ទេសចរណ៍កម្ពុជា កំពុងត្រៀមទទួលភ្ញៀវ៤លាននាក់ ក្នុងឆ្នាំ២០១៣
សក្ដានុពល នៃវិស័យទេសចរណ៍ក្នុងប្រទេសកម្ពុជា កំពុងមានជំហានឈានឡើង គួរអោយមានមោទនភាព។ នេះបើតាមការបង្ហាញ របស់ក្រសួងទេសចរណ៍។
ប្រាសាទអង្គរវត្តរបស់ខ្មែរ។ រូបថត monoroom.info photo/ D. KEO ។
គ្រាន់តែនៅក្នុងខែមករាកន្លងទៅ ប្រទេសកម្ពុជាបានទទួលទេសចរណ៍ អោយចូលទៅលេង បានចំនួន៤០៤ ១០៦នាក់ ទល់នឹង៣៥០ ២៥៧នាក់ ក្នុងរយះពេលដូចគ្នា កាលពីឆ្នាំទៅម៉ិញ។ ការខុសគ្នានេះ បង្ហាញពីភាគរយ នៃការកើនឡើង ប្រមាណជា១៥,៤%។
តួលេខដែលផ្សព្វផ្សាយដោយក្រសួងទេសចរណ៍កម្ពុជា បានអោយដឹងថា អ្នកដំណើរមកពីប្រទេសកូរ៉េខាងត្បូង មានចំនួនច្រើនជាងគេ (៧០ ៧៧០នាក់) កើនឡើងគិតជាភាគរយ ២៦,៧% បើប្រៀបធៀបទៅនឹងឆ្នាំមុន។
ប្រទេសសំខាន់ៗផ្សេងទៀត ដែលមានជនជាតិខ្លួន ចូលទៅទស្សនាប្រទេសកម្ពុជា ច្រើនបន្ទាប់មកនោះ គឺរៀតណាម ចិន ឡាវ និងសហរដ្ឋអាមេរិក។
ដោយឡែក ខេត្តសៀមរាបតែមួយ មានរួមបញ្ចូលអតីតរាជធានីអង្គរ និងប្រាសាទបូរាណដ៏ល្បីល្បាញនោះ បានទទួលភ្ញៀវបានរហូតដល់ ២៤៨ ៦១៤នាក់ មានការកើនឡើងដល់ទៅ១០,៩% សម្រាប់តំបន់នេះ។ តំបន់សៀមរាបអង្គរ ជាតំបន់ទេសចរណ៍ ដែលទាក់ទាញភ្ញៀវអោយចូលទៅទស្សនា ប្រមាណជា៦១,៥% នៃតំបន់ទេសចរណ៍ទាំងអស់ របស់ប្រទេសកម្ពុជា។
តួលេខនៃតំបន់ទេសចរណ៍ ដែលមានគម្លាបគ្នាយ៉ាងច្រើននេះ បានធ្វើអោយថ្នាក់ដឹកនាំនៃក្រសួងទេសចរណ៍មានការបារម្មណ៍ ហើយកំពុងធ្វើគម្រោងជាច្រើនទៀត ដើម្បីឈានទៅបើកតំបន់ទេសចរណ៍ផ្សេងៗ លើផ្ទៃប្រទេសទាំងមូល។ តែបើទោះជាយ៉ាងនេះក្ដី ក៏ការអភិវឌ្ឍន៍ទាំងឡាយ ជាពិសេសដូចជា ទាក់ទងនឹងហេដ្ឋារចនាសម្ព័ន្ធទេសចរណ៍ នៅជុំវិញទីក្រុងសៀមរាបជាដើមនោះ នឹងអាចបង្កអោយមានបញ្ហាសង្គមកិច្ចយ៉ាងចាក់ជ្រៅ ព្រោះដោយសារតែតំបន់ទាំងអស់នេះ ធ្លាប់ជាវាលស្រែ ដំណាំចំការ។
ជាមួយនឹងតួលេខដ៏ល្អ នៅដើមឆ្នាំនេះ លោកថោង ខុន រដ្ឋមន្ត្រីក្រសួងទេសចរណ៍កម្ពុជា បានរំពឹងថា ប្រទេសរបស់លោក នឹងអាចទាក់ទាញទេសចរណ៍ បានរហូតដល់ ៤លាននាក់ ក្នុងឆ្នាំ២០១៣។ ចំនួននេះ មានការកើនឡើង ខ្លាំង១១,៧៣% ប្រៀបធៀបទៅឆ្នាំ២០១២ ដែលកម្ពុជាបានទទួលបាន ត្រឹមតែ៣,៥៨លាននាក់ប៉ុណ្ណោះ៕
--------------------------------------------------
ដោយ ៖ កេសរកូល - ភ្នំពេញ ថ្ងៃទី២០ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ