ឃាតកម្ម កែម ឡី៖ សាលក្រមនឹងត្រូវប្រកាសនៅថ្ងៃទី២៣ មិនា
- ដោយ: ដារា រិទ្ធ ([email protected]) - ភ្នំពេញ ថ្ងៃទី០១ មិនា ២០១៧
- កែប្រែចុងក្រោយ: March 01, 2017
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
ដូចការគ្រោងទុក សាលាដំបូងរាជធានីភ្នំពេញ បានបើកសវនាការជំនុំជម្រះ នៅព្រឹកថ្ងៃទី១ ខែមិនានេះ ទៅលើករណីឃាតកម្ម បាញ់សម្លាប់លោក កែម ឡី អ្នកស្រាវជ្រាវផ្នែកសង្គម ដែលបានកើតឡើង ផ្អើលអស់កណ្ដាលរាជធានី ភ្នំពេញ កាលពីខែកក្កដាកន្លងទៅ។ តែគេត្រូវរង់ចាំរយៈពេល ជាង២០ថ្ងៃទៀត ដើម្បីដឹងពីសាលក្រមសម្រេច ចេញពីសវនាការកាត់ទោសមួយនេះ ដែលពោរពេញដោយក្ដីមន្ទិល។
លោក អឿត អាង ហៅ ជួប សំលាប់ ដែលរងការចោទប្រកាន់ ថាជាអ្នកបាញ់សម្លាប់ លោកបណ្ឌិត កែម ឡី នោះ ត្រូវបាននាំខ្លួន មកក្នុងអង្គជំនុំជម្រះ ដើម្បីធ្វើការសាកសួរ នៅក្នុងសវនាការ ដែលបានចាប់ផ្ដើមតាំងពីម៉ោង ៨ព្រឹក និងបានបញ្ចប់ទៅ នៅវេលាម៉ោងប្រមាណជា ១រសៀល ថ្ងៃនេះដដែល ដោយមានលោក យុង ផានិត ជាមេធាវីការពារក្ដី ឲ្យជនជាប់ចោទ។
គ្មានការបញ្ចាំង រូបភាពច្បាស់ៗ នៃកាម៉េរ៉ាសុវត្ថិភាពទេ...
បុរសដាក់រហស្សនាម ជួប សម្លាប់ រូបនេះ គឺជាជនសង្ស័យតែម្នាក់គត់ នៅក្នុងករណីឃាតកម្មនេះ ហើយគេមិនបានឃើញ ជនជាប់ពាក់ព័ន្ធផ្សេងទៀត ដែលមានជាអាទិ៍ អ្នកលក់អាវុធ អ្នកទទួលឲ្យជនសង្ស័យស្នាក់នៅ ជាដើមនោះ ត្រូវបានតុលាការកោះហៅមកទេ។ ជាពិសេសរូបភាព«ច្បាស់ៗ» ដែលថតជាប់ ដោយកាម៉េរ៉ាសុវត្ថិភាព នៅក្នុងហាងទំនិញនោះ ក៏មិនត្រូវបានតុលាការ យកមកបញ្ចាំង នៅក្នុងសវនាការឡើយ ដោយគ្រាន់តែបង្ហាញពីឃ្លីបវីដេអូ ប្រមាណជា៧ឃ្លីប ដែលមានរូបភាពព្រិល មើលមិនច្បាស់។ សាក្សីជាច្រើននៅក្នុងសវនាការ មិនហ៊ានអះអាងថា ជនសង្ស័យដាក់ឈ្មោះ ជួប សម្លាប់ នេះ គឺជាឃាតករពិតប្រាកដឡើយ។
នៅចុងបញ្ចប់សវនាការ ប្រធានក្រុមបឹក្សាជំនុំជម្រះ លោកចៅក្រម លាង សំណាត់ បានបញ្ជាក់ថា សាលក្រមសម្រេចនៃសវនាការនេះ នឹងប្រកាស នៅថ្ងៃទី២៣ ខែមីនា ខាងមុខ។ ការប្រកាសនេះ ក៏ត្រូវបានអះអាងបន្ថែម ដោយលោក លី សុផាណា តំណាងអយ្យការ នៅក្នុងសវនាការ និងជាអ្នកនាំពាក្យសាលាដំបូងរាជធានីភ្នំពេញ នៅពេលបន្តិចក្រោយមកដែរ។
អាថ៌កំបាំង ដែលនៅតែមាន...
អស់រយៈពេលជិត៨ខែ កន្លងទៅហើយ តែរឿងរ៉ាវស៊ើបអង្កេត ចេញពីសំនុំរឿងដ៏ធំនេះ ត្រូវបានគេដឹងតិចតួចជាទីបំផុត។ លោក កែម ឡី ត្រូវបានខ្មាន់កាំភ្លើងបាញ់សម្លាប់ នៅនឹងកន្លែង ដោយគ្រាប់កាំភ្លើងចំនួនពីរគ្រាប់ មួយគ្រាប់ចំសៀតផ្កា និងមួយគ្រាប់ទៀត ចំទ្រូង នៅម៉ោងប្រមាណជា ៩ព្រឹក ប៉ុន្មានថ្ងៃបន្ទាប់ពីអ្នកស្រាវជ្រាវ ផ្នែកសង្គម និងជាអ្នកធ្វើអត្ថាធិប្បាយ នយោបាយខ្មែរ ដ៏ល្បីឈ្មោះរូបនេះ បានធ្វើការពន្យល់ ពីរបាយការណ៍មួយ របស់អង្គការឃ្លាំមើលពិភពលោក (ហៅជាភាសាអង់គ្លេស Global Witness) ដែលនិយាយពីការរកស៊ីមានបាន ក្នុងទឹកប្រាក់ច្រើនរយលានដុល្លារ របស់ក្រុមគ្រួសារផៅសន្ដាន របស់លោកនាយករដ្ឋមន្ត្រី ហ៊ុន សែន នៅក្នុងវិស័យធំៗសំខាន់ៗ ដែលល្បីល្បាញថាជាវិស័យ ដែលសម្បូរដោយអំពើពុករលួយ។
នៅប្រមាណជា១ម៉ោង ក្រោយឃាតកម្មនេះ ជនសង្ស័យឈ្មោះ ជួប សម្លាប់ ខាងលើ ដែលបានរត់នៅតាមដងផ្លូវ ត្រូវបានក្រុមអាជ្ញាធរចាប់ខ្លួន។ ភ្លាមៗនោះ ជនសង្ស័យបានសារភាព ថាលោកជា«ឃាតករ» ក្រោមមូលហតុថាលោក ចង់ជម្រះបញ្ជីលើលោក កែម ឡី ព្រោះការជំពាក់ប្រាក់មិនសង ចំនួន៣០០០ដុល្លារ។ ការសារភាពនោះ ត្រូវបានសារព័ត៌មានស្និតនឹងរដ្ឋាភិបាល និងគណបក្សកាន់អំណាច ជាច្រើនព្រោងព្រាត យកមកផ្សព្វផ្សាយ ដោយមានអមនឹងវីដេអូ ថតពីសម្ដីអះអាង របស់ជនសង្ស័យនោះផង។
ប៉ុន្តែការលើកឡើងរបស់ ជួប សម្លាប់ ត្រូវបានក្រុមគ្រួសារលោក កែម ឡី ជាពិសេសភរិយាលោក គឺអ្នកស្រី ប៊ូ រចនា បដិសេធដាច់អហង្កា និងបានបរិហារពីឃាតកម្ម បែបនយោបាយមួយ។ អ្នកជំនាញច្រើននាក់ ក៏បានគិតភ្លាមៗ នៅក្រោយឃាតកម្មដែរថា ឃាតករគឺជាអ្នកកាន់កាំភ្លើង ដ៏ជំនាញម្នាក់ ដែលដឹងយ៉ាងច្បាស់ ពីចំណុចសំខាន់ «បាញ់ចំគឺស្លាប់ភ្លាម» ហើយឃាតករនោះ មិនអាចជាជនសង្ស័យ «ជួប សម្លាប់» នេះឡើយ៕