កោះល័នតា៖ កម្ពុជា​បាន​បិត​សំនុំ​រឿង ខណៈ​មេធាវី​បារាំង​ម្នាក់​​សង្ស័យ

តាមអាជ្ញាធរកម្ពុជា បេក្ខជនដែលបានចូលរួម ក្នុងកម្មវិធី«កោះល័នតា» របស់ទូរទស្សបារាំង ឈ្មោះ ហ្សេរ៉ា បាបាំង (Gérald Babin) បានស្លាប់ដោយសារ«គាំងបេះដូង»។ ប៉ុន្តែមេធាវីម្នាក់នៅទីក្រុងប៉ារីស បានសំនូមពរអោយ ផលិតកម្មដែលផលិតកម្មវិធី បង្ហាញពន្លឺទៅលើចម្ងល់ទាំងឡាយ និងពីវិធានការសុវត្ថភាព របស់បេក្ខជនចូលរួមទាំងអស់។
Loading...
  • ដោយ: សេក មនោរកុមារ
  • កែប្រែចុងក្រោយ: March 26, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

តាមអាជ្ញាធរកម្ពុជា បេក្ខជនដែលបានចូលរួម ក្នុងកម្មវិធី«កោះល័នតា» របស់ទូរទស្សបារាំង ឈ្មោះ ហ្សេរ៉ា បាបាំង (Gérald Babin) បានស្លាប់ដោយសារ«គាំងបេះដូង»។ ប៉ុន្តែមេធាវីម្នាក់នៅទីក្រុងប៉ារីស បានសំនូមពរអោយ ផលិតកម្ម​ដែល​ផលិតកម្មវិធី បង្ហាញពន្លឺទៅលើចម្ងល់ទាំងឡាយ និងពីវិធានការសុវត្ថភាព របស់បេក្ខជនចូលរួមទាំងអស់។


បេក្ខជនហ្សេរ៉ា បាបាំង ស្លាប់ក្នុងកម្មវិធី «កោះល័នតា» របស់ទូរទស្សន៍បារាំង ប៉ុស្ដ៍លេខមួយ។

អាជ្ញាធរកម្ពុជាបានបិទការស៊ើបអង្កេត ទាក់ទងនឹងសំនុំរឿងមរណភាព របស់លោក ហ្សេរ៉ា បាបាំង អាយុ២៥ឆ្នាំ ដែល​បាន​ទទួលរងគ្រោះថ្នាក់ កាលពីថ្ងៃសុក្រទី២២ខែមិនាកន្លងទៅ នៅក្នុងកម្មវិធីទូរទស្សន៍បារាំងប៉ុស្ដ៍លេខ១ មានឈ្មោះថា កោះល័នតា (Koh-Lanta)។ កម្មវិធីនេះ បានប្រព្រឹត្តទៅនៅលើកោះរ៉ុង កណ្ដាលឆកសមុទ្រកំពង់សោមខ្មែរ។ តាមអាជ្ញាធរ​ខ្មែរប្រចាំតំបន់ មរណភាពរបស់ជនជាតិបារាំងរូបនេះ បណ្ដាលមកពី ជម្ងឺគាំងបេះដូង។

«ការស៊ើបអង្កេត បានបញ្ចប់។ សំនុំរឿងក៏បានបិទ លែងមានការបន្តអ្វីដែរ។» នេះជាការថ្លែងអោយដឹង របស់លោក កុល ផល្លី ស្នងការ​រង​នគរបាល​ទទួល​បន្ទុក​ព្រហ្ម​ទណ្ឌ ខេត្ត​ព្រះ​សីហនុ។ «យើងបានបិទសំនុំរឿង ដោយសារជនរងគ្រោះ​ស្លាប់​ដោយ ជម្ងឺគាំងបេះដូង»។ រីឯប្រភពមួយពីខាងប្រព័ន្ធយុត្តិធម៌ នៃប្រទេសបារាំង ក៏បានបង្ហើបប្រាប់អ្នកកាសែតដែរថា មរណភាពនេះ មិនមានបង្ហាញពីចំណុចគួរអោយសង្ស័យនោះទេ ហើយខាងរដ្ឋអាជ្ញានៃទីក្រុងប៉ារីស ក៏មិនបានបើកការ​ស៊ើបអង្កេតអ្វីដែរ លើសំនុំរឿងនេះ។

ដោយឡែក មេធាវីនៅទីក្រុងប៉ារីស លោក ជេរ៉េមី អាស៊ូ (Jérémie Assous) ដែលធ្លាប់ការពារបេក្ខជន ទាក់ទងនឹង​កម្មវិធី​ជាច្រើន ផលិតដោយស្ថានីយ៍ទូរទស្សន៍ ក្នុងប្រទេសបារាំងនោះ បានលើកឡើងថា ផលិតកម្មអេវេនឈើ ឡាញ (Adventure line productions - ALP ) មិនអាចរួចខ្លួន ពីការរិះគន់ទាំងអស់នោះទេ។ ធ្វើបទសម្ភាសដោយកាសែត ២០នាទី (20 Minutes) លោកមេធាវី បានថ្លែងថា «មើលទៅ ដូចជាការស្លាប់មួយយ៉ាងអាថ៌កំបាំង ដែលវាបានកើតឡើង នៅក្នុងរង្វង់នៃកិច្ចសន្យាការងារមួយនោះ។ នៅបារាំង នៅពេលណាមានគ្រោះថ្នាក់ កើតឡើងនៅលើការដ្ឋាននោះ វាត្រូវ​តែមានការស៊ើបអង្កេតមួយឡើង។ តែឥឡូវនេះ មានតែរឿងសោកស្ដាយប៉ុណ្ណោះ ដែលរដ្ឋអាជ្ញា មិនបានតាមដាន​រឿង​នេះ ហើយគេនឹងនៅតែមិនដឹង ពីពន្លឺពិតប្រាកដ ដែលកើតឡើងក្នុងហេតុការណ៍នេះ។ ការបើកសំនុំរឿង នឹងអាចធ្វើ​អោយគេបញ្ជៀសបាន នូវហេតុការណ៍បែបនេះ នៅពេលក្រោយៗទៀត។»

តាមលោកមេធាវី បានបញ្ជាក់ថា ការទទួលខុសត្រូវរបស់ផលិតកម្ម អាចនឹងបង្កជាបញ្ហាឡើង។ «ផលិតកម្មត្រូវបង្ហាញ​ពីភស្ដុតាង ដែលថាបានផ្លាស់ប្ដូរ លក្ខខន្តិកៈនៃកិច្ចសន្យាទាំងឡាយរបស់ពួកគេ ក្នុងការថតកម្មវិធីនៅឆ្នាំនេះ។ បើសិន​ជាមិនមានការផ្លាស់ប្ដូរទេនោះ វានឹងមានការរំលោភមួយ ជាពិសេសទៅលើពេលវេលានៃការងារ ដែលផលិតកម្ម​តម្រូវ​អោយបេក្ខជនធ្វើការ រហូត១៦ម៉ោង ក្នុងមួយថ្ងៃ។ គេត្រូវដឹងថា វិធានការសំខាន់ៗទាំងឡាយ ត្រូវផលិតកម្មដាក់​អោយ​ប្រតិប័ត្តិ ខណៈពេលដែលបេក្ខជនទាំងអស់ បានប្រឈមនឹងហនិភ័យមួយ ដែលមានកម្រិតខ្ពស់។ ក្នុងការមិនគោរព សូម្បីតែមួយករណីក៏ដោយ នឹងអាចអោយផលិតកម្ម ប្រឈមនឹងការផ្ដន្ទាទោស ពីបទប្រព្រឹត្តិព្រហ្មទណ្ឌ។» លោកជេរ៉េមី បានបន្ដយ៉ាងដូច្នេះ។

៥ខែ ដែលបានត្រៀមនៅលើកោះរ៉ុង

ជនរងគ្រោះ លោក ហ្សេរ៉ា បាបាំង បានចាប់ផ្ដើមលេខល្បែងដំបូងមួយ នៅក្នុងកម្មវិធីទូរទស្សន៍នោះ តែមានអារម្មណ៍​មិនស្រួល ហើយបានសុំអន្តរាគមន៍ពី គ្រូពេទ្យរបស់ផលិតកម្ម ដែលប្រចាំការនៅទីនោះ ជាបន្ទាន់។ គ្រូពេទ្យបាន​បញ្ជូន​លោក បាបាំង តាមឧទ្ធម្ភាគចក្រ ទៅកាន់មន្ទីពេទ្យក្រុងព្រះសីហនុ ហើយបេក្ខជនរូបនេះ បានផុតដង្ហើមនៅទីនោះ។ បន្ទាប់ពីមរណភាព ស្ថានីយ៍ទូរទស្សន៍ប៉ុស្ដ៍លេខមួយ បានលប់ចោល នូវវគ្គ១៦ឆ្នាំ២០១៣នៃកម្មវិធី«កោះល័នតា»នេះ និងបានហៅក្រុមការងារទាំងអស់គ្នា អោយត្រឡប់ទៅប្រទេសបារាំងវិញ។

រដ្ឋមន្ត្រីទេសចរណ៍កម្ពុជា លោកថោង ខុន បាននិយាយថា ផលិកម្មអេវេនឈើ ឡាញ ត្រៀមថតនិងស្នាក់នៅ សម្រាប់​រយះពេល៥ខែ នៅលើកោះរ៉ុង ហើយ១២០លំនៅដ្ឋាន ត្រូវបានសង់ឡើង ដើម្បីទទួលពួកគេ។ លោកបាននិយាយថា បេក្ខជនទាំងអស់ បានត្រឡប់ទៅបារាំងវិញហើយ តែលោករដ្ឋមន្ត្រីមិនបានអះអាង ពីអ្នកដែលសេសសល់ ថាបាន​ចាក​ចេញពីកម្ពុជា ហើយឬនៅនោះទេ៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៦ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...