ខ្សែបម្រើក្រុមរៀលម៉ាឌ្រីដ (Real Madrid) ម៉េស៊ូត អូស្ស៊ីល (Mesut Ozil) ក៏ដូចជាកីឡាករដទៃទៀតគ្រប់រូបដែរ ពោល​គឺ​តែងតែមានកីឡាករឆ្នើមរូបណាមួយជានិមិត្តរូបរបស់ខ្លួន។ អូស្ស៊ីលបានប្រាប់ឲ្យដឹងថា កីឡាករដែលជានិមិត្តរូបរបស់គាត់ ជាវីរបុរសរបស់ក្រុមអធិរាជស លោកស្ស៊ីនើឌីន ស្ស៊ីដាន់ (Zinedine Zidane) ដែលបច្ចុប្បន្ន គាត់ជាជំនួយការគ្រូបង្វឹក​ក្រុម​រៀលដែរ។

កីឡាករខ្សែបម្រើ ម៉េស៊ូត អូស្ស៊ីល និងរូបរបស់លោក ស្ស៊ីនើឌីន ស្ស៊ីដាន់។ (រូបថត livejournal.com)

អតីតកីឡាករអន្តរជាតិបារាំង ស្ស៊ីដាន់ បានអង្រួនបេះដូងអ្នកគាំទ្រក្រុមរៀលម៉ាឌ្រីដ អស់រយះពេល៥ឆ្នាំ បន្ទាប់អតីត​កីឡាកររួបនេះ លេងបានយ៉ាងល្អឥតខ្ចោះក្នុងក្រុមរៀលម៉ាឌ្រីដ រួមមានទាំងការញ៉ាក់បាល់ និងភាពរហ័សរហួន។ នៅឆ្នាំ​២០០៣ ស្ស៊ីដាន់ បានឈ្នះពានរង្វាន់កីឡាករល្អបំផុតរបស់ពិភពលោក បន្ទាប់ពីបង្ហាញទម្រង់លេង​នៅក្នុងកីឡាដ្ឋាន​សាន់ទីអាកូ បឺណាប៊ូ (Santiago Bernabeu) បានយ៉ាងល្អរួចមក។

បន្ទាប់ពីប្រកាសចូលនិវត្តន៏ ស្ស៊ីដាន់ បានមកចួលរួមជាមួយក្លិបជាថ្មីទៀត ក្នុងនាមជាអ្នកគ្រប់គ្រង់ផ្នែក​បច្ចេកទេស​បាល់ទាត់។ ប៉ុន្តែខណៈដែលគ្រូបង្វឹកថ្មីលោកកាឡូ អេនសេឡូទី (Carlo Ancelotti) បានមកដឹកនាំក្រុមនៅរដូវកាលថ្មីនេះ ស្ស៊ីដាន់បានក្លាយខ្លួនជាជំនួយការគ្រូបង្វឹកវិញ។

ខ្សែបម្រើឆ្នើមអន្តរជាតិអាឡឺម៉ង់ អូស្ស៊ីល បាននិយាយថា កាលពីគាត់នៅពេលពុំទាន់មានភាពលេចធ្លោរប៉ុន្មាននោះ (នៅឈុតយុវជនអាឡឺម៉ង់) ពេលនោះស្ស៊ីដាន់ កំពុងតែលេងបានយ៉ាងល្អ និងកំពុងតែមានភាពល្បីល្បាញយ៉ាងខ្លាំង ហើយគាត់ (អូស្ស៊ីល) ក៏ចាត់ទុកស្ស៊ីដាន់ជានិមិត្តរូបរបស់ខ្លួនចាប់ពីពេលនោះមក រហូតមកដល់សព្វថ្ងៃ។

កីឡាករវ័យ២៤ឆ្នាំ (អូស៊្សីល) បានប្រាប់ដល់ទស្សនាវដ្តី (So Sport) ថា៖ «ខ្ញុំចូលចិត្តស្ស៊ីដាន់ តាំងពីឃើញគាត់ លេងនៅ​បាល់ទាត់ពិភពលោកឆ្នាំ១៩៩៨ ក្នុងប្រទេសបារាំង។ ចាប់តាំងពីពេលនោះមក នៅពេលដែលខ្ញុំលេងហ្គេមបាល់ទាត់ ខ្ញុំតែងតែយកក្រុមរៀលម៉ាឌ្រីដ ឬក្រុមជម្រើសជាតិបារាំងជានិច្ច។»

អូស្ស៊ីល បានបន្តថា៖ «ពេលនោះ ខ្ញុំបានចូលទៅក្នុងគេហទំព័រយូធូប (YouTube) ដើម្បីស្វែងរកឈ្មោះស្ស៊ីដាន់ និងមើល​ពីរបៀបគាត់លេង។ ខ្ញុំតែងតែនិយាយប្រាប់ខ្លួនឯងថា ខ្ញុំត្រូវតែធ្វើឲ្យបានល្អដូចគាត់ នៅពេលដែលខ្ញុំស្ថិតក្នុងការប្រកួត​នៅលើទីលាន៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ