ក្រុមបាល់ទាត់នៃប្រទេសអាឡឺម៉ង់ បាយឺន មូនិជ (Bayern Munich) ត្រៀមលុយធំ ដើម្បីដេញថ្លៃ យកកីឡាករ​ជម្រើស​ជាតិ​ប្រេស៊ីលវ័យក្មេង ណីម៉ា (Neymar) មកចូលរួមជាមួយក្នុងក្រុម។

កីឡាករ ណីម៉ា វ័យ២១ឆ្នាំ ជាមួយនឹងម៉ូដសក់របស់គាត់។

ប្រភពពត៌មានកីឡាពីប្រទេសអេស្ប៉ាញ ស្ពតអ៊ីអេស (Sport.es) បានឲ្យដឹងថា ក្រុមដែលមាន មូលដ្ឋាននៅទីក្រុងបាវ៉ារៀន (Bavarian) មួយនេះ ត្រៀមចំណាយប្រាក់ ១០០លានដុល្លា (៨៦លានផោន) ក្នុងការប្រជែងទិញយក តារាឆ្នើម​របស់ក្រុម​សានតូស (Santos) គឺកីឡាករដែលមានតម្លៃខ្លួនថ្លៃបំផុត ណីម៉ា។

អ្នកគាំទ្រក្រុមជម្រើសជាតិប្រេស៊ីលជាច្រើននាក់រំពឹងថា កីឡាករវ័យ ២១ឆ្នាំរូបនេះអាចនៅបន្ត ក្នុងប្រទេសកំណើត​របស់​គាត់ រហូតដល់ការប្រកួតបាល់ទាត់ពិភពលោក ឆ្នាំ២០១៤ ចប់។ ប៉ុន្តែក្រុមបាសេឡូណា (Barcelona) ហាក់ដូចជាចង់​លួងលោម នាំយកខ្សែប្រយុទ្ធរូបនេះឆាប់ៗ និងដាក់សំណើរមួយជាក់លាក់ ដូច្នេះវាពិតជាពិបាក បើសិនជាក្រុមបាល់ទាត់​ នៅទីក្រុងសៅ ប៉ូឡូមួយនេះ ចង់បដិសេដ។

ជាមួយនឹងក្រុម បាយឺន មូនីជ ដែលកំពុងតែនាំមុខ និងធ្វើដំណើរសំដៅទៅរកជ័យជំនះ ក្នុងលីក និងអាចបន្តដំណើរ​ទៅ​កាន់វគ្គ ១ភាគ៨ ផ្តាច់ព្រ័ត្រនៃក្រមខ័ណ្ឌ ឆែមពានលីក (Champions League)។ កីឡាករ ណីម៉ា អាចនឹងមានអារម្មណ៏​ល្អ​ក្នុងការប្តូរទៅកាន់ ក្រុមនៃទីក្រុងបាវ៉ារៀន។ ការផ្ទេរនេះជាចំណង់មួយរបស់កីឡាកររូបនេះ ស្របពេលដែល លោក ប៉េប កាឌីអូឡា (Pep Guardiola) នឹងត្រូវមកដឹកនាំក្រុម នៅឯកីឡាដ្ឋាន អាឡែន អារ៉េណា (Allianz Arena) នៅរដូវក្តៅខាង​មុខ។

កីឡាករ ណីម៉ា បានរកគ្រាប់បាល់បញ្ចូលទីយ៉ាងសប្បាយរីករាយក្នុងប្រទេស ប្រេស៊ីល ដោយគាត់រកបាន ១២៩ គ្រាប់ ក្នុង​ការប្រកួតសរុប ២០៩ប្រកួត។ ប៉ុន្តែវាជាការពិបាកសម្រេចចិត្តមួយ ពីអនាគតរបស់គាត់ ក្នុងការជ្រើសរើស​ក្រុមធំ​នៅ​អ៊ឺរ៉ុបមួយ សំរាប់អាជីពបន្តរបស់គាត់ ហើយអ្វីទាំងអស់នេះកំពុងតែស្ថិតក្នុងភាពស្រពិចស្រពិល។

ខ្សែបំរើប្រយុទ្ធរូបនេះ បានរកគ្រាប់បាល់បានទៀងទាត់ សំរាប់ក្រុមជម្រើសជាតិប្រេស៊ីល ដោយគាត់រកបាន ១៧គ្រាប់ ក្នុងការប្រកួត ២៧លើក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ