ហេតុការណ៍បានកើតឡើង នៅវេលាម៉ោងប្រមាណជា ២១ កាលពីថ្ងៃទី២៦ ខែមេសាកន្លងទៅ នៅ​ក្នុ​ង​ហាង​លក់​សង់វិច​មួយ ឈ្មោះ «Jimmy John’s» ក្នុងក្រុង «Kansas City» នៃរដ្ឋ «Missouri» សហរដ្ឋ​អាមេរិក។ បន្ទាប់​ពី​បាន​ចូលទៅបញ្ជាទិញ នូវ«អ្វី» ដែលខ្លួនធ្វើឬក ដូចជាចង់ទិញនោះរួច បុរសម្នាក់ សម្បុរ​ខ្មៅ មាឌ​ធំ​ក្រអាង ជាមួយ​នឹង​សម្លៀកបំពាក់កីឡា បានដកកាំភ្លើង ចេញពីហោប៉ៅ​អាវ​ខ្លួន ហើយភ្ជង់​ទៅរក​អ្នកលក់ និង​គម្រាម​ឲ្យ​ប្រមូល​ប្រាក់​ទាំងអស់ នៅក្នុងប្រអប់​គិតលុយ យកមកឲ្យខ្លួន។

គ្មានបញ្ហា! ហើយក៏មិនជជែក វែកញែកអ្វីច្រើន ជាមួយចោរប្លន់ម្នាក់នេះដែរ។ អ្នកលក់ចិត្ត​ត្រជាក់ បាន​ធ្វើ​តាម​បញ្ជា​ចោរ ដោយបានប្រមូល​ប្រាក់ទាំងប៉ុន្មាន (ប្រមាណជា​២៨០ដុល្លារ) នៅក្នុង​ប្រអប់​គិតលុយ ហុច​ទៅ​ចោរ​ទាំង​អស់។ អ្នក​លក់​រូបនោះ ថែមទាំងដក​យក​ប្រអប់នោះ ទៅបង្ហាញ​«ជូន​លោកចោរ» ឲ្យបាន​ឃើញថា «អស់​ប្រាក់​ហើយ» នោះ​ទៀត​ផង។

វីដេអូខាងក្រោម ត្រូវបានដាក់​បង្ហោះ នៅលើ​គេហទំព័រ យូធូប (Youtube) ដោយ​នគរបាល​ក្រុង «Kansas City» នៅ​មួយ​ថ្ងៃ​​ក្រោយ​​ពេល​​កើតហេតុ។ តែគ្រាន់​តែក្នុងរយៈពេល​ប៉ុន្មានថ្ងៃ​ប៉ុណ្ណោះ វីដេអូនេះទទួល​បាន​ចុច​ចូល​​ទៅទស្សនា ប្រមាណ​ជាង៧លាន​ដង រួចស្រេច​ទៅហើយ។

អ្នកលក់ចិត្តត្រជាក់​ម្នាក់នោះ គឺលោក «Tuker Murray» នាយករង​របស់​ហាងលក់សង់វិច «Jimmy John's»។ លោកបានពន្យល់ ប្រាប់គេហទំព័រ «TMZ» នូវអ្វីដែលលោក​បានប្រឈមមុខ ក្នុងពេល​កើតហេតុ ដូច្នេះ​ថា៖ ​«គាត់​ម្នាក់​ហ្នឹង បានមកចូល​បញ្ជា​ទិញ ហើយបន្ទាប់មក ស្រាប់តែគាត់​បាន​ដកកាំភ្លើង ចេញមក ដើម្បី​ប្លន់​ប្រាក់​ពី​ខ្ញុំ ដូច​មនុស្សភ្លើ​​មិនដឹង​​ខ្យល់​​អញ្ចឹង។ ខ្ញុំអត់មាន​ភ័យ​ភិត​អ្វីទាំងអស់ ហើយ​គាត់​​ម្នាក់ហ្នឹង ក៏គ្មាន​អ្វី​គួរ​ឲ្យ​​ខ្លាច​​ដែរ។ បើខ្ញុំ​ដឹងថា កាំភ្លើង​នេះ​​អត់​គ្រាប់​ទេ ម្លេះខ្ញុំប្រហែល​​ជា​មិន​ទុក ឲ្យគាត់​ភ្ជង់ខ្ញុំ​​ដូច្នេះ​​ឡើយ។»។

ចំណែកឯជនល្មើសវិញ មានឈ្មោះ «Terry Rayford» អាយុ៥៤ឆ្នាំ ត្រូវបាននគរបាល​​ឃាត់​ខ្លួន តាំង​ពី​ក្រោយ​ពេល​កើត​ហេតុ​​ហើយ​ភ្លាមៗ។ បុរសម្នាក់នេះ ធ្លាប់បាន​លួច និងប្លន់ ក្នុងពេល​កន្លង​មក ប្រមាណជា​១២ដង ​ដោយ​ប្រើ​សកម្មភាព​​ប្រហាក់​ប្រហែលគ្នា និងធ្លាប់មាន​អ​​តីតកាល ជាប់​ក្នុងពន្ធនាគារ​រួចហើយ៕