គ្រូបង្វឹករបស់ក្រុមម៉ែនឆេស្ទើ យូណៃធីត (Manchester United) លោក សឺអាឡិច ហ្វឺកឺសិន (Sir Alex Ferguson) បាន​បដិសេដចំពោះការចូលរួមសន្និសីទសារពត៌មាន បន្ទាប់ពីក្រុមរបស់លោក ត្រូវធ្លាក់ចេញពីការប្រកួតក្នុងក្របខ័ណ្ឌ យូហ្វា ឆែមពានលីក (UEFA Champions League) ដោយប្រកួតចាញ់ក្រុមរៀលម៉ាឌ្រីដ (Real Madrid)។

លោកហ្វឺកឺសិន ឆ្ងោកមុខ ទំនងជាអន់ចិត្តនឹងលទ្ធផលផង និងការសម្រេចចិត្តរបស់អាជ្ញាកណ្ដាលផង។

ក្រុមម៉ែនញូ បង្ហាញពីការគ្រប់គ្រងបាល់បានយ៉ាងល្អដែរ នៃការប្រកួតវគ្គ ១៦ក្រុមជើងទី២ នេះ បន្ទាប់ពីកីឡាករណានី (Nani) ទាត់បាល់កាត់មុខទី នៅវគ្គទី២ ហើយត្រូវបានកីឡាករខ្សែការពារ សឺជីអូ រ៉ាម៉ូស (Sergio Ramos) ទាត់បញ្ចូលទី​ខ្លួនឯង។

ទោះបីជាយ៉ាងណាក៏ដោយ នៅប៉ុន្មាននាទីក្រោយមក កីឡាករណានី ក៏ទទួលបានកាតក្រហម បន្ទាប់ពីមានការប៉ះទង្គិច ជាមួយនឹងកីឡាករ អាវ៉ារ៉ូ អាបិលូអា (Alvaro Arbeloa)។ ហើយនេះជាឱកាស ដែលធ្វើឲ្យកីឡាករ លូកា ម៉ូឌ្រិក (Luka Modric) រកគ្រាប់បាល់តាមបានស្មើនៅនាទី ៦៦ និងគ្រាប់បាល់ជ័យជំនះ ដែលស៊ុតដោយអតីតកីឡាករ ក្រុមម៉ែនញូ​ផ្ទាល់ គឺកីឡាករ គ្រីស្ទែណូ រ៉ូណាល់ដូ (Cristiano Ronaldo) ធ្វើបានសម្រេចនៅនាទី ៦៩។ សរុបគ្រាប់បាល់ នៃការប្រកួត​ទាំង២ជើង ឃើញថាក្រុមរៀលម៉ាឌ្រីដ យកឈ្នះដោយលទ្ធផល ៣-២ ដែលអាចបន្តទៅវគ្គ ១ភាគ៨ផ្តាច់ព្រ័ត្រ​ជាបន្តទៅ​ទៀត។

លោកជំនួយការគ្រូបង្វឹក ម៉ៃ ផេឡាន (Mike Phelan) បានចូលសន្និសីទពត៌មានជំនួសលោក ហ្វឺកឺសិន ហើយបាន​ពន្យល់ថា គ្រូបង្វឹកក្រុមម៉ែនញូរូបនេះ គ្មានពាក្យអ្វីនិយាយទៅកាន់លោក អាជ្ញាកណ្តាលសញ្ជាតិទួរគី ខូនី ខាកឺ (Cuneyt Cakir) ទេ បន្ទាប់ពីគាត់សម្រេចចិត្តដេញ កីឡាកររបស់លោកចេញ។

លោក ផេឡាន បាននិយាយថា «វាការក្រៀមក្រំមួយ នៅក្នុងបន្ទប់ផ្លាស់សំលៀកបំពាក់ និងការមិនអស់ចិត្តចំពោះ លោក​គ្រូបង្វឹក។ ហើយនេះជាមូលហេតុដែលខ្ញុំអង្គុយនៅទីនេះ។ យើងគិតថា យើងមានបច្ចេកទេសត្រឹមត្រូវ សំរាប់ការ​ប្រកួត​មួយនេះ។ យើងមានអារម្មណ៏កក់ក្តៅខ្លាំងណាស់ បន្ទាប់ពីចប់វគ្គទី១ ដោយលទ្ធផល ០-០ ហើយនោះជាអ្វីដែលយើង​ចង់បាន។»

គាត់បានបន្តថា «យើងចូលមកវគ្គទី២ ហើយរកគ្រាប់បាល់បានមួយគ្រាប់ថែមទៀត ដែលធ្វើឲ្យយើងស្ថិតក្នុង​ដំណែង​វិជ្ជមាន។ ប៉ុន្តែបន្ទាប់មក ការប្រកួតក៏មានការផ្លាស់ប្តូរ។ ការសម្រេចចិត្តនេះ គឺសំខាន់ខ្លាំងណាស់ ដែលធ្វើឲ្យយើងមិន​ស្ងប់ចិត្ត ចំពោះការសម្រេចចិត្តរបស់អាជ្ញាកណ្តាល។ ការលេងជាមួយក្រុមរៀលម៉ាឌ្រីដ មានកីឡាករ ១១នាក់ គឺវា​ពិបាកណាស់ទៅហើយ។ ក្នុងការប្រកួតនេះ ជាការប្រកួតដ៏ធំ ដែលពិភពលោកកំពុងតែទស្សនា ប៉ុន្តែយើងពិតជាមាន​ការខកចិត្តនៅពេលដែលឃើញ កីឡាកររបស់យើងនៅសល់គ្នាត្រឹមតែ ១០នាក់។»

ជំនួយការរូបនេះបានបន្តថា «ខ្ញុំគិតថា គ្រូបង្វឹករកពាក្យអ្វី និយាយទៅកាន់លោកអាជ្ញាកណ្តាលគ្មានទេ អំពីការសម្រេច​ចិត្តរបស់គាត់។ ខ្ញុំគិតថា សំលេងដែលខ្ញុំនិយាយនៅទីនេះ ពេលនេះ ខណះនេះ គឺមិនមែនជា សម្តីដែលគ្រូបង្វឹក​ក្រុម​បាល់ទាត់ដ៏អស្ចារ្យនិយាយទេ។ យើងទាំងអស់គ្នា បានឃើញហើយពីការសម្រេចចិត្តមួយ ដែលអយុត្តិធម៌ ដូចជា​ឃោរឃៅ ហើយមិនគួរឲ្យជឿ ក្នុងការប្រកួតមួយនេះ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៦ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ