តើ​គណបក្ស​អំណាច​ខ្មែរ​របស់​លោក សួន សេរីរដ្ឋា អាច​ទទួល​បាន​ភ្លើង​ខៀវ ដើម្បី​បើក​ការិយល័យ​របស់​ខ្លួន នៅ​ក្នុង​ប្រទេស​កម្ពុជា​ដែរ​ឬ​ទេ បើ​ពេល​នេះ​លោក​ត្រូវ​បាន​តុលាការ​កម្ពុជា​សម្រេច​ឲ្យ​មាន​ទោស​ទៅ​ហើយ​នោះ?

បើ​ទោះ​ជា ក្នុង​ពេល​កន្លង​មក​ថ្មីៗ​នេះ សេចក្ដី​ប្រកាស​ព័ត៌មាន​មួយ របស់​អគ្គលលេខា​ធិការ​របស់​គណបក្ស​អំណាច​ខ្មែរ លោក សៀង សុភារក្ស បាន​និយាយ​ពី​ផ្លូវ​ច្បាប់ និង​ក្ដី​សង្ឃឹម ក្នុង​ការ​ចុះ​បញ្ជី​គណបក្ស​ខ្លួន នៅ​ក្រសួង​មហាផ្ទៃ​កម្ពុជា​នោះ​ក៏​ដោយ តែ​ដើម្បី​ទទួល​បាន​ភ្លើង​ខៀវ​ទាំង​ស្រុង ឬយ៉ាង​ណា​នោះ គេ​ត្រូវ​ពិនិត្យ​ទៅ​លើ​ទិដ្ឋភាព​ពីរ​យ៉ាង។

ទីមួយ៖ ទិដ្ឋភាពនយោបាយចាស់

អនុលោមទៅតាមច្បាប់កម្ពុជា ជាពិសេសទៅតាមច្បាប់រដ្ឋធម្មនុញ្ញរបស់ប្រទេសនេះ គ្រប់ពលរដ្ឋកម្ពុជាសុទ្ធ​តែ​មានលទ្ធភាពប្រមូលគ្នាជាក្រុម ដើម្បីបើកគណបក្សនយោបាយ សំដៅចូលប្រឡូកក្នុងការបោះឆ្នោត បាន​ដោយ​សេរី។ ហើយក៏ដោយសារតែបរិបទផ្លូវច្បាប់នេះដែរ ទើបគណបក្សនយោបាយថ្មី របស់លោក សួន សេរីរដ្ឋា ដែលគេបានស្គាល់ថា ជាខ្មែរមួយរូបទៅអង្គុយជាមួយក្រុមអាវលឿងថៃ ដើម្បីសរសើរថៃរិះគន់ខ្មែរ​នោះ បានប្ដូរឈ្មោះគណបក្សនេះ ពី«អំណាចពលរដ្ឋខ្មែរ» មកជា«អំណាចខ្មែរ»។ ប្ដូរឈ្មោះ ព្រោះ​«អំណាច​ពលរដ្ឋ​ខ្មែរ» ជាចលនាមួយ ដែលសម្រាប់អាជ្ញាធរខ្មែរ បានចាត់ទុកជា«អង្គការភេវរកម្ម» ចង់ផ្ដួលរំលំ​រដ្ឋាភិបាល​ក្រុងភ្នំពេញ។

ដូច្នេះចង់ឬមិនចង់ ដើម្បីអាចបង្កើតជាគណបក្សនយោបាយនៅក្នុងប្រទេសកម្ពុជា ចលនា«អំណាច​ខ្មែរ»​និង​លោក សួន សេរីរដ្ឋា ខ្លួនលោក ត្រូវតែប្រកាសជំហររបស់ខ្លួនដោយឥតងាករេ ក្នុងការគោរពការពាររដ្ឋធម្មនុញ្ញ​កម្ពុជា ជាពិសេសបាវចនាទាំងបី «ជាតិ សាសនា ព្រះមហាក្សត្រ»។ ប៉ុន្តែករណីនេះ អាច«ហាទៅវាស្លាក់ ខ្ជាក់​មកវាស្លែង» ព្រោះចលនាដែលមានប្រភពនៅអាមេរិកមួយនេះ តែងតែប្រកាសខ្លួនជារឿយៗ ថាខ្លួនជាក្រុម​សាធារណៈរដ្ឋនិយម និងបានធ្វើការវាយប្រហារយ៉ាងចាស់ដៃ ទៅលើរបបរាជានិយម និងព្រះមហាក្សត្រ​នៅ​កម្ពុជា ទៅតាមអ្វីដែលក្រុមនេះយល់ថា ជា«ការពិតនយោបាយ»។ ជាពិសេស ចលនាអំណាចពលរដ្ឋខ្មែរ ដែលប្រឆាំងវៀតណាមនីយកម្មនៅកម្ពុជា និងស្ថាបនិករបស់ចលនានេះផង បានចាត់ទុកលោក ហ៊ុន សែន និង​គណបក្សប្រជាជនកម្ពុជា ថាគ្រាន់តែជាមនុស្សកំសាក និងជា«អាយ៉ង»លោតក្រោមខ្សែញ៉ាក់ របស់​ប្រទេស​កុម្មុយនីសវៀតណាមប៉ុណ្ណោះ។

សកម្មភាពអស់ទាំងនេះហើយ ដែលជាជំហ៊ានធ្វើឲ្យតុលាការសាលាដំបូងរាជធានីភ្នំពេញ បានសម្រេច​សាល​ក្រមរបស់ខ្លួន កាលពីថ្ងៃទី១៤ ខែមករានេះ ប្រឆាំងស្ថាបនិកចលនាដ៏មហិមា លោក សួន សេរីរដ្ឋា ដោយកាត់​ក្ដីឲ្យប្រធានគណបក្សអំណាចខ្មែររូបនេះជាប់ពន្ធនាគារ៧ឆ្នាំ និងពិន័យជាទឹកប្រាក់ចំនួន២៥លានរៀល ក្រោម​បទចោទមានចេតនាផ្តួលរំលំរដ្ឋាភិបាលកម្ពុជា និងរួមគំនិតក្បត់ជាតិអំឡុងពេលបោះឆ្នោតតំណាងរាស្ត្រ​កាល​ពី ខែកក្កដាឆ្នាំ២០១៣កន្លងមក។ នៅក្នុងសាលក្រមនៃសាលាដំបូងរាជធានីភ្នំពេញ តាមរយៈលោកចៅក្រម​ តុប ឈុនហេង នោះ ក៏គេបានឃើញមានដីការ ឲ្យតាមចាប់ខ្លួនលោក សួន សេរីរដ្ឋា មកទទួលទោសតាម​ច្បាប់ដែរ។

ផ្ទុយទៅវិញ សេចក្ដីប្រកាសព័ត៌មានចុះថ្ងៃទី១៦ ខែមករា របស់អគ្គលលេខាធិការរបស់គណបក្សអំណាចខ្មែរ លោក សៀង សុភារក្ស បានបញ្ជាក់ថា សាលក្រមសាលាដំបូងរាជធានីភ្នំពេញ មិនប៉ះពាល់ដល់ការចុះ​បញ្ជី​ឈ្មោះ នៃគណបក្សអំណាចខ្មែរនេះ ទៅកាន់ក្រសួងមហាផ្ទៃនោះទេ ដោយសំអាងថា «ច្បាប់រដ្ឋធម្មនុញ្ញនៃ​ប្រទេសកម្ពុជា មិនបានហាមប្រាម ឬបិទសិទ្ធិនយោបាយរបស់ប្រជាពលរដ្ឋណាម្នាក់ ក្នុងការបង្កើត​គណបក្ស​នយោបាយ» ហើយថា «លោក សួន សេរីរដ្ឋា មានសិទ្ធិប្ដឹងឧទ្ធរណ៍ ជំទាស់នឹងសាលក្រមនេះ»។

ភ្លាមៗនេះ ក្រសួងមហាផ្ទៃកម្ពុជាមិនបានធ្វើប្រតិកម្មអ្វីទេ ជុំវិញការប្រកាសព័ត៌មានរបស់លោក សៀង សុភារក្ស។ ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់បានថ្លែងកាលពីអំឡុងខែមេសាឆ្នាំទៅម៉ិញ ថា«ចលនាអំណាចពលរដ្ឋខ្មែររបស់លោក សួន សេរីរដ្ឋា ទំនងជាមិនអាចចុះឈ្មោះ ទៅជាគណបក្ស​នយោបាយ នៅក្នុងប្រទេសកម្ពុជាបានទេ»។ លោកខៀវ សុភ័គ បានបញ្ជាក់ថា លោក សួន សេរីរដ្ឋា នៅ​ជំពាក់​ច្បាប់ ត្រង់ដែលលោកនៅមិនទាន់ទទូលបាន​ការ​ចាប់ខ្លួន ពីដីការរបស់តុលាការកម្ពុជានៅឡើយ។ អ្វីដែល​ត្រូវអនុវត្តន៍មុនបំផុត នៃការចុះឈ្មោះបង្កើត​គណបក្ស​នយោបាយនោះ គឺការចាប់ខ្លួនលោក សួន សេរីរដ្ឋា ។

ទីពីរ៖ ទិដ្ឋភាពនយោបាយថ្មី

ទោះបីមានការថ្លែងទាយទុកមុន របស់លោក ខៀវ សុភ័គ ខាងលើក៏ដោយ តែសម្រាប់ការអនុញ្ញាតចុះបញ្ជី នៅក្រសួងមហាផ្ទៃកម្ពុជា អាចនៅមានក្ដីសង្ឃឹមនៅឡើយ សម្រាប់គណបក្សអំណាចខ្មែរ។ នេះបើគេយោង ពីបរិបទនៃនយោបាយថ្មីៗចុងក្រោយ ដែលទើបនឹងកើតឡើង។ ព្រឹត្តិការណ៍នេះ មានរាប់បញ្ចូល ទាំង​ចលនា​បណ្ដាញសង្គមថ្មីរបស់លោក កែម ឡី និងទាំងការយាងត្រឡប់ មកដឹកនាំគណបក្សហ្វ៊ុនស៊ីនប៉ិចវិញ របស់​ព្រះ​អង្គម្ចាស់ នរោត្ដម រណឬទ្ធិ បន្ទាប់ពីអតីតព្រះប្រធានគណបក្សរាជានិយមអង្គនេះ បានដើរចេញពី​គណបក្ស​ជាង៨ឆ្នាំមកនោះ ដែលធ្វើឲ្យក្រុមអ្នកស្និតនឹងគណបក្សសង្គ្រោះជាតិសព្វថ្ងៃ គិតថាទាំងនេះជា«ល្បិចបំបែក​សម្លេង»​របស់គណបក្សប្រជាជនកម្ពុជា។

លោក សម រង្ស៊ី ខ្លួនលោក ក៏ជឿជាក់ថា ការបង្កើតឲ្យមានបក្សតូចៗនៅប្រទេសកម្ពុជា ជាចេតនាក្នុងការ​បំបែកសម្លេងពីគណបក្សរបស់លោកដែរ និងទំនងជាមានការជ្រោមជ្រែងពីក្រោយ ដោយគណបក្ស​ប្រជាជន​កម្ពុជា។ ថ្លែងកាលពីថ្ងៃទី១៤ ខែមករា នៅឃុំពោធិ៍អង្ក្រង ស្រុកបរសេដ្ឋ ខេត្តកំពង់ស្ពឺ មេដឹកនាំគណបក្ស​ប្រឆាំង​រូបនេះ បានពន្យល់ថា៖ «បើគេដឹងថា អ្នកស្នេហាជាតិរួមគ្នា គណបក្សប្រជាជនកម្ពុជាចាញ់។ ដូច្នេះ​ហើយ បានជាគេបង្កើតគណបក្សតូចៗ ដើម្បីបំបែកសន្លឹកឆ្នោត»។

តែការលើកឡើងដូច្នេះ ត្រូវបានគណបក្សប្រជាជនកម្ពុជា និងគណបក្ស«តូចៗ»ទាំងនោះបដិសេធ និង​ចាត់​ទុកថា នោះជាវប្បធម៌លាបពណ៌ របស់លោក សម រង្ស៊ី។ អ្នកនាំពាក្យអង្គភាពព័ត៌មាន និងប្រតិកម្មរហ័ស នៃ​ទីស្តីការគណៈរដ្ឋមន្ត្រី លោក ទិត សុធា បានលើកឡើងប្រាប់សារព័ត៌មានក្នុងស្រុកមួយថា៖ «ការប្រកាន់​យកនូវវប្បធម៌ទាត់ចោលសម្លេងភាគតិច ជាគំរូអាក្រក់មួយ ដែលប្រជាពលរដ្ឋនឹងពិចារណាថា បើ​គណបក្ស​(សង្គ្រោះជាតិ)មួយនេះជាប់ឆ្នោត អ្វីៗត្រូវស្ថិតនៅក្នុងសភាពផ្តាច់ការ»។

រីឯគណបក្សអំណាចខ្មែរវិញ តាមរយៈសេចក្ដីប្រកាសព័ត៌មានដដែល បានបរិហារការលើកឡើងរបស់លោក សម រង្ស៊ី ថាកំពុងចាត់ទុកពលរដ្ឋ និងអ្នកគាំទ្ររបស់គណបក្សសង្គ្រោះជាតិ គឺជាសត្វ«ពាហនៈ» ដែលត្រូវតែ​នៅក្នុងក្រោល និងជាកម្មសិទ្ធិរបស់ខ្លួនអស់មួយជីវិត មិនមានសិទ្ធិក្នុងការជ្រើសរើសមេដឹកនាំថ្មី ក្រៅពីមេដឹក​នាំរបស់គណបក្សសង្គ្រោះជាតិ។ ដូច្នេះមិនពិបាកយល់ទេ សម្រាប់គណបក្សប្រជាជនកម្ពុជា និងលោក ហ៊ុន សែន ដែលតែងតែគិតថា «សត្រូវរបស់សត្រូវខ្ញុំ ជាមិត្តរបស់ខ្ញុំ» ក្នុងជម្រើសដើម្បីផ្ដល់ការចុះបញ្ជីផ្លូវការ​នៅ​ក្រសួងមហាផ្ទៃ ទៅឲ្យគណបក្សអំណាចខ្មែររបស់លោក សួន សេរីរដ្ឋា នោះ។

សូមរំលឹកឡើងវិញដែរថា លោក សួន សេរីរដ្ឋា ប្រធានចលនាអំណាចពលរដ្ឋខ្មែរ ក៏បានដាក់ពាក្យសុំបង្កើត​គណបក្សអំណាចពលរដ្ឋខ្មែរ ទៅលោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី៦ ខែសីហា ឆ្នាំ២០១៤។ កាលពីថ្ងៃទី១៩ ខែធ្នូ ឆ្នាំ២០១៤ តំណាងគណបក្សអំណាចពលរដ្ឋខ្មែរ ធ្លាប់បានជួបជាមួយមន្ត្រីក្រសួងមហា​ផ្ទៃ ដើម្បីពិភាក្សាលើការស្នើសុំបង្កើត ចុះឈ្មោះគណបក្សអំណាចពលរដ្ឋខ្មែរ និងបានប្ដូរឈ្មោះមកជាគណបក្ស​អំណាចខ្មែរ។ ប៉ុន្តែមកទល់ពេលនេះ នៅមិនទាន់មានការឆ្លើយតបយ៉ាងណា ពីក្រសួងមហាផ្ទៃនៅឡើយ៕