ខៀវ កាញារីទ្ធ អះអាង​ថា ជុន ច័ន្ទបុត្រ មាន​ទោស

ជាប្រតិកម្មលើក​ដំបូង និងជាសាធារណៈ របស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ទៅនឹងករណី​របស់​លោក ហួត វុទ្ធី ហៅ ជុន ច័ន្ទបុត្រ ដែលបានចូល ទៅក្នុងពន្ធនាគារព្រៃស កាលពីថ្ងៃទី១៩ ខែមេសាកន្លងទៅ ជាមួយនឹងក្រុមតំណាងរាស្ត្រ មកពីគណបក្សសង្គ្រោះជាតិ។ លោកបាន​ហៅ​ទង្វើ​របស់​លោក ហួត វុទ្ធី ថាជាទង្វើខុសច្បាប់ ដែលត្រូវទទួលទោស តែមិនដឹងថា ទោសកម្រិតណានោះឡើយ។
ខៀវ កាញារីទ្ធ អះអាង​ថា ជុន ច័ន្ទបុត្រ មាន​ទោស
លោក ហួត ឃីន​វុទ្ធី ហៅ ជុន ច័ន្ទបុត្រ នាយករងវិទ្យុអាស៊ីសេរី ផ្នែកខេមរភាសា។ (រូបថតលើហ្វេសប៊ុក)
Loading...
  • ដោយ: ដារា រិទ្ធ ([email protected]) - ភ្នំពេញ ថ្ងៃទី០៣ ឧសភា ២០១៧
  • កែប្រែចុងក្រោយ: May 04, 2017
  • ប្រធានបទ: ប្រព័ន្ធផ្សព្វផ្សាយ
  • អត្ថបទ: មានបញ្ហា?
  • មតិ-យោបល់

ទង្វើរបស់លោក ហួត វុទ្ធី ដាក់រហស្សនាម ជុន ច័ន្ទបុត្រ នាយករងវិទ្យុអាស៊ីសេរី ផ្នែកខេមរភាសា ដែលបានចូលក្នុងពន្ធនាគារ ព្រៃស ជាមួយក្រុមតំណាងរាស្ត្រ មកពីគណបក្សសង្គ្រោះជាតិ កាលពីថ្ងៃទី១៩ ខែមេសាកន្លងមកនោះ ជាទង្វើខុសច្បាប់កម្ពុជា ដែលត្រូវមានទោស។ នេះ ជាការអះអាងឡើងរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅក្នុងពិធីគោរពវិញ្ញាណក្ខន្ធអ្នកសារព័ត៌មាន ដែលបានស្លាប់​ក្នុងសម័យសង្គ្រាម​ កាលពីរសៀលថ្ងៃទី៣ ខែឧសភានេះ ស្របគ្នា​នឹង​ទិវា​សេរីភាព​​សារព័ត៌មាន​ពិភពលោក លើកទី១៦ នៅរាជធានីភ្នំពេញ។

«ជាទូទៅ... ជាគោលការណ៍...»

ថ្លែងទៅកាន់ក្រុមអ្នកយកព័ត៌មាន ដែលបានសាកសួរលោក ពីករណីរបស់លោក ជុន ច័ន្ទបុត្រ លោក ខៀវ កាញារីទ្ធ បានអះអាងថា៖ «ជា​ទូទៅ​ ចំពោះ​អាជ្ញាធរ​មាន​សមត្ថកិច្ច​ ​គឺ​ការ​បន្លំ​ គឺ​ជា​ការ​ខុស​ហើយ។ ហ្នឹង​​(និយាយ)​ពី​ច្បាប់ យើង​បន្លំ​ជាមួយ​សមត្ថកិច្ច​ គឺ​ខុស។​ ប៉ុន្តែ​យើង​បន្លំ​ជាមួយ​សង្គម​ងងឹត យើង​បន្លំ​នៅ​កន្លែង​ណា ​ក្រុម(ណា)​​ដែល​ប្រព្រឹត្ត​ខុស​ច្បាប់​ យើង​ត្រូវ​តែ​បន្លំ​ខ្លួន​ហើយ​ ដើម្បី​សុវត្ថិភាព​ខ្លួន​យើង​ ​ដើម្បី​ទទួល​បាន​ព័ត៌មាន។»។

លោករដ្ឋមន្ត្រីបានបញ្ជាក់បន្ថែមថា៖ «ជាគោលការណ៍ អ្នកការសែត បើយើងស្វែងរកឯកសារ ទាក់ទងនឹងក្រុមអង្គការក្រៅច្បាប់ ទាក់ទងនឹងសកម្មភាពក្រៅច្បាប់ យើងត្រូវតែលាក់អត្តសញ្ញាណរបស់យើង។ តែបើយើងលាក់​អត្តសញ្ញាណរបស់យើង ជាមួយអាជ្ញាធរ​មានសមត្ថកិច្ច គឺមានទោសហើយ។ ទោសណាខ្ញុំមិនដឹងទេ។ តែឥឡូវគេ(តុលាការ)មិនទាន់កាត់ក្តីទេ។ លោក ជុន ច័ន្ទបុត្រ រត់ចេញបាត់ហើយហ្នឹង!»។

លោក ហួត វុទ្ធី បានចាកចេញពីកម្ពុជា កាលពីរសៀលថ្ងៃសុក្រ ទី២៨ ខែមេសា នៅប៉ុន្មានថ្ងៃ បន្ទាប់ពីលោកទទួលបានដីកាកោះ ពីសំណាក់តុលាការសាលាដំបូងរាជធានីភ្នំពេញ តាម​រយៈព្រះ​រាជ​​អាជ្ញា​រង ​​លោក​ សៀង សុខ ឲ្យចូល​ទៅបង្ហាញខ្លួន ក្នុង​នាម​ជា​«ជន​សង្ស័យ» នៅ​ថ្ងៃ​ទី២ ខែឧសភានេះ។

នៅទីបំផុតទៅ លោក ហួត វុទ្ធី មិនបានបង្ហាញខ្លួន តាមដីកាកោះទេ។ កាលពីពេលកន្លងមក លោកបានបដិសេធ​ការចោទប្រកាន់ និង​អះអាង​ថា លោកមិនបាន​ក្លែង​​ឈ្មោះ​ពិត របស់​​លោក នៅក្នុង​បញ្ជី​កត់​​ឈ្មោះ អ្នកចូល​​ពន្ធនាគារ​​នោះឡើយ។

សេរីភាពសារព័ត៌មាននៅកម្ពុជា...

នៅក្នុងសេចក្ដីថ្លែងការណ៍មួយ ដែលចេញផ្សាយ នៅយប់ថ្ងៃទី១ ខែឧសភា បានឲ្យដឹងថា ស្ថាប័ន​វិទ្យុអាស៊ីសេរី ពីរដ្ឋធានី វ៉ាស៊ីនតោន សហរដ្ឋអាមេរិក បានសម្រេច មិនឲ្យលោក ហួត វុទ្ធី វិលត្រឡប់​ទៅប្រទេស​កម្ពុជាវិញទេ។ ស្ថាប័នផ្សព្វផ្សាយចម្រុះភាសាមួយនេះ បាន​ចាត់​ទុក ចំណាត់ការ​របស់​អាជ្ញាធរក​ម្ពុជា ប្រឆាំង​លោក ហួត វុទ្ធី គឺជារឿង​នយោបាយ ក្នុងចេតនា​បង្វែង ចំណាប់​អារម្មណ៍​​ប្រជាពលរដ្ឋ​ខ្មែរ ក្នុងរដូវកាល​បោះឆ្នោត និងរឹត​តែ​បង្ហាញ​ឲ្យ​ឃើញ នូវ​ស្ថានភាព​ដ៏អាក្រក់ នៃ​សេរីភាព​សារព័ត៌មាន​ នៅ​កម្ពុជា។

​កាលពីសប្ដាហ៍មុន អង្គការ​អន្តរជាតិធំៗ​ ចំនួនពីរ ​ដែល​ធ្វើ​ការ​ផ្នែក​សារព័ត៌មាន​ បានលើកឡើងថា សេរីភាព​សារព័ត៌មាន​នៅ​កម្ពុជា ​មាន​ការ​ធ្លាក់​ចុះ។​ អង្គការទាំងពីរនោះ មានអង្គការ​អ្នក​យកព័ត៌មានគ្មាន​ព្រំដែន​ ​(Reporters Without Border) ដែល​រក​ឃើញ​ថា​ ​សេរីភាព​សារព័ត៌មាន​នៅ​កម្ពុជា​ កាន់​តែ​អាក្រក់​ និង​អង្គការ​ឃ្លាំ​មើល​សេរីភាព​​​ពិភពលោក​ (Freedom House) ដែលរក​ឃើញ​ថា កម្ពុជា​​ជា​ប្រទេស​​គ្មាន​សេរីភាព​​​សារព័ត៌មាន

«កម្ពុជា គឺ ជានីតិរដ្ឋ»

ចំពោះរដ្ឋមន្ត្រីក្រសួងព័ត៌មានវិញ សេរីភាពសារព័ត៌មាននៅកម្ពុជា មិនមានស្ថានភាពអាក្រក់ ដូចការលើកឡើង ខាងលើនេះទេ។ លោក ខៀវ កាញារីទ្ធ បានលើកយកករណី របស់លោក ហួត វុទ្ធី មកពន្យល់ថា៖ «កម្ពុជា គឺ ជានីតិរដ្ឋ។ មនុស្សពេលណាតុលាការ​មិន​ទាន់​កាត់ទោស គឺមិនមានទោសទេ ហើយក៏គ្មានអ្នកណាហាមលោក ជុន ច័ន្ទបុត្រ ថាមិនឲ្យចេញ ទៅក្រៅប្រទេសដែរ ។ ឯអ្នកនយោបាយ បើគាត់មានបញ្ហាហើយ យើងថា មិនឲ្យគាត់ចេញ គឺ ចេញអត់បានទេ។ លោក ជុន ច័ន្ទបុត្រ បើតុលាការហាមថា មិនឲ្យគាត់ចេញ ក៏ចេញមិនបានដែរ។»។

បញ្ហានៅត្រង់ថា លោក ខៀវ កាញារីទ្ធ ខ្លួនលោកផ្ទាល់ មិនបានលើកយកច្បាប់ និងមាត្រាណាមួយនោះ ដែលត្រូវយកមកដាក់ ទៅលើអ្នកសារព័ត៌មាន ក្នុងករណីនេះ​ទេ។ ឬគេត្រូវអនុវត្តន៍ ទៅតាម«ទិសដៅ»នៃពាក្យ «ជាទូទៅ» និង«ជាគោលការណ៍» ដែលលោកបានលើកឡើងខាងលើ?

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...