ជំនួបប្រចាំឆ្នាំនៃបណ្ដាក្រុមហ៊ុនអាកាសចរណ៍ ក្នុងពិភពលោក ត្រូវបានធ្វើនៅថ្ងៃអាទិត្យទី០១ នេះ រហូតដល់​ថ្ងៃ​អង្គារទី០៣ ខែមិថុនាខាងមុខ នៅទីក្រុងដូហា នៃប្រទេសកាតា។ ប៉ុន្តែកិច្ចប្រជុំដ៏សំខាន់នេះ ទំនងជាត្រូវនិយាយ​ជុំ​វិញតែបញ្ហាដ៏អាថ៌កំបាំង និងគ្រោះថ្នាក់មិនដែលធ្លាប់មាន នៃយន្ដហោះប៊ូអីង របស់ក្រុមហ៊ុនអាកាសចរណ៍ ម៉ាឡេស៊ី​អ៊ែរឡាញ ដែលបានបាត់ខ្លួនកាលពីដើមខែមីនាកន្លងទៅ តែបានបន្សល់ទុកនូវការប៉ះទង្គិចយ៉ាងខ្លាំងមួយ សម្រាប់​វិស័យដឹកជញ្ជូនផ្លូវអាកាស។

យន្ដហោះ និងរូបសញ្ញារបស់សមាគមដឹកជញ្ជូនផ្លូវអាកាសអន្តរជាតិ។

បាត់យន្ដហោះ - មហាសន្និបាតលើកទី៧០ របស់សមាគមដឹកជញ្ជូនផ្លូវអាកាសអន្តរជាតិ ដែលហៅកាត់​តាមភាសា​អង់គ្លេសថា IATA និងជាបណ្ដុំក្រុមហ៊ុនអាកាសចរណ៍ប្រមាណជា ២៤០ក្រុមហ៊ុន ត្រូវជា៨៤% នៃវិស័យគមនាគមន៍​ផ្លូវអាកាសរបស់ពិភពលោក នឹងប្រារព្ធទិវាខួបលើកទី១០០ នៃការធ្វើពាណិជ្ជកម្មក្នុងវិស័យអាកាសចរណ៍។ ជំនួប​ដ៏ធំប្រចាំឆ្នាំនោះ នឹងត្រូវលើកមកពិភាក្សា នូវការបាត់ខ្លួនយ៉ាងអាថ៌កំបាំង របស់យន្ដហោះដែលភ្ជាប់ជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ។ យន្ដហោះ ដែលបានហោះចេញពីរដ្ឋធានីកូឡាឡំពួរ ឆ្ពោះទៅរដ្ឋធានីប៉េកាំង ជាមួយនឹងមនុស្ស២៣៩នាក់ នៅព្រឹកព្រហាមថ្ងៃទី៨ ខែមីនាកន្លងមកនេះ បានបាត់​ខ្លួនពី​កញ្ចាក់ប្រព័ន្ធរលកអាកាស ហើយរហូតមកដល់ថ្ងៃនេះ នៅតែស្ថិតក្នុងការរុករកនៅឡើយ។

នាយកសមាគម លោក តូនី ថៃល័រ (Tony Tyler) បានថ្លែងប្រាប់អ្នកការសែតថា «ការបាត់បង់យន្ដហោះ MH370 បានដក់ជាប់នៅក្នុងអារម្មណ៍គ្រប់ៗគ្នា»។

ហេតុការណ៍នេះ បានបង្កឲ្យមានការប៉ះទង្គិចជាទូទៅមួយ សម្រាប់ក្រុមហ៊ុនដឹកជញ្ជូនផ្លូវអាកាស និងបន្សល់ទុក​នូវ​ការសញ្ជឹងគិតដែលមិនអាចយល់បានមួយ នៅក្នុងសាធារណមតិ ជាពិសេសទាក់ទងនឹងសំនួរមួយថា ហេតុអ្វីក៏​យន្ដហោះប៊ូអីង ៧៧៧ មួយទាំងមូល បែរជាអាចបាត់ខ្លួន ដោយមិនបានទុកស្លាកស្នាមអ្វីសោះយ៉ាងនេះ? ការរុករក​បានធ្វើជាច្រើនថ្ងៃ នៅក្នុងមហាសមុទ្រឥណ្ឌាខាងត្បូង ទីកន្លែងដែលគេសង្ស័យថា យន្ដហោះបានហោះទៅ​ធ្លាក់​នៅ​ទីនោះ តែរហូតមកដល់ថ្ងៃនេះ គ្មានបំណែកណាមួយត្រូវបានគេរកឃើញនោះឡើយ។

ក្រៅពីសំនុំរឿងយន្ដហោះបាត់ខ្លួន សមាគមដឹកជញ្ជូនផ្លូវអាកាសអន្តរជាតិ ត្រូវលើកឡើងដូចជារៀងរាល់ឆ្នាំដែរ នូវ​ទស្សនវិស័យសេដ្ឋកិច្ច នៅលើវិស័យនេះ ជាមួយនឹងរាល់សមាជិករបស់ខ្លួន។ ប៉ុន្តែនៅឆ្នាំនេះ សមាគមនឹងងាកទៅ​ជជែក​ពិភាក្សា ទៅលើការរៀបចំផ្លូវធ្វើដំណើរនានារបស់យន្ដហោះ ដែលគួរតែតាមដានដឹងដោយប្រព័ន្ធផ្កាយរណប ការបញ្ជូនទិន្នន័យនៃជើងហោះហើរនីមួយៗ ជាលក្ខណៈស្វ័យប្រវត្តិ និងបច្ចេកវិទ្យាថ្មីៗ ដើម្បីកំណត់ពីផ្លូវធ្វើដំណើរ​របស់យន្ដហោះ។ យ៉ាងណាក៏ដោយ ប្រធានបទដែលត្រូវលើកមកដាក់នៅលើតុទាំងនេះ សុទ្ធសឹងជាវិធានការ​ចំពោះមុខ ដែលសមាគមនិងក្រុមហ៊ុនអាកាសចរណ៍នានា ចាំបាច់ត្រូវយកមកពិចារណា និងអនុវត្តទៅថ្ងៃមុខ ដោយ​យោងទៅលើគ្រោះថ្នាក់ដ៏ចម្លែក របស់យន្ដហោះ នៃក្រុមហ៊ុនម៉ាឡេស៊ីអ៊ែរឡាញ៕

មហាសន្និបាតរបស់សមាគមដឹកជញ្ជូនផ្លូវអាកាសអន្តរជាតិ កាលពីថ្ងៃទី៧ ខែវិច្ឆិកា ឆ្នាំ១៩៤៤កន្លងទៅ។