តាមពិតទៅ ក្រុមបាល់ទាត់យក្សទាំងពីរ ធ្លាប់បានជួបគ្នា ជាច្រើនដងហើយ ខណៈលទ្ធផលវិញ ក្រុម បាយ៉ឺនមូនិឆ (Bayern Munich) របស់ប្រទេសអាល្លឺម៉ង់ មិនសូវមានវាសនាប៉ុន្មាន ទល់នឹងក្រុម រៀលម៉ាឌ្រីត (Real Madrid) របស់ប្រទេសអេស្ប៉ាញនោះទេ។

សម្រាប់ការប្រកួត «ទៅ» វគ្គពាក់កណ្ដាលផ្ដាច់ព្រ័ត្រ ក្របខណ្ឌដណ្ដើមជើងឯកអ៊ឺរ៉ុប «Champions League» ប្រចាំឆ្នាំ២០១៧-២០១៨ ក្នុងយប់នេះ ក្រុម រៀល ដែលកំពុងកាន់តំណែង ជាជើងឯកឆ្នាំទៅម៉ិញ នៅក្នុងដៃផងនោះ បានយកឈ្នះលើក្រុម បាយ៉ឺន ជាថ្មីទៀត នៅក្នុងកីឡដ្ឋាន «Allianz Arena» របស់ក្រុម បាយ៉ឺន។

នៅក្នុងការប្រកួត ដែលមានរយៈពេលជាង ៩០នាទី និងបើទោះជា កីឡាករ គ្រីស្ទៀណូ រ៉ូណាល់ដូ (Cristiano Ronaldo) កំពូលខ្សែប្រយុទ្ធរបស់ក្រុម រៀល មិនសូវមាន​សកម្មភាព​យ៉ាងណាក្ដី តែកីឡាករភាគច្រើន របស់ក្រុម រៀល សុទ្ធតែមានថ្វីជើង ប្រកបដោយប្រសិទ្ធភាពខ្ពស់ ក្នុងការទប់ ចែក បញ្ជូន និងទាត់បាល់ បញ្ចូលទី។ គ្រាប់បាល់ទាំងពីរគ្រាប់ របស់ក្រុម រៀល រកបាននៅនាទីទី ៤៤ ដោយការទាត់មិនព្រាងទុក របស់កីឡាករខ្សែការពារជាតិប្រេស៊ីល កីឡាករ ម៉ាសឺឡូ (Marcelo) និងនៅនាទីទី៥៧ ដោយខ្សែបម្រើជាតិអេស្ប៉ាញ កីឡាករ អាសេនស៊ីយ៉ូ (Marco Asensio) ដែលឆ្លៀតឱកាស ពីកំហុសរបស់ខ្សែការពារ របស់ក្រុម បាយ៉ឺន។

ចំពោះក្រុម បាយ៉ឺន វិញ បន្ទាប់ពីរកគ្រាប់បាល់បាន នៅនាទីទី២៨ ដោយកីឡាករ «Kimmich» នោះរួច ក្រុមនេះក៏មានឱកាសជាច្រើនទៀតដែរ ក្នុងការទាត់បញ្ចូលទី របស់ក្រុម រៀល។ ប៉ុន្តែ ប្រសិទ្ធិភាព និងថ្វីជើង មានភាពខុសគ្នា រវាងក្រុមកីឡាករ នៃក្រុមទាំងពីរ។ ណាមួយទៀត កីឡាករម្ទេសចាស់ របស់ក្រុម បាយ៉ឺន គឺកីឡាករ រ៉ូបេន (Arjen Robben) បានរងរបួស តាំងពីចូលប្រកួតបានបន្តិច នៅនាទីទី ៨។ នេះ គេនៅមិនទាន់និយាយផងទេ ថាកីឡាករសំខាន់ៗ ៤នាក់ (David Alaba - Manuel Neuer - Kingsley Coman និង Arturo Vidal) របស់ក្រុម បាយ៉ឺន សុទ្ធតែរងរបួស មិនបានចូលប្រកួត។

ជ័យជំនះរបស់ក្រុម រៀល នៅខាងក្រៅផ្ទះ ពិតជាផ្ដល់ប្រៀបយ៉ាងច្រើន សម្រាប់ការប្រកួត «ត្រឡប់» ដែលនឹងត្រូវធ្វើ ក្នុងកីឡដ្ឋាន «Santiago-Bernabéu» របស់ក្រុម រៀល នាសប្ដាហ៍ខាងមុខ។ មានប្រៀបច្រើន ព្រោះក្រុម បាយ៉ឺន ត្រូវរកគ្រាប់បាល់ឈ្នះ ឲ្យបានច្រើនជាងក្រុម រៀល យ៉ាងហោាចណាស់ ដូចក្នុងលក្ខខណ្ឌ ០-២ ឬ ២-៣ នេះជាដើម។ ប៉ុន្តែ នៅចំពោះក្រុម រៀលម៉ាឌ្រីត ដែលជាម្ចាស់តំណែងជើងឯក ពីរជំនាន់ជាប់គ្នា និងដែលពោរពេញ ដោយកម្លាំងដ៏ខ្លាំងក្លានេះ ក្រុម បាយ៉ឺន ហាក់មានសង្ឃឹមតិចតួចណាស់៕

» សង្ខេបការប្រកួត នៃក្រុមបាល់ទាត់យក្សទាំងពីរ​ឡើងវិញ៖