បុរសជនជាតិអាល្លឺម៉ង់នេះ មានឈ្មោះ ស្មីតប៊័រ វ័លហ្គាន (Schmidberg Wolfgang) អាយុ ៥៤ឆ្នាំ ស្នាក់នៅផ្ទះលេខ២០E ផ្លូវ៥៩៤ សង្កាត់ បឹងកក់២ ខណ្ឌទួលគោក រាជធានីភ្នំពេញ មានប្រពន្ធ ជាជនជាតិខ្មែរ។ ជនរងគ្រោះ ត្រូវបានប្រទះ​ឃើញ​ដេកស្លាប់ កាលពីវេលាម៉ោង ៤និង៥០ នាទីព្រឹក ថ្ងៃទី០៨ ខែមេសា ឆ្នាំ២០១៥ នៅក្នុងបន្ទប់សង្គ្រោះបន្ទាន់ នៃ​មន្ទីរពេទ្យ សាកលវិទ្យាល័យ អន្ដរជាតិសែនសុខ ដែលមានទីតាំង ស្ថិតនៅតាមបណ្តោយផ្លូវ ១៩៨៦ភ្នំពេញថ្មី ក្នុង​សង្កាត់​ភ្នំពេញថ្មី រាជធានីភ្នំពេញ។

បើទោះជាឈុតឆាក នៅកន្លែងកើតហេតុ មានសភាពដូចទៅនឹងការធ្វើអត្តឃាត តែអំពើឃាតកម្ម នៅតែជាការ​សង្ស័យ​នៅឡើយ។ ការសង្ស័យនេះ បើតាមការពិនិត្យទៅលើរូបភាព កាំភ្លើងដែលជាប់ នៅនឹងដៃសាកសព។ សមត្ថកិច្ចបាន​ឱ្យដឹងថា ជនរងគ្រោះ បានមកសំរាកព្យាបាល នៅបន្ទប់លេខ២២២ ក្នុងមន្ទីរពេទ្យខាងលើ ត្រូវបានគ្រូពេទ្យប្រទះ​ឃើញ​ស្លាប់ ដោយមានកាំភ្លើងនៅនឹងដៃ ម៉ាកប៉េអាម៉ាប់ ១គ្រាប់ ត្រូវរបួសចំសៀតថ្កា ផ្នែកខាងស្ដាំ ធ្លុះទៅសៀតថ្កា ខាងឆ្វេង ហើយសមត្ថកិច្ចពាក់ព័ន្ធ កំពុងធ្វើកោសល្យវិច័យ ទៅលើសាកសព និងស្រាវជ្រាវពីបច្ចេកទេស ក្នុងការបាញ់កាំភ្លើង​នេះ។

ប្រភពព័ត៌មាននៅនឹងកន្លែង បានឲ្យដឹងថា ជនរងគ្រោះ គឺជាអ្នកមានលុយកាក់ម្នាក់ ហើយមានប្រពន្ធជនជាតិខ្មែរឈ្មោះ ឃួន ស្រីមុំ អាយុ៤៧ឆ្នាំ ស្នាក់នៅជាមួយគ្នា ក្នុងរាជធានីភ្នំពេញ។ មុនពេលកើតហេតុ ជនរងគ្រោះតែងតែ មកព្យាបាល​ជម្ងឺ នៅក្នុងមន្ទីរពេទ្យនេះ ដោយមានប្រពន្ធខាងលើ ជាអ្នកមកមើលថែជានិច្ច។

រីឯអ្នកស្រី ឃួន ស្រីមុំ ប្រពន្ធជនរងគ្រោះវិញ បានបញ្ជាក់ថា ជនរងគ្រោះ មានជម្ងឺមហារីកពោះវៀន។ អ្នកស្រីបានបន្តថា កាលពីម៉ោ២ និង៣០នាទី អ្នកស្រីបានទៅសួរគ្រូពេទ្យ ពីអាការៈរបស់ប្តី តែត្រូវបានគ្រូពេទ្យប្រាប់ថា អ្នកជម្ងឺមិនឲ្យចូល​ទៅ​រំខានទេ រហូតដល់ម៉ោង៤ និង៥០នាទី ទើបពេទ្យហ៊ានចូលទៅមើល ក៏ស្រាប់តែប្រទះ ឃើញជនរងគ្រោះ ស្លាប់​បាត់បង់​ជីវិតទៅហើយ ដោយមានកាំភ្លើងនៅនឹងដៃ។

ហេតុការណ៍នេះ សមត្ថកិច្ចកំពុងស្រាវជ្រាវបន្ត ដើម្បីរកម្ចាស់កាំភ្លើង ដែលនៅក្នុងដៃជនរងគ្រោះ។ រហូតមកដល់​ពេល​នេះ សមត្ថកិច្ច បានហៅបុរសម្នាក់ ដែលត្រូវជាប្អូនថ្លៃឈ្មោះ ឃួន ពោធិ៍វង្ស អាយុ ៣៦ឆ្នាំ និងប្រពន្ឋជនរងគ្រោះខាងលើ ដើម្បីសាកសួរព័ត៌មានបន្ថែម ពីជនរងគ្រោះ។ បច្ចុប្បន្នសាកសពជនរងគ្រោះ បានតម្កល់នៅផ្ទះ របស់ខ្លួនខាងលើ ដើម្បី​ធ្វើ​បុណ្យ​តាមប្រពៃណី៕