ក្រុម រៀល នៅតែខ្លាំងដោយបំបាក់ក្រុម ណាប៉ូលី ៣-១
- ដោយ: ជ័យវិបុល ([email protected]) - ប៉ារីស ថ្ងៃទី១៥ កុម្ភៈ ២០១៧
- កែប្រែចុងក្រោយ: February 16, 2017
- ប្រធានបទ: ជើងឯកអ៊ឺរ៉ុប
- អត្ថបទ: មានបញ្ហា?
- មតិ-យោបល់
-
បើទោះជាមួយគ្រាប់ របស់កីឡាករ «Lorenzo Insigne» នៃក្រុម ណាប៉ូលី (Napoli) តាំងពីនាទីទី៨ បាននាំមុខក្រុមខ្លួនក៏ដោយ តែកីឡាករដ៏ល្បីៗ របស់ក្រុម រៀលម៉ាឌ្រីត (Real Madrid) មិនរង្គើខ្លួន ឬញាប់ញ័រសូម្បីបន្តិចឡើយ នៅក្នុងការប្រកួតវគ្គ ១ភាគ៨ ផ្ដាច់ព្រ័ត្រ នៃក្របខណ្ឌដណ្ដើមជើងឯកអ៊ឺរ៉ុប (Champions League) ឆ្នាំ២០១៦-២០១៧ ក្នុងយប់ថ្ងៃពុធ ទី១៥ ខែកុម្ភៈនេះ។ ក្រុមម្ចាស់ពានជើងឯកអ៊ឺរ៉ុប ឆ្នាំមុនមួយនេះ នៅតែមានជំហរបាល់រឹងមាំ ការលេងយកប្រៀប និងរកឱកាសបានច្រើនដង ក្នុងការទាត់បញ្ចូលទី របស់គូប្រកួត រហូតលុះត្រារកបាន៣គ្រាប់វិញ។
គ្រាប់បាល់ទាំងបីនោះ របស់ក្រុមរៀល រកបានដោយកីឡាករ «Karim Benzema» នៅនាទីទី១៨ - កីឡាករ «Toni Kroos» នៅនាទីទី៤៩ និងដោយកីឡាករ «Casemiro» នៅនាទីទី៥៤។ មួយគ្រាប់ចុងក្រោយនេះ ជាការទាត់ផ្កាប់បង្វិលខ្លួន របស់កីឡាករអន្តរជាតិ «Casemiro» មកពីប្រទេសប្រេស៊ីល តាំងពីចំងាយប្រមាណជា២០ម៉ែត្រ ដែលធ្វើឲ្យអ្នកទស្សនា មិនព្រឺព្រួចមិនបាន។
ផ្ទុយទៅវិញ កីឡាករអន្តរជាតិ គ្រីស្ទៀណូ រ៉ូណាល់ដូ (Cristiano Ronaldo) វិញ រកមិនបានគ្រាប់បាល់ សូម្បីតែមួយ នៅក្នុងការប្រកួតនេះ បើទោះជាបានព្យាយាម ទាត់បញ្ចូលទីចំនួនពីរដង នៅនាទីទី២៨ និងនាទីទី ៦៦ នោះក៏ដោយ។
លទ្ធផល ចេញពីការប្រកួតនេះ បានផ្ដល់ក្ដីសង្ឃឹមយ៉ាងច្រើន សម្រាប់ក្រុមរៀល ក្នុងជំហានឡើងទៅប្រកួត នៅវគ្គ១ភាគ៤ នៃការប្រកួតជើងឯកអ៊ឺរ៉ុប ឆ្នាំនេះ ជាពិសេស នៅចំពោះក្រុម ណាប៉ូលី ដែលមិនបានបង្ហាញ ពីជំហរបាល់រឹងមាំ ឬការវាយសម្រុក ប្រកបដោយគ្រោះថ្នាក់ ឲ្យបានច្រើនឡើយ។ ប៉ុន្តែពិន្ទុនេះ មិនបានធ្វើឲ្យក្រុមបាល់ទាត់ មកពីប្រទេសអ៊ីតាលី សំដែងក្ដីអស់សង្ឃឹមទាំងស្រុងឡើយ ដោយសារថា បើក្រុមខ្លួនរកបានពិន្ទុ ត្រឹមតែ ២ទល់នឹង០ នៅក្នុងការប្រកួត«ត្រឡប់ ឬជុំទី២» នោះ គឺខ្លួននឹងបានឡើង ទៅវគ្គខាងលើទៀត។
លោក «Maurizio Sarri» គ្រូបង្វឹករបស់ក្រុម ណាប៉ូលី បានថ្លែងនៅក្រោយការប្រកួត ទទួលស្គាល់ថាក្រុមលោក លេងមិនបានល្អ បាល់តែងត្រូវបានក្រុម រៀល ដណ្ដើមបាន។ លោកថា៖ «យើងនឹងព្យាយាម ដើម្បីឈ្នះការប្រកួតលើកក្រោយ ត្រឹមតែ២-០ គឺគ្រប់គ្រាន់ហើយ តែខ្ញុំគិតថា ក្រុម រៀល នឹងមិនយល់ព្រមទេ»។
ចំពោះលោក ហ្សីណាឌីន ហ្សីដាន់ (Zinedine Zidane) គ្រូបង្វឹករបស់ក្រុម រៀល វិញ បានថ្លែងថា ក្រុមលោកនឹងទៅប្រកួត នៅក្រុង ណាព្ល៍ (Naples - ក្រុងក្នុងប្រទេសអ៊ីតាលី ដែលក្រុម ណាប៉ូលី ស្ថិតនៅ) ក្នុងខែមិនាខាងមុខ ជាមួយនឹងលទ្ធផល ដែលក្រុមលោកបានឈ្នះ នៅថ្ងៃនេះ។ លោកបញ្ជាក់ថា ក្រុមលោកនឹងព្យាយាម រកគ្រាប់បាល់បន្ថែមឲ្យបាន។ លោកថា៖ «ច្បាស់ហើយថា យើងនឹងព្យាយាម។ តែទោះជាលទ្ធផល អាចចេញមក ខុសពីការរំពឹងទុកក៏ដោយ ក៏ការផ្ចង់អារម្មណ៍របស់យើង សាមគ្គីភាពក្នុងក្រុម និងការដាក់ក្រឡាទាត់ នឹងមិនមានការផ្លាស់ប្ដូរឡើយ។»៕
» វីដេអូសង្ខេប នៃការប្រកួត៖