ខ្សែរអាត់​សម្លេង​លោក កឹម សុខា ពាក់​ពន្ធ័​នឹង​គុក​ទួល​ស្លែង​ជា​រឿង​«នយោបាយ»?

ការចាក់ខ្សែរអាត់សម្លេងរបស់លោក កឹម សុខា ថា«គុកទួលស្លែងជាគុកសប្បនិមិ្មត» ដោយអង្គភាពព័ត៌មាន និងប្រតិកម្ម​រហ័ស របស់រដ្ឋាភិបាល បានក្លាយជាព្រឹត្តិការណ៍នយោបាយមួយថ្មី ដែលនាយករដ្ឋមន្ត្រីលោកហ៊ុនសែន បានយកឱកាស​នេះ«វាយសន្ធាប់»ទៅលើមេដឹកនាំបក្សប្រឆាំង។ តើខ្សែរអាត់សម្លេងជារឿងពិត ឬគ្រាន់ជាការ«កាត់ត» ដើម្បីបង្កើតជា​ឧបករណ៍ក្នុងការវាយប្រហារ?
Loading...
  • ដោយ: អ៊ុម វ៉ារី
  • កែប្រែចុងក្រោយ: May 31, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ការចាក់ខ្សែរអាត់សម្លេងរបស់លោក កឹម សុខា ថា«គុកទួលស្លែងជាគុកសប្បនិមិ្មត» ដោយអង្គភាពព័ត៌មាន និងប្រតិកម្ម​រហ័ស របស់រដ្ឋាភិបាល បានក្លាយជាព្រឹត្តិការណ៍នយោបាយមួយថ្មី ដែលនាយករដ្ឋមន្ត្រីលោកហ៊ុនសែន បានយកឱកាស​នេះ«វាយសន្ធាប់»ទៅលើមេដឹកនាំបក្សប្រឆាំង។ តើខ្សែរអាត់សម្លេងជារឿងពិត ឬគ្រាន់ជាការ«កាត់ត» ដើម្បីបង្កើតជា​ឧបករណ៍ក្នុងការវាយប្រហារ?


រូបថតរបស់គណបក្ស ដែលបានផ្ញើរមកមនោរម្យព័ងអាំងហ្វូ បញ្ជាក់ពីវត្តមានលោកកឹម សុខា នៅស្រុកពពាក្រែក ក្នុងខេត្ត​កំពង់ចាម មិនមែននៅខេត្តតាកែវ ឬនៅខេត្តព្រៃវែងនោះទេ។

រៀងរាល់មុនរដូវកាលនៃការបោះឆ្នោតម្តងៗ គ្រប់គណបក្សនយោយបាយ តែងតែសម្លៀងមាត់ កំដៅសាច់ដុំ និងព្យាយាម​ស្វែងរកកំហុសពីគូបដិបក្ខ ដើម្បីវាយប្រហារគ្នាទៅវិញទៅមក។ ជាពិសេស ការវាយប្រហារដែលប៉ះពាល់យ៉ាងខ្លាំង ទៅ​ដល់អារម្មណ៍និងបេះដូងនៃប្រជាជាតិខ្មែរទាំងមូលនោះ គឺការយកព្រឹត្តិការណ៍នៃការកាប់សម្លាប់យ៉ាងរង្គាល អស់ជីវិត​មនុស្សជាងពីរលាននាក់ ក្នុង​របបរខ្មែរ​ក្រហមប៉ុល ពត មកវាយគងបំពង ជាសម្លេងឲ្យឮឡើង។

បាតុកម្មមួយដែលគេរំពឹងថា មានការចូលរួមពីសំណាក់ជនរងគ្រោះ នៃរបបបីឆ្នាំប្រាំបីខែម្ភៃថ្ងៃ កំពុងត្រូវបានរៀបចំធ្វើឡើង ដើម្បីទាមទារឲ្យ​មាន​ការ«សុំទោស»ពីលោក កឹម សុខា ជាសាធារណៈនៅឯគុកទួលស្លែង ជាពិសេសបន្ទាប់​ពីការ​ប្រកាស​របស់លោក ហ៊ុន សែន នៅថ្ងៃទី៣០ខែឧសភាក្នុងខេត្តកំពង់ចាមនោះមក។

ប្រធានសមាគមជនរងគ្រោះ ដោយរបបកម្ពុជាប្រជាធិបតេយ្យ ហៅកាត់ថា “សមាគមក្សេមក្សាន្ត” លោក ជុំ ម៉ី ដែលជា​អ្នក​ផ្តួចផ្តើមគំនិតបាតុកម្មនេះ បានថ្លែងប្រាប់ថា គម្រោងធ្វើបាតុកម្មនេះ មិនមែនធ្វើឡើងក្នុងនាមសមាគមនោះទេ ប៉ុន្តែនឹង​ធ្វើ​ឡើងក្នុងនាមរូបលោកផ្ទាល់ ដែលជាជនរងគ្រោះម្នាក់ បានរួចជីវិតពីគុកទួលស្លែងនៃរបបប៉ល ពត ហើយឈឺចាប់នឹងសំដី​របស់លោក កឹម សុខា និយាយកាលពីថ្ងៃទី១៨ខែឧសភានេះ។ លោកបញ្ជាក់ថា លោក និងសមាគមរបស់លោក មិនមាន​ប៉ះពាល់នឹងនយោបាយទេ។

លោកប្រធានសមាគមវ័យ៨៣ឆ្នាំរូបនេះ បានបញ្ជាក់ថា ដោយសារតែបច្ចុប្បន្នលោកទុកពេលដប់ថ្ងៃ សម្រាប់លោក កឹម សុខា (ពីថ្ងៃទី ២៥ ខែឧសភា ថ្ងៃទី៣ ខែមិថុនា) ដូច្នេះពេលវេលានៃការធ្វើបាតុកម្ម នៅមិនទាន់បានកំណត់ជាក់លាក់នោះ​នៅឡើយ ឯអ្នកចូលរួមវិញលោកក៏មិនបង្ខំឡើយ ពួកគាត់អាចចូលរូមតាមការស្មគ្រ័ចិត្ត។

រហូតមកទល់នឹងម៉ោងនេះ មនោរម្យព័ងអាំងហ្វូ នៅមិនទាន់រកបានប្រភពឯករាជ្យណាមួយបាននៅឡើយ ដើម្បីបញ្ជាក់​ពី​ឯកសារសម្លេងនេះ ក្រៅតែពីសម្លេងដែលចាក់ផ្សាយដោយអង្គភាពព័ត៌មាន និងប្រតិកម្មរហ័ស របស់រដ្ឋាភិបាល។ លោកជុំ ម៉ី បានបកស្រាយថា លោកស្ដាប់បានសម្ដីលោកកឹមសុខា ដោយផ្ទាល់ត្រជៀក តែតាម«វិទ្យុមួយនោះ»ចាក់ផ្សាយប៉ុណ្ណោះ ដោយការនិយាយនោះបានធ្វើ នៅក្នុង«ខេត្តព្រៃវែង» និងបន្ទាប់មកនៅក្នុង«ខេត្តតាកែវ»។ តែនៅពេលអ្នកយកព័ត៌មាន សួរ​លោកបន្ថែមថា វិទ្យុនោះឈ្មោះអ្វី? លោកថា លោកមិនចាំឈ្មោះរបស់វិទ្យុនោះទេ។

ផ្ទុយទៅវិញ លោក យ៉ែម បុញ្ញារិទ្ធិ អ្នកនាំពាក្យគណបក្សសង្គ្រោះជាតិ បានអះអាងមកវិញថា ក្នុងថ្ងៃទី១៨ខែឧសភានោះ លោកកឹម សុខាមិនបានទៅ​ខេត្តព្រៃវែង ឬទៅខេត្តតាកែវទេ តែលោកបានទៅខេត្តកំពង់ចាម ដែលមានប្រជាពលរដ្ឋ​នៅ​ទីនោះរាប់ពាន់នាក់ ជាសាក្សី និងមានឯកសារសម្លេងជាសភ្តុតាងស្រាប់។ បើតាមអ្នកនាំពាក្យរូបនេះ ខ្សែអាត់សម្លេង​ដែល​បង្ហាញដោយអង្គភាពព័ត៌មាន និងប្រតិកម្មរហ័ស របស់រដ្ឋាភិបាល ជាការកាត់ត និងមួលបង្កាច់ទាំងស្រុង។ លោកបន្តថា ព្រោះកាលថ្ងៃទី១៨ នោះ លោក កឹម សុខា បានទៅខេត្តកំពង់ចាម ហើយថែមទាំងមិនបាននិយាយពាក់ពន្ធ័ នឹងរឿងគុក​ទួលស្លែងនោះផង។

ដោយឡែកចំពោះ លោក ប៊ូ ម៉េង ដែលជាអនុប្រធានសមាគមក្សេមក្សាន្តរបស់លោកប្រធានជុំ ម៉ីវិញ បានលើកឡើងថា រូបលោកផ្ទាល់មិនបានដឹង ពីការលើកឡើងរបស់លោក កឹម សុខា នោះជាការពិត ឬយ៉ាងណាទេ ព្រោះ«ឮតាមតែ​គេថា​ដូចគ្នា»។ ឯការចូលរួមក្នុងបាតុកម្មនោះ បុរសចំណាស់៧២ឆ្នាំរូបនេះ បាននិយាយទំនងជាមិនច្បាស់ថា «បើថ្ងៃនោះ​ស្រួលខ្លួនខ្ញុំចូលរួម បើមិនស្រួលខ្លួនខ្ញុំមិនចូលទេ។ ការងារនេះមិនធម្មតាទេ តែងតែមានការលួចជ្រៀតជ្រែកពីនេះពីនោះ អាហ្នឹងខ្ញុំខ្លាចខ្លួនដែរ។»

គម្រោងការធ្វើបាតុកម្មនេះ ត្រូវបានអ្នកវិភាគមួយចំនួន ចាត់ទុកថាជារឿងពាក់ពន្ធ័នឹងនយោបាយ បើទោះជាតំណាងអ្នក​រៀបចំបាតុកម្ម បានអះអាងថាខ្លួននិងក្រុមរបស់ខ្លួន មិនជាប់ទាក់ទិនអ្វីនឹងនយោបាយនោះក៏ដោយ និងជា​ពិសេសនៅ​ពេល​ដែលគម្រោងការនេះ បានកើតឡើងនៅក្រោយប្រតិកម្មរបស់លោកនាយករដ្ឋមន្ត្រីនោះ។ បណ្ដាញប្រព័ន្ធផ្សព្វផ្សាយ​ក្នុង​ស្រុកមួយចំនួនធំ ត្រូវបានរឹតត្បិត និងគ្រប់គ្រងដោយរដ្ឋាភិបាល ដែលគេមិនអាចសង្ឃឹមបាន ពីភាពឯករាជ្យត្រឹមត្រូវ នៃ​ប្រភពព័ត៌មាននានា ថានឹងយកជាការបាន។

អ្នកវិភាគសង្គម និងនយោបាយលោក ឡៅ មុងហៃ បាននិយាយថា ក្នុងបរិបទនយោបាយ អ្នកនយោបាយគេមានបុរេគំនិត (ការគិតទុកជាមុន) ហើយមានការតតាំង និងក៏អាចមានការបកស្រាយជ្រុលជ្រួសដែរ។ ក្នុងប្រទេសដែលប្រកាន់លិទ្ធិ​ប្រជាធិបតេយ្យសេរីពហុបក្ស បើភាគីណាមួយនិយាយខុស ភាគីមួយទៀត អាចធ្វើការកែតម្រូវបាន។ អ្នកវិភាគរូបនេះ បាន​ផ្ដល់ជាយោបល់ថា ដោយលោក កឹម សុខា ជាសមាជិកសភាស្រាប់ ដូច្នេះអាចបង្កើតគណកម្មការមួយ ធ្វើការស៊ើបអង្កេត​មើលថា តើការនិយាយនោះត្រឹមត្រូវ ឬមិនត្រឹមត្រូវ ជៀសវាងការបកស្រាយផ្សេងៗ អាចធ្វើឲ្យមានការជ្រុលជ្រួស ឬកើត​មាននូវបាតុភាពផ្សេងៗ។

លោក ឡៅ មុងហៃ បានបន្តថា ការប្រសើរជាងនេះនោះ លោកនាយករដ្ឋមន្ត្រី អាចធ្វើការបង្គាប់បញ្ជា កុំទាន់ឲ្យមានការ​បកស្រាយដោយក្រុមខ្លួន តែត្រូវរង់ចាំគណកម្មការពិនិត្យថា ការនិយាយនោះយ៉ាងណា ហើយការបកស្រាយ​របស់​គណកម្មការនោះវាយ៉ាងម៉េចសិន នោះទើបអាចរកខុសត្រូវឃើញ។ ការប្រកាសធ្វើបាតុកម្មដោយយោងតាម ការវិនិច្ឆ័យ​លើសម្លេងនេះ វាគ្រាន់តែបង្កើតឲ្យមាន «ភាពច្របូកច្របល់» តែប៉ុណ្ណោះ។ លោកបញ្ជាក់ថា បើកើតមានបាតុកម្មនេះមែន ក៏មិនមានអ្វីជាបញ្ហាដែរ ព្រោះវាជាសិទ្ធិសេរីភាព ក្នុងការបញ្ចេញមតិ តែអ្វីដែលសំខាន់នោះ កុំឲ្យមានការលូកលាន់ ឬ​ជម្រុញពីថ្នាក់ដឹកនាំទៅបានហើយ។

សាធារណមតិទូទៅបានលើកឡើងថា អ្នកនយោបាយ គួបង្ហាញពីសមត្ថភាព ឬពីគោលនយោបាយរបស់ខ្លួន ក្នុងការ​ដឹកនាំប្រទេសទៅថ្ងៃមុខ ជៀសជាងសង្គ្រាមវាយប្រហារគ្នា តាមពាក្យសម្ដី ឬតាមបាតុកម្ម ដែលអាចជះឥទ្ធិពលមិនល្អ ដល់ការបោះឆ្នោត ហើយវាក៏ពុំមែនជាជម្រើសដ៏ល្អ របស់អ្នកនយោបាយនោះដែរ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៣១ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]m.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...