ទូរស័ព្ទដៃឆ្លាតវ៉ៃម៉ូដែល លូមែ៩២៥ (Lumia 925) របស់ក្រុមហ៊ុនណូគៀ (Nokia) បានចេញលក់ជាផ្លូវការហើយ នៅក្នុង​ប្រទេសអង់គ្លេស នាសប្តាហ៏នេះ ដោយក្រុមហ៊ុនបានធ្វើការបង្ហាញនូវពត៌មានលំអិតបន្ថែមផងដែរ។

ទូរស័ព្ទដៃឆ្លាតវ៉ៃម៉ូដែល ណូគៀ លូមែ៩២៥។

ណូគៀ លូមែ៩២៥នេះ ជាទូរស័ព្ទដៃដំបូងគេ ដែលក្រុមហ៊ុនណូគៀផលិតមកពីលោហៈធាតុ។ ផ្នែកខាងក្រោយរបស់វា មាន៣ពណ៌៖ ពណ៌ប្រផេះ ពណ៌ស និងពណ៌ខ្មៅ។ ប៉ុន្តែចំពោះសំបករបស់វា មានជាច្រើនពណ៌បន្ថែមទៀត សម្រាប់ឲ្យ​ជ្រើសរើសដូចជា ពណ៌ស ខ្មៅ លឿង និងពណ៌ក្រហម។

ចំពោះថ្ម អ្នកអាចសាកតាមប្រព័ន្ធគ្មានខ្សែក៏បាន (wireless charging) ហើយវាថែមទាំងស៊ីថាមពលកំរិតទាបបំផុត។

រីឯកាមេរ៉ារបស់វា មានភាពវ៉ៃឆ្លាតបំផុត ដែលអនុញ្ញាតឲ្យអ្នករចនារូបភាពបានយ៉ាងលឿន និងមានមុខងារសំខាន់ៗ​ជា​ច្រើនទៀត ដែលធ្វើឲ្យអ្នកមានការរចនាកាន់តែភាពទាក់ទាញ ដូចជា ការរចនាទ្រង់ទ្រាយមុខ ឬក៏ធ្វើឲ្យរូបភាពមាន​សភាព​ព្រិលៗជាដើម។

លក្ខណៈសម្បត្តិដទៃទៀត ដែលមាននៅលើ ណូគៀ លូមែ៩២៥ មានដូចជា៖
• អេក្រង់ទំហំ៖ ៤.៥អ៊ីញ (៧៦៨ X ១២៨០ភិចស្ស៊ែល)
• វិមាត្រ៖ ១២៩ X ៧០.៦ X ៨.៥មីលីម៉ែត្រ
• ទម្ងន់៖ ១៣៩ក្រាម
• អាចផ្ទុកបាន៖ ១៦ទៅ៣២ជីហ្គាបៃ
• អង់ចងចាំ (RAM)៖ ១ជីហ្គាបៃ
• កាមេរ៉ាក្រោយ៖ ៨ម៉េហ្គាភិចស្ស៊ែល
• កាមេរ៉ាមុខ៖ ១.៣ម៉េហ្គាភិចស្ស៊ែល
• ប្រព័ន្ធដំណើរការ៖ មីក្រូសូហ្វវីនដូហ្វូន៨ (Microsoft Windows Phone
• ម៉ាស៊ីន៖ ឌូខរ ១.៥ជីហ្គាអែក (Dual-core 1.5 GHz)
• ថ្មប្រភេទ៖ លីអន (Li-Ion) ២០០០មីលីអំពែម៉ោង, បើកគ្រឿងទុកចោលបាន ៤៤០ម៉ោង, អាចនិយាយបាន ១៨ម៉ោង ២០នាទី និងចាក់តន្រ្តីបានរហូតដល់ ៥៥ម៉ោង។

នាយកចែកចាយរបស់ក្រុមហ៊ុនវ៉ូដាហ្វូន (Vodafone) បាននិយាយថា «ទូរស័ព្ទដៃវ៉ៃឆ្លាតណូគៀ លូមែ៩២៥នេះ ជាទូរស័ព្ទ​ដែលមានសមត្ថភាពអស្ចារ្យ និងមានភាពឆ្លាតវ៉ៃក្នុងការរចនារូបភាព។»

ចំពោះតម្លៃរបស់វា នៅប្រទេសអង់គ្លេស មានតម្លៃប្រមាណ ៤៩៩.៩៩ផោន (៧៨៥.៣៣ដុល្លា)។ ហើយទូរស័ព្ទដៃ​ម៉ូដែល​ថ្មីរបស់ក្រុមហ៊ុនណូគៀនេះ ប្រហែលជាចរាចរណ៏មកដល់ទីផ្សារអាស៊ី និងមកដល់ប្រទេសកម្ពុជានា​ពេលឆាប់ៗខាង​មុខ​នេះ៕

សូមទស្សនារូបភាព និងវីដេអូបង្ហាញពីទូរស័ព្ទប្រភេទនេះ ៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៤ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ