រកឃើញតួយន្ដហោះ AirAsia ធ្លាក់ក្នុងសមុទ្រ ខណៈសាកសព៣ ទើបនឹងរកឃើញ (vdo)
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី៣០ ធ្នូ ២០១៤
- កែប្រែចុងក្រោយ: December 31, 2014
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
រហូតមកដល់ពេលនេះ មានសាកសពតែចំនួនបីនាក់ប៉ុណ្ណោះ ដែលត្រូវបានស្រង់ពីសមុទ្រ ហ្សារ៉ា (Java) ដោយក្រុមអ្នករុករកយន្ដហោះ បាត់ខ្លួនកាលពីថ្ងៃអាទិត្យ របស់ក្រុមហ៊ុនអាកាសចរណ៍ អ៊ែរអេសៀ (AirAsia)។ នេះជាការថ្លែងបញ្ជាក់ជាថ្មី របស់លោក ប៊ំបង សេលីស្ទីអូ (Bambang Soelistyo) នាយកទីភ្នាក់ងារជាតិ ខាងការរុករក និងជួយសង្គ្រោះរបស់ប្រទេសឥណ្ឌូនេស៊ី។ ការលើកឡើងរបស់លោកនាយករូបនេះ បានធ្វើឡើង បន្ទាប់ពីអ្នកទទួលខុសត្រូវមួយរូបផ្សេងទៀត នៃក្រុមរុករកបានថ្លែងប្រាប់ក្រុមអ្នកសារព័ត៌មានមុននេះថា គេបានស្រង់សាកសពបានជាង៤០នាក់ហើយ។
លោក ប៊ំបង សេលីស្ទីអូ បានថ្លែងឡើងថា៖ «នៅម៉ោង ០១ និង២៥នាទីរសៀល ថ្ងៃទី៣០ ខែធ្នូនេះ យើងបានឃើញវត្ថុអណ្ដែតឡើងជាច្រើន ដែលអាចជាសាកសពនៃជនរងគ្រោះ នៅលើយន្ដហោះ»។ ប៉ុន្តែនៅតាមបណ្ដាស្ថានីយ៍ទូរទស្សន៍ក្នុងស្រុក បានបង្ហាញរូបភាពធំៗរួចហើយ ពីសាកសពដែលអណ្ដែតលើផ្ទៃទឹក។
នាយកទីភ្នាក់ងាររុករក បានថ្លែងទៀតថា ស្រមោលខ្មៅមួយនៅបាតសមុទ្រ ហ្សាវ៉ា ត្រូវបានរកឃើញ។ ស្រមោលនោះ អាចជាស្រមោលរបស់តួយន្ដហោះ អ៊ែរអេសៀ ដែលបានបាត់ខ្លួន។ នៅមុននេះបន្ដិច នាយកការិយាល័យអាកាសចរណ៍ស៊ីវិល លោក ចូកូ មៀចាម៉ូចូ (Djoko Murjatmodjo) បានអះអាងប្រហាក់ប្រហែលគ្នា ទៅនឹងការរកឃើញនេះ។ លោក ចូកូ បាននិយាយថា៖ «ក្នុងពេលនេះ យើងអាចអះអាងថានោះ ជាតួយន្ដហោះ អ៊ែរអេសៀ ហើយរដ្ឋមន្ត្រីក្រសួងគមនាគមឥណ្ឌូនេស៊ី នឹងធ្វើដំណើរទៅកាន់ក្រុង ប៉ាញកាឡាន់ ប៊ុន (Pangkalan Bun) តំបន់ដែលតួយន្ដហោះ ត្រូវបានរកឃើញ»។
អ្នកជួយសង្គ្រោះច្រើននាក់ បានកំណត់អត្តសញ្ញាណពីវត្ថុជាច្រើន ដែលបានអណ្ដែតមកលើផ្ទៃទឹក មានដូចជាអាវការពារ និងពោងសម្រាប់ឲ្យជួយសង្គ្រោះជាដើម ថាសុទ្ធសឹងជាសម្ភារៈបំពាក់ឲ្យយន្ដហោះ អ៊ែរអេសៀ។ អ្នកនាំពាក្យកងទ័ពឥណ្ឌូនេស៊ី លោក អាហ្គូស វីពួត្រេនតូ (Agus Dwi Putranto) បានថ្លែងឡើងថា៖ «យើងបានរកឃើញ សម្ភារៈទាំងនេះមានប្រមាណជា១០ និងសម្ភារៈតូចៗជាច្រើនទៀតពណ៌ស។ យើងមិនអាចថតរូបសម្ភារៈតូចៗទាំងនោះបានទេ។»
យន្ដហោះធុនអ៊ែរប៊ូស ៣២០-២០០ (Airbus 320-200) របស់ក្រុមហ៊ុនអាកាសចរណ៍ អ៊ែរអេសៀ ដែលបានភ្ជាប់ជើងហោះហើរលេខ QZ8501 បានបាត់ពីការត្រួតពិនិត្យដែនអាកាស នៅម៉ោង៧និង៥៥នាទី ម៉ោងក្នុងស្រុក ព្រឹកថ្ងៃទី២៨ ខែធ្នូ បន្ទាប់ពីវាបានងើបខ្លួនហោះចេញ ពីព្រលានយន្ដហោះអន្តរជាតិក្រុង ស៊ូរ៉ាបាយ៉ា (Surabaya) បានរយៈពេល៤២នាទី ហោះឆ្ពោះទៅកាន់ប្រទេសសាំងហ្គាពួរ។ សូមបញ្ជាក់ដែរថា ក្រុង ស៊ូរ៉ាបាយ៉ា ជាទីក្រុងធំទីពីរ របស់ប្រទេសឥណ្ឌូនេស៊ី ៕
