណាំហុង ដែលបានលើក ក្នុងកិច្ចពិភាក្សាតុមូលម្សិលម៉ិញនេះថា ធម្មតាផែនទីមានតែមួយប៉ុណ្ណោះ ក្នុងការកំណត់បោះបង្គោល​ព្រំ​ដែននោះ។

ក្នុងនាមលោក ជាតំណាងឲ្យប្រជាពលរដ្ឋ លោក មុន្នីវណ្ណ បានថ្លែងទៀតថា៖ «ក្នុងផែនទីនោះ វាមានលេខសំគាល់​ផែន​ទី​តើ! បើសិនជាផែនទី ដែលគាត់ (លោក ហោ ណាំហុង) អះអាង ប្រាកដជាផែនទី មួយលើមួយរយពាន់ ដែលតំកល់ទុក នៅ​អង្គការសហប្រជាជាតិ ឬប្រទេសបារាំង។ (...) ផែនទីតែមួយ ចឹងវាគ្មានចំណុចណាមួយ ខុសពីមួយទេ នៃបង្គោលព្រំដែន​ហ្នឹង។ បើត្រូវនឹងនិយាមការណ៍ នោះវាចប់ហើយ។ កន្លងមក រដ្ឋាភិបាលអះអាងថា ប្រើប្រាស់ផែនទី មួយលើមួយរយពាន់ តែមិនដែលបានបង្ហាញ ពីផែនទីហ្នឹងទេ។»

ទោះយ៉ាងនេះក្តី ក៏ក្នុងកិច្ចពិភាក្សាតុមូល របស់មន្រ្តីជាន់ខ្ពស់ របស់រាជរដ្ឋាភិបាល លោក ហោ ណាំហុង នៅតែបង្ហាញថា សន្ធិសញ្ញាបំពេញបន្ថែម ឆ្នាំ២០០៥ ដែលមានលោកនាយករដ្ឋមន្រ្តី ហ៊ុន សែន ជាម្ចាស់ហត្ថលេខីនោះ មិនបានធ្វើឲ្យ​បាត់ប​ង់​ទឹកដីកម្ពុជាទេ។ លោករដ្ឋមន្ត្រីការបរទេស បានសំអាងថា កម្ពុជាបានគោរពតាមផែនទីខ្នាត ១/១០០០០០ ក្នុង​ការ​កំណត់​បោះបង្គោល លេខ៩៤ និង៩៥ ទៅតាមខ្សែព្រំដែនជាក់ស្តែង ដែលប្រជាពលរដ្ឋកម្ពុជា បានកំពុងកាន់កាប់ ស្រប​តាម​កិច្ច​ព្រម​ព្រៀង​ឆ្នាំ២០១១។ លោក នៅតែបង្ហាញការការពារ លើលិខិតរបស់លោក ដែលបានសរសេរថា៖ «ថ្មីៗ​នេះ​ក្នុង​ឆ្នាំ២០១៥ ពលរដ្ឋយើង បានដាំដំណាំចូលដីវៀតណាម ចំនួន១៦,៦ហិកតាថែមទៀត ដែលនាំឲ្យវៀតណាម មាន​ប្រតិកម្ម​​បាញ់ថ្នាំពុល លើដីដំណាំកសិករយើង»៕