ក្រុមបាល់ទាត់អធិរាជសរៀលម៉ាឌ្រីដ (Real Madrid) បានព្រមព្រាងចុះកិច្ចសន្យាជាមួយនឹងអ្នកឧបត្ថម្ភអាវថ្មី ក្រុមហ៊ុន​អាកាសចរណ៏ឈ្មោះអិមីរ៉េត (Emirates) សម្រាប់រយះពេល៥រដូវកាល។

តារាបាល់ទាត់របស់រៀលម៉ាឌ្រីដ កំពុងបង្ហាញអាវថ្មីរបស់ពួកគេ។

ម្ចាស់ក្លឹបលោកហ្វឡរ៉ិនទីនូ ប៉េរែស (Florentino Perez) បានប្រាប់ដល់សន្និសិទកាសែត នាកីឡាដ្ឋានបឺណាប៊ូ (Bernabeu) កាលពីថ្ងៃព្រហស្បតិ៏ថា «វាជាសករាជថ្មីមួយទៀត សម្រាប់ក្រុមរបស់យើង ជាមួយនឹងក្រុមហ៊ុនយីហោ​លំដាប់ថ្នាក់​ពិភពលោកមួយនេះ។ យើងជឿថាពួកគេ នឹងជួយយើងឲ្យទទួលបានជោគជ័យបន្ថែមទៀត។»

ប្រធានក្លឹប ដែលពុំទាន់រកបានគ្រូបង្វឹកមកដឹកនាំក្រុមនៅឡើយនោះ បានបន្តថា «វាជាការព្រមព្រៀងដ៏មានសារៈសំខាន់​បំផុតមួយ នៅក្នុងប្រវត្តិសាស្រ្តរបស់ក្លឹប។»

ពុំទាន់មានសេចក្តីរាយការណ៏ ដែលបង្ហាញពីតម្លៃណាមួយ ជាផ្លូវការនៅឡើយទេ។ ប៉ុន្តែកាសែតក្នុងស្រុកនានា នៃប្រទេស​អេស្ប៉ាញបានបង្ហាញថា ពួកគេមានការព្រមព្រាងគ្នាក្នុងតម្លៃ ៣០លានអ៊ឺរ៉ូ (៣៩លានដុល្លា) ក្នុងរយះពេល១ឆ្នាំ។

អាវដ៏ល្បីល្បាញរបស់ក្រុមរៀលម៉ាឌ្រីដ នឹងបង្ហាញនូវឈ្មោះក្រុមហ៊ុនថ្មី (Emirates) ចាប់ពីរដូវកាលថ្មីខាងមុខនេះតទៅ។

ក្រុមហ៊ុនរបស់ប្រទេសឌូបៃនេះ បានដេញថ្លៃឈ្នះក្រុមហ៊ុនអនឡាញប៊ីវីន (bwin) ដែលបានឧបត្ថម្ភក្រុមរៀលម៉ាឌ្រីដ៦ឆ្នាំ​មកហើយនោះបានសម្រេច ខណៈដែលប៊ីវីន ព្រមព្រាងកិច្ចសន្យាជាមួយក្រុមយក្សអេស្ប៉ាញមួយនេះ ក្នុងតម្លៃត្រឹមតែ​២៣លានអ៊ឺរ៉ូ ក្នុងមួយឆ្នាំ។

ការចុះកិច្ចសន្យាជាមួយក្រុមហ៊ុនអាកាសចរណ៏នេះ បានធ្វើឲ្យក្រុមរៀលម៉ាឌ្រីដ ទទួលបានតម្លៃអ្នកឧបត្ថម្ភ ប្រហាក់​ប្រហែលទៅនឹងក្រុមម្ចាស់ជើងឯកបាសេឡូណា (Barcelona) ដែរ ខណៈដែលក្រុមហ៊ុនឧបត្ថម្ភអាវក្រុមបាសេឡូណា កាតា (Qatar) ផ្តល់ឲ្យក្លឹបមួយនេះក្នុងតម្លៃ ៣០លានអ៊ឺរ៉ូដែរនោះ។

កាលពីរដូវកាលមុន ក្រុមបាល់ទាត់រៀលម៉ាឌ្រីដ បានក្លាយជាក្លឹបដំបូងគេ ដែលមានចំណូលរហូតដល់ជាង ៥០០លានអ៊ឺរ៉ូ នេះបើតាមកាសែតដេឡូតេ (Deloitte) បានបង្ហាញកាលពីខែមករាកន្លងទៅ។

ពួកគេទទួលបានចំណូល ៥១៣លានអ៊ឺរ៉ូ ខណៈដែលក្រុមបាសេឡូណាស្ថិតនៅចំណាត់ថ្នាក់លេខ២ មានចំណូល ៤៨៣​លានអ៊ឺរ៉ូ។ រីឯក្រុមម៉ែនឆេស្ទើ យូណៃធីត (Manchester United) ស្ថិតនៅចំណាត់ថ្នាក់លេខ៣ មានចំណូលប្រមាណជា ៣៩៦លានអ៊ឺរ៉ូ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣១ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ