បីនាក់ស្រាតជិះម៉ូតូ នៅស្រុកលើកដែក ត្រូវបានបណ្ដេញចេញពីកម្ពុជា (vdo)
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១៥ មករា ២០១៤
- កែប្រែចុងក្រោយ: January 16, 2015
- ប្រធានបទ: ពីនេះពីនោះ
- អត្ថបទ: មានបញ្ហា?
- មតិ-យោបល់
-
ជនបរទេសបីនាក់ ម្នាក់ជាជនជាតិអៀរឡង់ខាងជើង (ឬជនជាតិអង់គ្លេស) ម្នាក់ជាជនជាតិអ៊ីតាលី និងម្នាក់ទៀតជាជនជាតិហ្វាំងឡង់ ត្រូវបានអាជ្ញាធរកម្ពុជាចាប់ដាក់ឃុំពីរយប់ នៅក្នុងពន្ធនាគារខេត្តកណ្ដាល បន្ទាប់ពីពួកគេត្រូវបានឃាត់ខ្លួន ដោយនគរបាលប៉ុស្ដ៍រដ្ឋបាលពាមរាំង ក្នុងស្រុកលើកដែក ពីបទបានស្រាតននលគោក ជិះម៉ូតូនៅតាមផ្លូវសាធារណៈ។
វីដេអូដែលអ្នកសារព័ត៌មានទទួលបាន ហើយយកមកផ្សាយជាបន្តបន្ទាប់នោះ ថតដោយជនជាតិអៀឡង់ខាងជើង លោក គ្រាហ្វ័ត ប្រោន (CRAWFORD BROWN) អាយុ ២៣ឆ្នាំ ជនបរទេសម្នាក់ ក្នុងចំណោមពួកគេទាំងបី។ វីដេអូនោះ បានបង្ហាញឲ្យឃើញកញ្ញា កាតារីណា អាអាញ៉ូ (CATARINA AARNIO) ជនជាតិហ្វាំងឡង់អាយុ២២ឆ្នាំ មានខ្លួនននលគោក ជិះនៅពីក្រោយលោក ជាកាឡូ អាឡូកា (GIANCARLO ALLOCCA) អាយុ ៣០ឆ្នាំ ជាជនជាតិអ៊ីតាលី។
នគរបាលដែលបានចាប់ខ្លួនជនទាំងបី លោក ជួន ជុំកុល បានថ្លែងឡើងថា៖ «ពួកគេបើកម៉ូតូ មើលទៅគួរឲ្យសប្បាយណាស់»។ ភ្នាក់ងារនគរបាលរូបនេះ បានបន្តទៀតថា៖ «ខ្ញុំមិនអាចទុកឲ្យជនបរទេសទាំងនេះ ប្រព្រឹត្តិនូវទង្វើបែបនេះឡើយ បើទោះជាពួកគេមិនស្គាល់ពីប្រពៃណីទំនៀមទំលាប់របស់ប្រទេសយើងក៏ដោយ»។ ពួកគេទាំងបី បានរងនូវការចោទប្រកាន់ពីបទ «រំលោភប្រពៃណី និងវប្បធម៌នៃប្រទេសកម្ពុជា» និងប្រព្រឹត្តិនូវអំពើអានាចារ«អាសអាភាស» ហើយត្រូវបានបណ្ដេញចេញ ពីប្រទេសកាលពីថ្ងៃសៅរ៍មុន ដោយបញ្ជូនចេញទៅកាន់ប្រទេសថៃ។
» សូមអានអត្ថបទដែលទាក់ទង ដោយចុចនៅលើទីនេះ។
បន្ទាប់ពីមកដល់ប្រទេសថៃ យុវជន គ្រាហ្វ័ត បានសម្ដែងខមាទោសនៅចំពោះម្ដាយរបស់ខ្លួន តាមរយៈបណ្ដាញទាក់ទង ស្កាយ (Skype)។ ឪពុករបស់ គ្រាហ្វ័ត បាននិយាយប្រាប់សារព័ត៌មាន Daily Record ថា៖ «វាជារឿងដែលគួរព្រួយបារម្ភដែរ សម្រាប់ពួកយើង។ កូនខ្ញុំបានបង្ហាញនូវការសោកស្ដាយយ៉ាងខ្លាំង ដែលបានជ្រុលជ្រួសទៅលើប្រជាជនកម្ពុជា។ ប៉ុន្តែកូនខ្ញុំនេះ ជាមនុស្សល្អម្នាក់ ដែលគ្រាន់តែលេងជ្រុលពេកតែប៉ុណ្ណោះ។»
ផ្នែកអន្តោប្រវេសន៍របស់ប្រទេសកម្ពុជា បានដាក់ជនទាំងបីទៅក្នុងបញ្ជីខ្មៅ ដែលហាមមិនឲ្យចូលកម្ពុជា ជាលក្ខណៈអចិន្ត្រៃយ៍។ សូមបញ្ជាក់ដែរថា យុវជន គ្រាហ្វ័ត ដែលទើបនឹងបញ្ចប់ពីសកលវិទ្យាល័យកាលពីរដូវក្ដៅឆ្នាំកន្លងទៅ បានធ្វើដំណើរកំសាន្ដនៅពាសពេញប្រទេសនានាក្នុងភូមិភាគអាស៊ីអាគ្នេយ៍ តាំងពីខែវិច្ឆិកាមុននេះ។ ក្នុងពេលនេះ យុវជនជាតិអង់គ្លេសរូបនេះ កំពុងបន្ដការសប្បាយរបស់ខ្លួន នៅក្នុងប្រទេសឡាវ៕