អ្នកដំណើរជាតិប៉ូឡូញមួយរូប ដែលជិះនៅលើយន្ដហោះ រ៉ៃអានអ៊ែរ (Ryanair) ដែលហោះភ្ជាប់ពីទីក្រុងក្រាខូវី (Cracovie) ប្រទេសប៉ូឡូញ ទៅកាន់រដ្ឋធានី ឌុយប្លាំង (Dublin) ប្រទេសអៀឡង់ បានព្យាយាមបើកទ្វាក្រោយ របស់​យន្ដហោះ ព្រោះបានច្រឡំថា ជាទ្វាបង្គន់នៅលើយន្ដហោះ។

យន្ដហោះ របស់ក្រុមហ៊ុន រ៉ៃអានអ៊ែរ។ (រូបថត ឯកសារ)

ទស្សនាវដ្ដីមនោរម្យ.អាំងហ្វូ បានស្វែងរកព្រឹត្តិការណ៍ដ៏កម្រៗ កើតមានពីគ្រប់ទីកន្លែងក្នុងលោក មកជូន​ប្រិយ​មិត្ត​អ្នកអានរបស់ខ្លួន។

ជ្រួលច្របល់ - ត្រូវតែបង្កើតឲ្យមានជាបញ្ហា ទើបគេហៅថាសត្វមនុស្ស។ ហើយបើអាចធ្វើបាន គេគួរតែធ្វើការហាម​ឃាត់ ការផឹកសុរាជាតិស្រវឹង នៅលើយន្ដហោះដែលកំពុងហោះហើរ។ ថូម៉ាស មូឆា (Tomasz Mucha) ជាតិប៉ូឡូញ អាយុ២៦ឆ្នាំ ដែលជាជនពនេតចរមួយរូប គ្មានលំនៅដ្ឋានពិតប្រាកដ បានធ្វើការហោះហើរជាលើកដំបូង ក្នុងជីវិត​របស់ខ្លួន កាលពីថ្ងៃទី១១ ខែកក្កដាកន្លងទៅ ជាមួយនឹងយន្ដហោះ របស់ក្រុមហ៊ុន រ៉ៃអានអ៊ែរ ដែលហោះភ្ជាប់ក្រុង ក្រាខូវី និងរដ្ឋធានី ឌុយប្លាំង។ ដើម្បីបំភ្លេចការភ័យខ្លាច ក្នុងការធ្វើដំណើរថ្មីថ្មោង ជាមួយនឹងយន្ដហោះនោះ យុវជន​រូបនេះគិតតែពីសេព សុរា ដែលមានកម្លាំងខ្លាំង (vodka) នៅមុនពេលឡើងយន្ដហោះ។

តែសុរា មិនបានធ្វើឲ្យយុវជននេះ បាត់ភ័យនោះទេ។ ផ្ទុយទៅវិញ វាបានធ្វើឲ្យភ្នែកគាត់ស្រវាំង មើលមិនឃើញទ្វា​យន្ដហោះ តែគិតថាជាទ្វាបង្គន់។ យុវជនបានព្យាយាមបើកទ្វាក្រោយ នៃយន្ដហោះប៊ូអីង ៧៣៧ ដោយធាក់ផង​ទាត់​ផង ទៅលើទ្វាដែលមិនរបើកសោះនោះ ក្រោមក្រសែភ្នែកភ័យតក់ស្លុត ពីអ្នកដំណើរទាំងអស់ក្នុងយន្ដហោះ។ ប៉ុន្តែ​អ្នកបម្រើការលើយន្ដហោះ បានអន្តរាគមន៍ភ្លាមៗ ហើយបាននាំយុវជននេះ ឲ្យត្រឡប់ទៅអង្គុយវិញ។

ផាកពិន័យ ២០០ លីវ

នៅពេលយន្ដហោះចុះចត នៅព្រលានយន្ដហោះនៃរដ្ឋធានីឌុយប្លាំង យុវជននេះត្រូវបានឃាត់ខ្លួន ដើម្បីនាំទៅ​សាក​សួរ។ នៅក្នុងសវនាការ ដែលទើបនឹងធ្វើនៅដើមអាទិត្យនេះ ចៅក្រមបានសួរទៅយុវជនជាតិប៉ូឡូញថា៖ «អ្នកឯង​មានដឹងពីទំហំគ្រោះថ្នាក់ ដែលអ្នកបានធ្វើឬទេ?» យ៉ាងណាក៏ដោយ យុវជន ថូម៉ាស មូឆា បានទទួលស្គាល់ពីទំហំ​គ្រោះថ្នាក់ ហើយបានសារភាពពីទោសកំហុសខ្លួន ដែលបានដាក់ខ្លួន ទៅក្នុងភាពប្រមឹកជ្រុលបែបនេះ។ យុវជន ត្រូវ​បានផ្ដន្ទោទោស ឲ្យបង់ពិន័យនូវទឹកប្រាក់ ចំនួន២០០ លីវ (លុយអង់គ្លេស) ពីទោសកំហុស នៃការបើកទ្វា​បង្គន់​យន្ដហោះ​ច្រឡំ៕