ឃាតកម្ម​បាញ់​សម្លាប់​ព្រះ​តេជគុណ ម៉ឹង អុំ ព្រះ​ជន ៧៦ព្រះ​វស្សា ជា​គ្រូ​សូត្រ​ស្តាំ នៅ​វត្ត​អង្គ ស្ថិត​នៅ​ភូមិ​ថ្មី ឃុំ​តាំង​ក្រូច ស្រុក​សំរោង​ទង ខេត្ត​កំពង់ស្ពឺ កាល​ពី​វេលា​ម៉ោង ៨និង​២៥ នាទី​យប់​ថ្ងៃ​២៤ ខែ​មករា ២០១៥ ត្រូវ​បាន​ក្រុម​សមត្ថកិច្ច​ធ្វើការ​សន្និដ្ឋាន​ថា ជា​ករណី​គំនុំ។ ព្រះ​សង្ឃ​អង្គ​នេះ ត្រូវ​បាន​ខ្មាន់​កាំភ្លើង​បាញ់​ចំ​កណ្ដាល​ព្រះ​កេស ខណៈ​ព្រះ​អង្គ​កំពុង​សូត្រ​ធម៌​ទេសនា ក្នុង​កម្មវិធី​បុណ្យ​ខួប​នៅ​ផ្ទះ​របស់​លោក គង់ ឌឹម អាយុ ៦៥ឆ្នាំ ជា​ម្ចាស់​ដើម​បុណ្យ។

សម្រាប់ព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គមវិញ បានឈ្វេង​យល់ថា សេចក្ដីសន្និដ្ឋានរបស់ក្រុមសមត្ថកិច្ច ដូចជាលឿនពេក ព្រោះគេត្រូវតែស៊ើបអង្កេតឲ្យអស់ពីលទ្ធភាព ដើម្បីវែករកមុខឃាតករ  មុននឹងធ្វើការសន្និដ្ឋានយ៉ាងនេះ។ ព្រះសង្ឃបានមានសង្ឃដីកាថា ឃាតកម្មបាញ់​សម្លាប់ព្រះសង្ឃ ម៉ឹង អុំ ជាករណីមួយដែលគួឲ្យភ័យខ្លាច ហើយករណីទាំងនេះ សមត្ថកិច្ចភាគច្រើន​តែងតែ​ទាញយកមកដាក់ នៅក្នុងបញ្ហាគំនុំ តួយ៉ាងដូចជាករណីបាញ់សម្លាប់ ព្រះសង្ឃខ្មែរក្រោម និងព្រះសង្ឃខ្មែរ​កណ្តាលជាដើម។ ប៉ុន្តែសមត្ថកិច្ច មិនដែលវែកមុខរកឃាតករឃើញនោះទេ គ្រាន់តែធ្វើការសន្និដ្ឋានថា ពាក់​ព័ន្ធបញ្ហគំនុំ បញ្ហានយោបាយ ឬបញ្ហាប្រជាប្រិយភាព រួចបញ្ឈប់ការស្រាវជ្រាវតែម្តង។

ព្រះតេជគុណបានធ្វើការអំពាវនាវថា បើទោះជារឿងគំនុំមែននោះក៏ដោយ ក៏ករណីព្រះសង្ឃខ្មែរមួយអង្គនេះ គួតែត្រូវបានស្រាវជ្រាវ ឲ្យច្បាស់ថា អ្នកណាជាអ្នកនាំរឿងមក បណ្តាលឲ្យមានបញ្ហាធំនេះ។ បើតាមសង្ឃ​ដីការបស់ព្រះសង្ឃ ប៊ុត ប៊ុនតិញ បានឲ្យដឹងទៀតថា វាពិបាកនឹងសន្និដ្ឋាន«ជាករណីគំនុំ»ណាស់ ព្រោះព្រះ​សង្ឃ ម៉ឹង អុំ គ្រូសូត្រស្តាំមានព្រះជនដទៅ ៧៦ព្រះវស្សាទៅហើយ ហើយគង់នៅតែក្នុងវត្តប៉ុណ្ណោះ។ ករណី​ឃាតកម្មនេះ អាចមានពាក់ព័ន្ធតែនឹងប្រជាប្រិយភាព របស់សង្ឃរងគ្រោះនោះឯង ព្រោះព្រះសង្ឃ ម៉ឹង អ៊ំ មានការគោរពស្រលាញ់រាប់អានជាច្រើន ពីប្រជាពលរដ្ឋ ព្រោះចេះទេសនាពិរោះមានកេរ្តិ៍ឈ្មោះល្បីល្បាញ ដែលអាចបណ្តាលកើតមានសេចក្តីច្រណែនឈ្នានីស។

សូមរំលឹកដែរថា នៅក្រោយឃាតកម្មបាញ់សម្លាប់ព្រះសង្ឃខាងលើ សមត្ថកិច្ចបានចុះទៅធ្វើការត្រួតពិនិត្យ ដល់ផ្ទះកើតហេតុនោះ ដើម្បីធ្វើការស៊ើបសួរ និងអង្កេត។ ប៉ុន្តែសមត្ថកិច្ចមិនទាន់ដឹងថា អ្នកណា​ជាឃាតករ​ពិតប្រាកដនោះទេ ដោយសារការសាកសួររបស់សមត្ថកិច្ច ជាមួយប្រជាពលរដ្ឋ នៅក្នុងកន្លែងកើតហេតុនោះ ហាក់ដូចជាមិនមាននរណាម្នាក់ ហ៊ាននិយាយអ្វីឡើយ ហើយអ្នកខ្លះទៀតឆ្លើយថាមិនដឹង និងមិនបាន​ឃើញ​ខ្មាន់កាំភ្លើងនោះទេ៕