វិភាគ កែម ឡី៖ រដ្ឋាភិបាលអនុវត្ត«បីមិន មួយយក» ក្នុងរឿង អាឡិច
ការបណ្ដេញសកម្មជនបរិស្ថាន ជាតិអេស្ប៉ាញ លោក អាឡិចហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) កាលពីយប់ថ្ងៃទី២៣ ខែកុម្ភៈ ឆ្នាំ២០១៥នេះ បានបង្ហាញពីចំណុចខ្លាំង និងចំណុចខ្សោយ របស់រដ្ឋាភិបាលកម្ពុជា ដែលដឹកនាំដោយលោក ហ៊ុន សែន។ អ្នកវិភាគបញ្ហាសង្គមនយោបាយ លោក កែម ឡី ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ នាព្រឹកថ្ងៃទី២៤ ខែកុម្ភៈនេះ បានសង្ខេបចំណុចទាំងនោះ ជាបួនចំណុច ដែលក្នុងនោះ មានមួយចំនុច ជាផល«វិជ្ជមាន» និងបីចំណុចទៀត ជាផល«អវិជ្ជមាន» ឬដែលគេហៅ តាមភាសាសម័យកុម្មុយនីស ថាជាគោលការណ៍«បីមិន មួយយក»។
លោកបានធ្វើការពន្យល់ថា ផលចំណេញដែលរដ្ឋាភិបាលកម្ពុជា នឹងទទួលបាននោះគឺការ «ដកបន្លា»ក្នុងកែវភ្នែករបស់ខ្លួន (រដ្ឋាភិបាល) បាន។ ហើយគម្រោងសាងសង់ ទំនប់វារីអគ្គីសនីក៏ អាចនឹងត្រូវបានបន្ត ជាមួយនឹងការអនុវត្ត ដោយគ្មានភាពរារាំងណាមួយ ជាក់លាក់ដែរ។
ឯផលអវិជ្ជមានទីមួយ [...]
